قازاقستاندىقتاردى 1 شىلدەدەن باستاپ قانداي وزگەرىستەر كۇتىپ تۇر؟ دەپ حابارلايدى astana-akshamy.kz
ونى BAQ.KZ ءتىلشىسى شولۋىنان وقي الاسىزدار.
9 كۇن دەمالىس
2024 جىلدىڭ شىلدەسىندە قازاقستاندىقتار 9 كۇن دەمالادى.
6 شىلدە – استانا كۇنى بيىل شىلدەنىڭ العاشقى سەنبىسىنە ءتۇسىپ تۇر. وسىعان بايلانىستى, سەنبى, 6 شىلدە كۇنگى دەمالىس دۇيسەنبى, 8 شىلدەگە اۋىسقان. ياعني, ەلىمىزدە 6, 7, 8 شىلدە كۇندەرى دەمالىس بولادى.
سونىمەن قاتار 13, 14 شىلدە, 20, 21 شىلدە, 27, 28 شىلدەدە, ياعني سەنبى-جەكسەنبى كۇندەرى ەل ازاماتتارى ادەتتەگى دەمالىس كۇندەرىنە شىعادى.
استاناعا شەت ەلدەردىڭ باسشىلارى كەلەدى
3-4 شىلدەدە استانادا شانحاي ىنتىماقتاستىق ۇيىمىنىڭ (شىۇ) ءسامميتى وتەدى. 4 شىلدەدە تاۋەلسىزدىك سارايىندا قازاقستاننىڭ توراعالىعىمەن شىۇ ءسامميتى باستالادى.
ەلىمىزدىڭ باس قالاسىنا بىرقاتار ەلدىڭ باسشىلارى كەلەدى.
سامميتكە 16 ەلدىڭ: قازاقستان, ءۇندىستان, يران, قىتاي, قىرعىزستان, پاكىستان, رەسەي, تاجىكستان, وزبەكستان, بەلارۋس, موڭعوليا, ازەربايجان, كاتار, ءباا, تۇركيا جانە تۇرىكمەنستاننىڭ مەملەكەت جانە ۇكىمەت باسشىلارى قاتىسادى.
بالاباقشالار ۋاقىتشا جۇمىس ىستەمەيدى
3-4 شىلدەدە, ياعني شانحاي ىنتىماقتاستىق ۇيىمىنىڭ ءسامميتى كەزىندە ەلوردادا بالاباقشالار جۇمىس ىستەمەيدى.
استانا قالاسى ءبىلىم باسقارماسىنىڭ ءباسپاسوز قىزمەتىنىڭ مالىمەتىنشە, وقۋ-اعارتۋ جانە ىشكى ىستەر مينيسترلىكتەرىنىڭ حاتىنا بايلانىستى ەلوردادا 3-4 شىلدە كۇندەرى مەكتەپكە دەيىنگى ۇيىمدار جۇمىس ىستەمەيدى.
كىم قاشىقتان جۇمىس ىستەيدى؟
استانادا 3-4 شىلدەسىندە شانحاي ىنتىماقتاستىق ۇيىمىنىڭ ءسامميتى وتەدى. بۇل كۇندەرى قاۋىپسىزدىك شارالارى كۇشەيتىلەدى.
ازاماتتارعا ىڭعايلى بولۋ ماقساتىندا, اسىرەسە جولداردا كەپتەلىس بولماس ءۇشىن 2-4 شىلدە ارالىعىندا مەملەكەتتىك مەكەمەلەرگە جانە كۆازيمەملەكەتتىك سەكتورلارعا قىزمەتكەرلەرىنىڭ 70%-ىنا دەيىن قاشىقتان جۇمىس ىستەۋ فورماتىنا اۋىستىرۋ ۇسىنىلادى. سول سياقتى 3-4 شىلدە كۇندەرى مەكتەپكە دەيىنگى مەكەمەلەر جۇمىس ىستەمەيدى.
شەتەلدەن كەلگەن مىقتىلار بيولوگيادان سايىسادى
7-14 شىلدە ارالىعىندا استانادا IBO-2024 بيولوگيادان 35-ءشى حالىقارالىق وليمپيادا وتەدى. بۇل وقۋشىلار اراسىنداعى ەڭ بەدەلدى وليمپيادالاردىڭ ءبىرى. بيىل وعان الەمنىڭ ءار تۇكپىرىنەن ەڭ مىقتى 305 جاس بيولوگ قاتىسادى.
ەلىمىزدىڭ قۇراما كومانداسىنا وليمپيادالىق رەزەرۆ اراسىندا ەڭ جوعارى رەيتينگكە يە بولعان ءتورت وقۋشى مەن ەكى جەتەكشى كىردى.
وليمپيادا تەوريالىق جانە 4 پراكتيكالىق تۋردان تۇرادى (بيوحيميا, مولەكۋلالىق بيولوگيا, بيوينفورماتيكا, اناتوميا جانە جانۋارلار فيزيولوگياسى). IBO-عا قازاقستان قۇراما كومانداسى 1996 جىلدان بەرى قاتىسىپ كەلەدى. وسى جىلدار ىشىندە ەل قۇراماسى 2 التىن, 20 كۇمىس, 54 قولا مەدال, 14 گراموتا جەڭىپ الدى. ەلىمىزدىڭ قورجىنىندا 90 ماراپات بار.
دارىلىك زاتتاردى تاڭبالاۋ مىندەتتەلەدى
قازاقستاندا دارىلىك زاتتاردى مىندەتتى تاڭبالاۋ 2024 جىلعى 1 شىلدەدەن باستاپ وندىرىلگەن پرەپاراتتارعا عانا ەنگىزىلەدى.
دەنساۋلىق ساقتاۋ ۆيتسە-ءمينيسترى ەربول وسپانوۆتىڭ ايتۋىنشا, 1 ماۋسىمداعى جاعداي بويىنشا 383 كوتەرمە قويمانىڭ 287-ءسى قاجەتتى جابدىقتارمەن جابدىقتالعان, 15 وڭىردە تەكسەرىس جۇرگىزىلدى. جاقىن ارادا قالعان 5 وڭىرگە شىعۋ قاراستىرىلىپ وتىر.
جالپى ەلىمىزدە تسيفرلىق تاڭبالاۋدى ەنگىزۋدىڭ وڭ سەرپىنى بايقالادى: قازاقستانعا اياق كيىمنىڭ رەسمي يمپورتى 2019 جىلى 39,5 ملن جۇپتان 2023 جىلعا قاراي 54,5 ملن جۇپقا دەيىن ءوستى. بيزنەسكە اياق كيىمنىڭ قالدىقتارىن بەلگىلەۋ ءۇشىن ءۇش جىلعا جۋىق وتپەلى كەزەڭ بەرىلدى.
تەمەكى باعاسى قىمباتتايدى
قازاقستاندا 1 شىلدەدەن باستاپ ەڭ ارزان تەمەكى 820 تەڭگەدەن ساتىلادى, بۇل قازىرگى باعادان 50 تەڭگەگە قىمبات.
سوڭعى جارتى جىلدا شىلىم باعاسى 16-18,8 پايىزعا ارتقان. ال بيىلدىڭ العاشقى توقسانىندا تەمەكى مەن پاپيروستىڭ باعاسى 53,4 پايىزعا ارتقان. الايدا ەلدە تەمەكىگە تاۋەلدى ازاماتتاردىڭ سانى ازايماي تۇر.
دەپۋتاتتار كانيكۋلعا شىعادى
1 شىلدەدەن باستاپ پارلامەنت پالاتالارىنىڭ دەپۋتتاتارى كانيكۋلعا شىعادى.
ءماجىلىس دەپۋتاتتارىنىڭ سوزىنشە, شىلدە ايىنىڭ العاشقى 15 كۇنى مەن تامىز ايىنىڭ سوڭعى 15 كۇنىندە دەپۋتاتتار وڭىرلەردى ارالاپ, حالىقپەن كەزدەسەدى.
مەديتسينالىق مەكەمەلەردەگى تاريفتەر قىمباتتايدى
مەديتسينالىق مەكەمەلەردە 5 باعىتتاعى تاريفتەردى كوتەرىلەدى.
1 شىلدەدەن باستاپ جاڭا تاريفتەر بويىنشا تولەنە باستايدى. ول نەگىزىنەن بالالاردىڭ نەۆرولوگياسى, بالالاردىڭ رەۆماتولوگياسى, بوسانۋ ماسەلەلەرىنە قاتىستى باعىتتار. ودان كەيىنگى 10 باعىت كرەديتورلىق قاراجاتتىڭ نەگىزى بولىپ وتىرعان كارديولوگيا, ورتوپەديا, ونكوگەماتولوگيا باعىتتارى بويىنشا جۇمىستاردى قىركۇيەككە دەيىن اياقتالادى.
