سوت-ساراپتاماسىنىڭ «سوت-سەكسولوگيالىق ساراپتاما» دەگەن جاڭا ءتۇرى ەنگىزىلمەك

ەلىمىزدە سوت-ساراپتاماسىنىڭ «سوت-سەكسولوگيالىق ساراپتاما» دەگەن جاڭا ءتۇرى ەنگىزىلەتىن بولادى, دەپ حابارلايدى astana-akshamy.kz

وسى ماقساتتا استانا قالاسىنىڭ سوت ساراپتامالارى عىلىمي-پراكتيكالىق ورتالىعىنىڭ 3 سوت ساراپشىسى بەلارۋس رەسپۋبليكاسىندا وقۋدان ءوتتى. قازىرگى ۋاقىتتا «سوت-سەكسولوگيالىق ساراپتاما» ءتۇرى بويىنشا ادىستەمە ازىرلەنۋدە.

بۇل تۋرالى ادىلەت مينيسترلىگىنىڭ رەسمي وكىلى تالعات ءۋالي بۇگىن وتكەن كەزەكتى ءباسپاسوز ماسليحاتىندا حابارلادى.

ءوز بايانداماسىندا ول ادىلەت ورگاندارى تاراپىنان اتقارىپ جاتقان جۇمىستارمەن تانىستىردى. سونىڭ ىشىندە زياتكەرلىك مەنشىك جانە ونى تىركەۋ, سەلەكتسيالىق جەتىستىكتەر, مارراكەش شارتىن راتيفيكاتسيالاۋ تۋرالى زاڭ جوباسى, جاڭادان پاتەنتتەلگەن ونەرتابىستار تۋرالى ايتتى. ودان بولەك, سوت-ساراپتاما قىزمەتىنە قاتىستى, سينتەتيكالىق ەسىرتكىلەمەن كۇرەس تۋرالى, اليمەنت ءوندىرىپ الۋ جونىندەگى قىزمەت جايلى, تسيفرلاندىرۋ, ونىڭ ىشىندە نوتارياتتىق قىزمەت بويىنشا ءساتتى ىسكە اسىرىلعان «تسيفرلىق نوتاريات» جوباسىنا توقتالدى. مەملەكەتتىڭ مۇلىكتىك قۇقىقتارىن قورعاۋ تۋرالى, الاياقتىق فاكتىلەر بويىنشا اقپاراتتارمەن ءبولىستى.

«ەلىمىزدە سوت-ساراپتاماسىنىڭ «سوت-سەكسولوگيالىق ساراپتاما» دەگەن جاڭا ءتۇرى ەنگىزىلەتىن بولادى. حالىقارالىق تاجىريبەنى تالداي كەلە سوڭعى كەزدەرى سەكسۋالدىق سيپاتتاعى قىلمىستار سانىنىڭ ارتۋىنا بايلانىستى ادىلەت مينيسترلىگى زەرتتەۋدىڭ جاڭا ءتۇرى «سوت-سەكسولوگيالىق ساراپتامانى» ەنگىزۋ بويىنشا جۇمىستاردى باستادى. ياعني قاراپايىم تىلمەن ايتقاندا ساراپتاما تەكسەرىلۋشىنىڭ جىنىستىق/پسيحوسەكسۋالدىق دامۋدا قانداي دا ءبىر اۋىتقۋلاردىڭ بار نەمەسە جوقتىعى, اۋىتقۋلار بايقالسا, ولار نە بىلدىرەدى؟, پەدوفيلدەردى انىقتاۋ, تەكسەرىلۋشىگە حيميالىق كاستراتسيا قاجەت پە جوق پا دەگەن سۇراقتارعا جاۋاپ بەرەدى. وسى جوبانى ىسكە اسىرۋ ماقساتىندا استانا قالاسىنىڭ سوت ساراپتامالارى عىلىمي-پراكتيكالىق ورتالىعىنىڭ 3 سوت ساراپشىسى بەلارۋس رەسپۋبليكاسىندا وقۋدان ءوتتى. قازىرگى ۋاقىتتا «سوت-سەكسولوگيالىق ساراپتاما» ءتۇرى بويىنشا ادىستەمە ازىرلەنۋدە», – دەدى ول.

ونىڭ ايتۋىنشا, 2024 جىلعى 1 قاڭتاردان باستاپ سينتەتيكالىق ەسىرتكىلەردى انىقتاۋ بويىنشا ساراپتاما جۇرگىزۋ مەرزىمدەرىن كەزەڭ-كەزەڭىمەن 30-دان 5 تاۋلىككە دەيىن تومەندەتۋ كوزدەلگەن. سينتەتيكالىق ەسىرتكىلەردى ساراپتاۋ سۇرانىسى جىلدان جىلعا وسىمدىك تەكتەس ەسىرتكىلەردى ساراپتاۋدان سانىنان ارتىپ كەلەدى. بۇل ساراپتامانى وتكىزۋ ءۇشىن زاماناۋي جوعارى تەحنولوگيالىق جابدىقتار مەن ادىستەردى قولدانۋ قاجەت. وسى ماقساتتا سوت ساراپتاماسى ورگاندارىنا بيىلعى جىلدىڭ 1 قاڭتارىنان باستاپ قازىرگى ۋاقىتقا دەيىن 900-دەن استام ساراپتاما تاعايىندالدى, ونىڭ 80% – دان استامى 5 تاۋلىككە دەيىنگى مەرزىمىندە ورىندالدى. بۇل كورسەتكىشتەرگە قول جەتكىزۋگە قازىرگى زامانعى ەسىرتكىنىڭ بارلىق تۇرلەرىن, سونىڭ ىشىندە سينتەتيكالىق پرەپاراتتاردى انىقتاۋعا مۇمكىندىك بەرەتىن جوعارى ءتيىمدى جابدىقتى ساتىپ الۋ ارقىلى مۇمكىن بولدى.

«2023 جىلدىڭ سوڭىندا سوت ساراپتامالارى عىلىمي-پراكتيكالىق ورتالىعى بيولوگيالىق ورتادا ەسىرتكى جانە پسيحوتروپتىق زاتتاردىڭ بارىن انىقتاۋعا باعىتتالعان ساراپتامالىق زەرتتەۋلەر جۇرگىزۋ ءۇشىن زاماناۋي جوعارى سەزىمتال اپپارات ساتىپ الىندى. قازاقستان رەسپۋبليكاسىندا بۇل پسيحواكتيۆتى زاتتاردىڭ, ونىڭ ىشىندە بيولوگيالىق ورتاداعى سينتەتيكالىق جانە ديزاينەرلىك پرەپاراتتاردىڭ بارلىق سپەكترىن انىقتاۋعا مۇمكىندىگى بار جالعىز زەرتحانا.

2024 جىلعا زەرتحانالىق جابدىقتى ساتىپ الۋ ءۇشىن رەسپۋبليكالىق بيۋدجەت قاراجاتى ەسەبىنەن 3 ملرد 996 ملن 126 مىڭ تەڭگە ءبولىندى. جابدىقتى جەتكىزۋ اعىمداعى جىلدىڭ سوڭىنا دەيىن جۇزەگە اسىرىلادى. اتالعان جابدىقتاردان ەكى رەنتگەن-فلۋورەستسەنتتى سپەكترومەتر جەتكىزىلدى (قاراعاندى وبلىسى جانە استانا قالاسى بويىنشا سوت ساراپتامالارى ينستيتۋتتارىنا). سونىمەن قاتار, ادىلەت مينيسترلىگىنىڭ ءوز قاراجاتى ەسەبىنەن ەسىركى قۇرالدارى مەن پسيحوتروپتى زاتتاردى ساپالى جانە ساندى زەرتتەۋ ماقساتىندا 8 گاز حروماتوگرافى ساتىپ الىندى. وسى باعىتتاعى جۇمىستار جالعاساتىن بولادى», – دەدى تالعات ءۋالي.

سونداي-اق, رەسمي وكىل ادىلەت مينيسترلىگى ادىلەت ورگاندارى سالالارىن تسيفرلاندىرۋ ماسەلەلەرىنە ەرەكشە نازار اۋدارىپ وتىرعانىن جەتكىزدى. مۇنداعى ءبىرىنشى جوبا – «جىلجىمايتىن مۇلىك وبەكتىلەرى بويىنشا مامىلەلەردى ونلاين جاساۋ».

«ەندى قازاقستاندىقتار تۇرعىن ءۇيدى حالىققا قىزمەت كورسەتۋ ورتالىعىنا جانە نوتاريۋسقا بارماستان ونلاين-رەجيمدە ساتىپ الىپ, ساتا الادى. مامىلەنىڭ ناتيجەسى 8 ساعاتتان اسپاي كەلەدى, ال تىركەۋ – نەبارى 10 مينۋتتى قۇرايدى. ادىلەت مينيسترلىگى Freedom بانكپەن بىرلەسىپ جىلجىمايتىن مۇلىكتى ونلاين قايتا تىركەۋ بويىنشا پيلوتتىق جوبانى ىسكە قوستى. جىلجىمايتىن مۇلىك وبەكتىسىنىڭ ورنالاسقان جەرىنە قاراماستان مەملەكەتتىك تىركەۋگە قۇجاتتاردى تاپسىرۋ مۇمكىندىگى پايدا بولدى», – دەيدى ول.

سونداي-اق, ونىڭ ايتۋىنشا, جىلجىمايتىن مۇلىككە قۇقىقتار 2015 جىلدان باستاپ ەلەكتروندىق فورماتتا رەسىمدەلۋى ءتيىس. ايتا كەتەتىن جايت, العاشقى كەزەڭدە ساتىپ الىناتىن تۇرعىن ءۇيدىڭ ەڭ جوعارى قۇنى 50 ميلليون تەڭگەنى قۇرايدى جانە پيلوتتىق جوبا استانا, الماتى قالالارىندا ىسكە اسىرىلۋدا. كەيىن وسى سەرۆيسكە قازاقستاننىڭ باسقا دا وڭىرلەرىن قوسۋ جانە تۇرعىن ءۇيدىڭ قۇنىن ودان ءارى كوبەيتۋ بويىنشا جۇمىستاردى جۇرگىزۋ جوسپارلانۋدا.

سۋرەت: Zakon.kz