ۇلت ساۋلىعى جولىندا ايانباي ەڭبەك ەتىپ, اينالاسىنداعىلاردىڭ العىسىن ارقالاپ جۇرگەن اق حالاتتى ابزال جاندار ارامىزدا از ەمەس. سولاردىڭ ءبىرى – دەنساۋلىق ساقتاۋ سالاسىندا 30 جىلدان استام ۋاقىت قىزمەت اتقارىپ, ادال ەڭبەگىمەن ابىروي بيىگىنەن كورىنگەن استانالىق دارىگەر, قازاقستان رەسپۋبليكاسى دەنساۋلىق ساقتاۋ ءىسىنىڭ ۇزدىگى, №7 قالالىق ەمحانا ديرەكتورى ايگۇل قۋانىشەۆا.
قاراعاندى قالاسىنىڭ مەملەكەتتىك مەديتسينا ينستيتۋتىن بىتىرگەننەن كەيىن ەكى جىلداي سول جەردە دارىگەر بولىپ ەڭبەك ەتىپ, 1990 جىلى اقمولا قالاسىنداعى №6 قالالىق ەمحاناعا دارىگەر-تەراپەۆت بولىپ جۇمىسقا ورنالاسقان ايگۇل شالابايقىزىنىڭ بارلىق ەڭبەك جولى وسى قالامەن تىعىز بايلانىستى. ءبىراز تاجىريبە جيناقتاعاننان كەيىن تەراپيا بولىمشەسىنىڭ مەڭگەرۋشىسى, ودان سوڭ سول ەمحانا باس دارىگەرىنىڭ ەمدەۋ-پروفيلاكتيكا جۇمىسى بويىنشا ورىنباسارى قىزمەتىن اتقارادى.
2007 جىلى قالادا №7 ەمحانانىڭ ەكى عيماراتى پايدالانۋعا بەرىلىپ, ەمدەۋ مەكەمەسىن باسقارۋ ا.قۋانىشەۆاعا سەنىپ تاپسىرىلادى. سودان بەرى ول الدىمەن ءوز قىزمەتكەرلەرىنىڭ كوممۋنيكاتيۆتى ءبىلىمىن جەتىلدىرۋ باعىتىندا وقىتۋ جۇمىسىن قولعا الىپ, سىرقاتتارعا ساپالى مەديتسينالىق قىزمەت كورسەتۋ جولىندا ايانباي تەر توگىپ كەلەدى.
– قازىرگى كەزدە ەمحانادا ەم الۋشىلار كوپ: قىزمەت كورسەتۋ راديۋسى 30 كيلومەتردى قۇرايدى جانە جاقىن ماڭداعى قالالىق اۋماقتاردان باسقا, ينتەرناتسيونال, ميچۋرين, كۇيگەنجار كەنتتەرىنىڭ تۇرعىن الاپتارىن قامتيدى. مۇندا تەراپەۆتىك جانە پەدياتريالىق بولىمشەلەر جۇمىس ىستەيدى, ال كەنتتىك اۋماقتارعا جالپى پراكتيكا دارىگەرلەرىنىڭ بولىمشەسى قىزمەت كورسەتەدى. مامانداندىرىلعان مەديتسينالىق كومەكتىڭ ەكى بولىمشەسىندە اكۋشەرلىك-گينەكولوگيالىق, حيرۋرگيالىق بولىمشەلەر بار. وندا زاماناۋي دياگنوستيكالىق, ەمدىك, پروفيلاكتيكالىق جانە مەديتسينالىق-الەۋمەتتىك تەحنولوگيالار نەگىزىندە ەمحاناعا تىركەلگەن تۇرعىندارعا ساپالى مەديتسينالىق كومەك كورسەتىلۋدە, – دەدى ديرەكتور.
ۋاقىتپەن ساناسپاي دەنساۋلىق كۇزەتىندە ءجۇرىپ, دەرتىنە شيپا ىزدەپ كەلگەن ناۋقاستاردى اۋرۋىنان ايىقتىرىپ, حالىقتىڭ العىسىن ارقالاپ كەلە جاتقان مارتەبەلى ماماندىق يەسى ءبىرىنشى بايلىق – دەنساۋلىققا اركىم جاسىنان ەرەكشە قامقورلىق تانىتسا, سالاۋاتتى ءومىر سالتىن ۇستانسا دەگەن تىلەگىن جەتكىزدى.
– نەگىزى, «اۋىرىپ ەم ىزدەگەنشە, اۋىرماۋدىڭ جولىن ىزدەگەن» جاقسى. بۇل رەتتە كەز كەلگەن ادام دارىگەرلەردىڭ ايتقانىن مۇقيات تىڭداپ, مەملەكەت تاراپىنان بەرىلگەن تەگىن ءدارى-دارمەكتى ۋاقىتىلى ءىشىپ, پروفيلاكتيكالىق-سكرينينگتىك تەكسەرۋدەن ۋاقىتىلى ءوتىپ تۇرسا, اركىم ءوز دەنساۋلىعىنا جاناشىرلىقپەن قاراپ, باستى بايلىعىن ەرەكشە كۇتسە, ەلىمىزدە اۋرۋلار سانى اناعۇرلىم ازايار ەدى. ال قاتەرلى ىسىكتى ەرتە ساتىسىندا انىقتاعان جاعدايدا سىرقاتتان قۇلان-تازا ايىعىپ كەتۋگە ءاربىر ناۋقاستىڭ تولىق مۇمكىندىگى بار, ول ءۇشىن ايماقتىق دارىگەرگە جىل سايىن قارالىپ, سكرينينگتىك تەكسەرۋلەردەن ءوتۋدى ادەتكە اينالدىرۋ قاجەت. سوندىقتان ءاربىر تۇرعىن اۋرۋدى اسقىندىرماي, ەرتە انىقتاۋعا اتسالىسۋى كەرەك, – دەدى ايگۇل قۋانىشەۆا.
بۇگىندە ول – جوعارى ساناتتى دارىگەر-ۇيىمداستىرۋشى, جوعارى ساناتتى دارىگەر-تەراپەۆت قانا ەمەس, قازاقستان رەسپۋبليكاسى دەنساۋلىق ساقتاۋ ءىسىنىڭ ۇزدىگى, «شاپاعات» مەدالىنىڭ, استانا قالاسىنىڭ 10 جانە 20 جىلدىعىنا ارنالعان مەرەيتويلىق مەدالداردىڭ يەگەرى. قر پرەزيدەنتى مەن استانا قالاسى اكىمىنىڭ العىس حاتىمەن بىرنەشە مارتە ماراپاتتالعان.
