Business.enbek.kz پورتالىندا 15 شىلدەدەن باستاپ 2-لەك بويىنشا بيزنەس-يدەيالاردى ىسكە اسىرۋ ءۇشىن گرانتتار الۋعا وتىنىمدەر قابىلداۋ باستالادى, دەپ حابارلايدى astana-akshamy.kz
گرانتتار قايتارىمسىز نەگىزدە بەرىلەدى, نىسانالى ماقساتى جاڭا بيزنەستى باستاۋ جانە دامىتۋ بولىپ تابىلادى.
گرانت كولەمى 400 اەك (1 476 800 تەڭگە). ءار قاتىسۋشى ونى تەك ءبىر رەت الا الادى.
گرانت قاراجاتى ءىسىن جاڭا باستاعان كاسىپكەرلەرگە وزدەرىنىڭ بيزنەس-الەۋەتىن اشۋعا, ءوندىرىستى جولعا قويۋعا جانە دامىتۋعا, سول ارقىلى ءوزىن تۇراقتى تابىسپەن قامتاماسىز ەتۋگە مۇمكىندىك بەرەدى.
ءوتىنىم بەرۋ ءۇشىن قاجەت:
– پورتالدا تىركەلۋ;
– گرانت الۋ شارتتارىنا سايكەستىگىنە تەكسەرۋدەن ءوتۋ;
– بيزنەس-جوسپار ۇلگىسىن جۇكتەپ الىپ, ونى تولتىرۋ جانە پورتالعا ەنگىزۋ;
– ءوتىنىش نىسانىن تولتىرۋ جانە ەتسق كىلتىمەن قول قويۋ.
ينتەرنەتكە نەمەسە كومپيۋتەرگە قولجەتىمدىلىك بولماعان جاعدايدا, مانساپ ورتالىقتارىنىڭ وزىنە-ءوزى قىزمەت كورسەتۋ ايماقتارىندا, حالىققا قىزمەت كورسەتۋ ورتالىقتارىندا ءوتىنىم بەرۋگە بولادى.
گرانت الۋ ءۇشىن بىرقاتار شارتتاردى ساقتاۋ قاجەت.
جاڭا بيزنەس-يدەيانى ىسكە اسىرۋعا گرانت الۋعا ۇمىتكەر بولا الادى:
– تىركەلگەن جۇمىسسىزدار;
– جەكە كاسىپكەرلەر (تىركەۋ مەرزىمى 3 جىلعا دەيىن).
بۇل رەتتە ۇمىتكەر تومەندەگى الەۋمەتتىك ساناتتاردىڭ بىرىنەن بولۋ كەرەك:
– مۇگەدەكتىگى بار ادامدار;
– قولدانىستاعى «كانداس» مارتەبەسى بار ادامدار;
– وڭىرارالىق قونىس اۋدارۋشىلار
– از قامتىلعان وتباسى مۇشەلەرى;
– كوپبالالى وتباسى مۇشەسى (جۇبايى / زايىبى);
– مۇگەدەكتىگى بار بالانى تاربيەلەپ وتىرعان ادام (جۇبايى / زايىبى);
– اسىراۋشىسىنان ايىرىلۋ بويىنشا جاردەماقى الۋشىلار.
ۇمىتكەردىڭ «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋ تۋرالى 3 جىلدان اسپايتىن مەرزىمگە سەرتيفيكاتى بولۋى ءتيىس.
راسىمدەردىڭ اشىقتىعىن قامتاماسىز ەتۋ, ادامي فاكتوردى ازايتۋ, ءوتىنىش بەرۋشىلەرگە ىڭعايلى بولۋ ءۇشىن گرانتتار بەرۋدىڭ بۇكىل پروتسەسى ەلەكتروندىق فورماتقا اۋىستىرىلدى. گرانت الۋعا وتىنىمدەردى قابىلداۋ بىرىڭعاي تەرەزە – «Business.enbek.kz» پورتالى ارقىلى جۇزەگە اسىرىلادى.
گرانتتى: قاجەتتى قۇرال-سايمانداردى, ەڭبەك قۇرالدارىن, تەحنولوگيالىق جابدىقتاردى, مالداردى, جانۋارلاردى, قۇستاردى, كوشەتتەردى, بۇتالاردى, تۇقىمداردى ساتىپ الۋعا, ورىن-جايلاردى جالعا الۋ اقىسىن تولەۋگە الۋعا بولادى.
گرانتتار: تۇتىنۋشىلىق ماقساتتارعا, كرەديتتىك قارىزداردى وتەۋگە, جىلجىمايتىن تۇرعىن ءۇي ساتىپ الۋعا جانە سالۋعا, جەر ۋچاسكەلەرىن ساتىپ الۋعا, اكتسيزدەلەتىن ونىمدەر وندىرۋگە بەرىلمەيدى.
گرانتتاردى ەڭبەك موبيلدىلىگى ورتالىقتارى گرانت الۋعا ۇمىتكەرلەردىڭ وتىنىشتەرىن قاراۋ جونىندەگى اۋداندىق/قالالىق كوميسسيانىڭ شەشىمى نەگىزىندە بەرەدى.
ۇمىتكەرلەر ءوز بيزنەس-جوباسىن كوميسسيا وتىرىستارىندا تانىستىرادى. بۇل رەتتە كوميسسيانىڭ ءاربىر مۇشەسى بيزنەس-جوسپاردى باعالايدى جانە باعالاۋ پاراعىن مىناداي ولشەمشارتتار بويىنشا تولتىرادى: بيزنەس-يدەيانىڭ باسەكەگە قابىلەتتىلىگى, وتكىزۋ نارىقتارىنىڭ پىسىقتالۋى, بيزنەس-جوبانىڭ قارجىلىق ومىرشەڭدىگى, كاسىپكەرلىك داعدىلاردىڭ دەڭگەيى, جاڭا جۇمىس ورىندارىن قۇرۋ.
وسىلايشا, گرانت بەرۋ تۋرالى شەشىم كوميسسيالىق تۇردە جانە ۇمىتكەرلەردىڭ بيزنەس-جوبالارىنىڭ پىسىقتالۋىن باعالاۋدىڭ ناقتى ولشەمشارتتارى نەگىزىندە قابىلدانادى.
كوميسسيا شەشىمى ۇمىتكەردىڭ پورتالداعى جەكە كابينەتىنە جىبەرىلەدى. كوميسسيانىڭ وڭ شەشىمى بولعان جاعدايدا ۇمىتكەر بانك دەرەكتەمەلەرىن ۇسىنادى, شارتقا قول قويادى جانە ودان ءارى توقسان سايىن قاراجاتتىڭ پايدالانىلۋى تۋرالى ەسەپ بەرەدى. مۇنىڭ ءبارى ەڭبەك موبيلدىلىگى ورتالىقتارى مەن ونىڭ فيليالدارىنا (مانساپ ورتالىقتارىنا) بارماي-اق, ەلەكتروندىق فورماتتا جاسالادى.
