بۇگىن ءماجىلىس كۋلۋارىندا ىشكى ىستەر ۆيتسە-ءمينيسترى مارات قوجاەۆ قازاقستاندا جاڭا تۋعان نارەستەلەردىڭ ساۋداسى تۋرالى ايتتى, دەپ حابارلايدى astana-akshamy.kz
ونىڭ ايتۋىنشا, بىلتىر قازاقستاندا ادام ساۋداسىنىڭ 19 دەرەگى تىركەلگەن.
«بۇل بويىنشا قارالعان ىستەردىڭ جارتىسىنان كوبى اياقتالدى. قازىردىڭ وزىندە جاڭا تۋعان نارەستەلەردى ساۋدالاعانى ءۇشىن شامامەن 16-17 ادام جاۋاپقا تارتىلدى. بيىل بىزدە جاڭا تۋعان نارەستەلەردى ساتۋدىڭ ءۇش دەرەگى تىركەلدى. بۇلاردىڭ ءبارى ءبىزدىڭ ەل ىشىندە بولعان جايتتار. بالالار 100 مىڭ تەڭگەدەن 2 ميلليون تەڭگەگە دەيىنگى سومادا ساۋدالانعان», – دەيدى ول.
سونداي-اق, وسى كۇنى وتكەن ءماجىلىستىڭ جالپى وتىرىسىندا ادام ساۋداسى تۋرالى ماسەلە قارالدى. وندا جاڭا تۋعان نارەستەنى تاستاپ كەتكەنى تۋرالى حابارلاماعانى ءۇشىن مەديتسينالىق ۇيىمدار مەن بالالار ءۇيىنىڭ قىزمەتكەرلەرى اكىمشىلىك جازاعا تارتىلاتىنى تۋرالى ايتىلدى.
ءماجىلىس حابارىنا سۇيەنسەك, «نەكە (ەرلى-زايىپتىلىق) جانە وتباسى تۋرالى» كودەكسكە وزگەرىستەر مەن تولىقتىرۋلار ەنگىزىلەدى. وعان سايكەس قازاقستاندا جەتىم بالالار مەن اتا-اناسىنىڭ قامقورلىعىنسىز قالعان بالالارعا ارنالعان ۇيىمدار بالالاردى قابىلداۋ فاكتىلەرى تۋرالى قورعانشىلىق نەمەسە قامقورشىلىق ورگاندارىنا جانە پروكۋراتۋراعا حابارلاۋعا مىندەتتى. اكىمشىلىك قۇقىقبۇزۋشىلىق تۋرالى كودەكستە جاڭا تۋعان نارەستەنى تاستاپ كەتۋ فاكتىسى تۋرالى حابارلاماعان مەديتسينالىق ۇيىمدار مەن جەتىم جانە اتا-اناسىنىڭ قامقورلىعىنسىز قالعان بالالارعا ارنالعان ۇيىمداردىڭ لاۋازىمدى تۇلعالارىنا جاۋاپكەرشىلىك قاراستىرىلادى. بۇل رەتتە بالانىڭ قۇقىقتارىن قورعاۋ سالاسىنداعى ۋاكىلەتتى ورگاننىڭ مۇنداي ىستەردى قاراۋ قۇزىرەتى ايقىندالادى.
