1 ماۋسىمدا ەلىمىزدە سۋعا شومىلۋ ماۋسىمى باستالادى. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە قر تجم ازاماتتىق قورعانىس جانە اسكەري بولىمدەر كوميتەتى توراعاسىنىڭ ورىنباسارى الەكسەي سوۆەتوۆ مالىمدەدى, دەپ حابارلايدى astana-akshamy.kz.
تجم سۋ ايدىندارىندا قاۋىپسىزدىكتى قامتاماسىز ەتۋ ماقساتىندا ورتالىق مەملەكەتتىك ورگاندارمەن جانە اكىمدىكتەرمەن بىرلەسىپ كەشەندى دايىندىق, الدىن الۋ جۇمىستارى ۇيىمداستىرىلىپ, ىسكە اسىرىلۋدا. قر تجم ازاماتتىق قورعانىس جانە اسكەري بولىمدەر كوميتەتى توراعاسىنىڭ ورىنباسارى الەكسەي سوۆەتوۆتىڭ ايتۋىنشا, وقۋ جىلىنىڭ اياقتالۋىنا بايلانىستى قۇتقارۋشىلاردىڭ نازارى سۋعا شومىلۋ كەزەڭىندە بالالاردىڭ قاۋىپسىزدىگىنە اۋدارىلدى. جىل باسىنان بەرى اۋقىمدى پروفيلاكتيكالىق جۇمىستار بەلسەندى جۇرگىزىلۋدە.
«20 مىڭنان استام بالاعا ءجۇزۋ داعدىلارى ۇيرەتىلدى, وسى باعىتتاعى جۇمىس جالعاسۋدا», – دەدى سپيكەر وكق الاڭىندا وتكەن ءباسپاسوز كونفەرەنتسياسىندا.
پروفيلاكتيكالىق ءىس-شارالاردى وتكىزۋ بارىسىندا 200 مىڭنان استام كورنەكى وقىتۋ ونىمدەرى تاراتىلدى, سۋ ايدىندارىندا 128 قاۋىپسىزدىك بەلگىسى ورناتىلدى. تجم ىشكى ىستەر مينيسترلىگىمەن بىرلەسىپ, تىيىم سالىنعان جەرلەردە ادامداردىڭ قازا بولۋ قاۋپىن ازايتۋ ماقساتىندا 20 مىڭنان استام رەيد پەن سۋداعى قاۋىپسىزدىك ەرەجەلەرىنىڭ تالاپتارىن بۇزۋدىڭ جولىن كەسۋ بويىنشا پاترۋلدەۋ جۇرگىزدى.
«انىقتالعان قۇقىق بۇزۋشىلار اكىمشىلىك قۇقىق بۇزۋشىلىق تۋرالى كودەكستىڭ 364, 412 جانە 440-باپتارى بويىنشا جاۋاپقا تارتىلادى. جىل باسىنان بەرى جالپى سوماسى 4 ملن استام تەڭگە قۇرايتىن 525 حاتتاما جاسالدى», – دەدى قر تجم ازاماتتىق قورعانىس جانە اسكەري بولىمدەر كوميتەتى توراعاسىنىڭ ورىنباسارى الەكسەي سوۆەتوۆ.
قوسىمشا 105 رۇقسات ەتىلگەن سۋعا شومىلۋ ورنى جاسالماق. 2023 جىلى ەل بويىنشا سۋ وبەكتىلەرىندە 612 رۇقسات ەتىلگەن جاپپاي دەمالىس, تۋريزم جانە سپورت ورنى بەلگىلەندى. ونىڭ 167-ءسى كوممۋنالدىق جانە 329-ى جەكەمەنشىك جاعاجايلار. بارلىق كوممۋنالدىق جاعاجايلار تەگىن.
«شومىلۋ ماۋسىمى باستالعانعا دەيىن اكىمدىكتەر سۋعا شومىلۋ ءۇشىن تاعى 105 رۇقسات ەتىلگەن قوسىمشا ورىن جاساۋدى جوسپارلاپ وتىر. ناتيجەسىندە 2024 جىلى سۋعا شومىلۋعا ارنالعان رەسمي ورىنداردىڭ سانى شامامەن 700 بىرلىكتى قۇرايدى. بۇل وتكەن جىلمەن سالىستىرعاندا 14%-عا كوپ», – دەدى قر تجم ازاماتتىق قورعانىس جانە اسكەري بولىمدەر كوميتەتى توراعاسىنىڭ ورىنباسارى.
