Жұқпалы аурудан сақтануға шақырды
Кеше бұқаралық ақпарат құралдары өкілдері қалалық балалар жұқпалы аурулар ауруханасында болып, медициналық мекеменің дәрігерлерімен кездесіп, оның қызметімен танысты. Бұл – барлық заманауи стандарттарға сай жаңаша жабдықталған, осы сала бойынша қаладағы жалғыз 300 орындық емдеу орны. Мұнда жоғары білікті мамандар жұқпалы ауруға шалдыққан 15 жасқа дейінгі балалар мен жасөспірімдерге мамандандырылған медициналық көмек көрсетеді.
Мекеме қызметкерлері аурулардың қабылдау-диагностикалау бөліміне келіп түскеннен бастап, науқастар дертінің ауырлығына қарай арнаулы орындарда жеке қаралып, емдеудің ерекше шараларын алады. Аурухана бас дәрігерінің сапаны бақылау бойынша орынбасары Роза Өтегенова бүгінде тәулігіне 200-ге дейін балалар қаралатынын айтты.
Орта есеппен алғанда бұл науқастардың жағдайына қарай үштен бір бөлігі жатқызылады. Осы кезеңде мезгілдік жедел респираторлық вирусты жұқпаның көтеріліп тұрғаны белгілі. Вирус жұққан баланың қызуы көтеріліп, іші өтіп не құсып, кейде дене қызуын көтере алмай, талықсып жатады. Мұндайда шұғыл көмек көрсетіледі. Негізі, үш жасқа дейінгі балалар анасымен жатқызылады, егер нәрестесі емізулі болса, онда анасы тегін тамақпен қамтамасыз етіледі. Ал үш жастан кейінгі сәбилердің аналарына күніне екі рет келіп баласының жанында болуға мүмкіндік қарастырылған. Бір ауысымда үш дәрігер қызмет етеді, науқастардың санының көбеюіне байланысты 2 дәрігер тағы қосылады.
Дәрігерлер ата-аналарға балаларының жай-күйіне ден қойып, қандай да бір аурудың түрі байқалса, алдымен дәрігерлердің кеңесіне жүгініп, алғашқы сәттен дұрыс ем-шара қолданып, аурудың алдын алу керектігін ескертті.