Халықты тұрғын үймен қамтамасыз ету мәселесі бүгінде өзекті болып қалуда. Мемлекет басшысының «Нұрлы жол – болашаққа бастар жол» тақырыбындағы Жолдауы аясында Үкіметтің алдына қойған басты міндет – халыққа қолжетімді баспана салу.
Президент тұрғындарға сатып алу құқын бере отырып, ұзақ мерзімді жалға ұсынатын тұрғын үй салуды ұсынды. Баспананы тікелей, делдалдарсыз және несиеге барынша төмен пайызбен ұсыну оның сатып алу құнын арзандатуға мүмкіндік береді.
Қазіргі кезде Астанада «Қолжетімді баспана – 2020» мемлекеттік бағдарламасы аясында тұрғын үй құрылысы жүргізілуде. Құрылыс басқармасының мәліметінше, нақ осы бағдарлама аясында жалпы ауданы 130 мың шаршы метр 2 671 пәтерлік сегіз тұрғын үй салынып жатыр.
Соның ішінде 1 574 пәтерлік бес тұрғын үй кешенін пайдалануға беру жоспарланған.
Бұдан басқа, 1135 пәтерлік 8 тұрғын үйдің құрылысы басталды. Оларды 2015-2016 жылдары пайдалануға беру жоспарланған.
Жалпы, бағдарламаны іске асыру аясында Астанада жалпы ауданы 84,06 мың шаршы метр 1 581 пәтерлік жеті тұрғын үй тапсырылды. 2015 жылы жалпы ауданы 108,4 мың шаршы метр 1 937 пәтерлік 10 тұрғын үйді салу жалғасады.
