«ЖЫЛҚЫ ЖЫЛЫ» ЕСТЕЛІК МОНЕТАСЫ АЙНАЛЫМҒА ШЫҚТЫ
Қазақстан Республикасының Ұлттық банкі алдағы жылқы жылына орай номиналы 500 теңгелік алтын және күміс ескерткіш монеталарын айналымға шығарды.
«Шығыс күнтізбесі» топтамасымен шығарылған монеталар 12 қырлы, бет жағында жұлдыздар шоғырының мифологиялық символдары бейнеленген және құрамы мен салмағы көрсетілген. Ал сырт жағында 2014 жылдың символы – жылқы бейнеленген және Қазақстан теңге сарайының тауар белгісі таңбаланған. Монетаны айналдыра жалпақ күңгірт жиек жүргізілген, үстінде «2014» деген жазуы бар қаусырма орналасқан.
31,1 грамм күмістен құйылған тиын 5 мың данамен таралса, 7,78 грамдық алтын монета 3 мың данамен шығып отыр.
«Proof» сапасына сай ескерткіш монеталар коллекциялық құны бойынша сатуға арналған. Олар кәдесыйлық ораумен шығарылады және Қазақстан Республикасы Ұлттық банкінің мемлекеттік, орыс және ағылшын тілдеріндегі нөмірлік сапа сертификатымен қоса бекіледі.
Монеталарды Қазақстан Республикасы Ұлттық банкінің барлық филиалдарында сатып алуға болады.
Қымбат Нұрғали