بۇگىن, 12 ماۋسىم – دۇنيەجۇزىلىك بالالار ەڭبەگىنە قارسى كۇرەس كۇنى. بۇل كۇن بۇكىل الەمدە وقۋدىڭ ورنىنا جۇمىس ىستەۋگە ءماجبۇر بولعان ميلليونداعان بالالارعا نازار اۋدارۋدى ماقسات ەتەدى, دەپ حابارلايدى astana-akshamy.kz.
بۇۇ مالىمەتى بويىنشا 160 ميلليون بالا ەڭبەككە تارتىلعان. بۇل – الەمدەگى ءاربىر ونىنشى بالا جۇمىس ىستەيدى دەگەندى كورسەتەدى.
بيىل بالالار ەڭبەگىنە قارسى كۇرەس كۇنى – بالالار ەڭبەگىنىڭ ەڭ ناشار تۇرلەرىنە تىيىم سالۋ جانە جويۋ جونىندەگى شۇعىل شارالار تۋرالى كونۆەنتسيانىڭ قابىلدانعانىنا 25 جىل تولۋىنا ارنالدى.
ايتا كەتەيىك, قازاقستان بۇل كونۆەنتسيانى 2002 جىلى راتيفيكاتسيالاعان, سونداي-اق جۇمىسقا ورنالاسۋ ءۇشىن ەڭ تومەنگى جاس تۋرالى كونۆەنتسيا دا قابىلدانعان بولاتىن.
وسىعان قاراماستان, جاسوسپىرىمدەردى زاڭسىز جۇمىسقا تارتۋ فاكتىلەرى ءالى دە ورىن الۋدا. سوندىقتان بۇعان قارسى جۇيەلى, سالماقتى كۇرەس جۇرگىزۋ قاجەت. بالالار ەڭبەگى جەتكىنشەكتەرىمىزدى قۇقىعىنان ايىرادى جانە ولاردىڭ بولاشاعىنا قاۋىپ توندىرەدى.
بالالار ەڭبەگىن جويۋ جونىندەگى جۇمىس بىرلەسكەن كۇش-جىگەردى قاجەت ەتەدى ءارى ءبىلىم بەرۋ مەن الەۋمەتتىك قىزمەتتەردەن باستاپ قۇقىق قورعاۋ ۇيىمدارىنا دەيىنگى بارلىق دەڭگەيدە جۇرگىزىلۋى كەرەك.
ولاردىڭ قاۋىپتى جۇمىس ورىندارىندا جۇمىس جاساۋىنا جول بەرمەۋ جانە قاۋىپسىز مەكتەپتەر مەن ساپالى ءبىلىم بەرۋدى قامتاماسىز ەتۋ ءۇشىن ءالى دە ءبىراز جۇمىس ىستەۋ قاجەت. ال بالا ەڭبەك جاسىنا جەتكەن جاعدايدا, وعان قاۋىپسىز ەڭبەك جاعدايلارىن جاساۋ ءبىزدىڭ پارىزىمىز.
ءبىز بىرگە بۇل ماسەلەنىڭ الدىن الامىز. ەگەر ءسىزدىڭ اينالاڭىزدا دەنساۋلىعىنا, قاۋىپسىزدىگىنە نەمەسە مورالدىق قاسيەتتەرىنە قاۋىپ تونگەن بالالار بولسا, قۇزىرلى ورگاندارعا حابارلاڭىز, بەي-جاي قاراپ قالماڭىز. قاۋىپسىز, باقىتتى بولاشاقتى, بالالىق شاقتى بىرگە جاسايىق!
