قازاقستاندا ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى جونىندەگى جاڭا زاڭ كۇشىنە ەنبەك. وسىعان وراي تەكسەرۋ نىسانىن الدىن الا ەسكەرتپەستەن بالالار ورنالاسقان بارلىق نىساندارعا جوسپاردان تىس تەكسەرۋلەر جۇرگىزۋ مۇمكىندىگى ەنگىزىلەدى. سونىمەن قاتار ەلىمىزدە 15 وڭىردە پسيحولوگيالىق قولداۋ ورتالىقتارى اشىلدى. بۇل تۋرالى قر وام بالالاردىڭ قۇقىقتارىن قورعاۋ كوميتەتى توراعاسىنىڭ ورىنباسارى يۋليا وۆەچكينا اتاپ ءوتتى, دەپ حابارلايدى astana-akshamy.kz.
سپيكەردىڭ ايتۋىنشا, اتالعان ورتالىقتارعا الدىن الۋ جانە كومەك كورسەتۋ فۋنكتسيالارى جۇكتەلەدى. زاڭمەن اكىمدەردىڭ ورتالىقتاردى اشۋ قۇزىرەتى بەكىتىلگەن. ەلىمىزدىڭ ءار وڭىرىندە پسيحولوگيالىق قولداۋ ورتالىعىن اشۋ بويىنشا جۇمىس مەملەكەت باسشىسىنىڭ تاپسىرماسى بويىنشا جۇرگىزىلۋدە. ورتالىقتار ءوڭىردىڭ پسيحولوگيالىق كومەگى مەن پسيحولوگيالىق قىزمەتتەرىن ۇيلەستىرۋدىڭ وڭىرلىك حابىنا اينالادى. مۇنداي ورتالىقتار استانا قالاسىندا دا اشىلۋدا.
يۋ. وۆەچكينا سونىمەن قاتار «بالا قۇقىقتارى تۋرالى» زاڭنىڭ جەكە تاراۋى بالا قۇقىقتارى جونىندەگى وڭىرلىك ۋاكىلدەردىڭ فۋنكتسيالارىن زاڭنامالىق تۇرعىدان بەكىتۋگە ارنالعانىن جەتكىزدى.
-قازىرگى تاڭدا ەلىمىزدىڭ 20 وڭىرىندە وڭىرلىك ۋاكىلدەر جۇمىس ىستەيدى. بىراق زاڭنىڭ نەگىزىندە ولاردىڭ بالا قۇقىقتارى جونىندەگى باس ۋاكىلدىڭ زاڭنامالىق فۋنكتسيالارىنا ۇقساس زاڭنامالىق فۋنكتسيالارى بەكىتىلەدى, – دەپ تولىقتىردى ءسوزىن سپيكەر.
