قر قارۋلى كۇشتەرىندە اۋە شابۋىلىنا قارسى قورعانىس اسكەرلەرىنىڭ قۇرىلعان كۇنى اتاپ وتىلەدى, دەپ حابارلايدى astana-akshamy.kz.
بۇل اسكەر تەگى قورعانىس ءمينيسترىنىڭ 1992 جىلعى 19 ماۋسىمداعى ديرەكتيۆاسى نەگىزىندە قۇرىلعان بولاتىن. سول تۇستا اسكەرلەردىڭ قۇرامىنا قازاقستان اۋماعىندا ورنالاسقان 37-ءشى اۋە شابۋىلىنا قارسى قورعانىس كورپۋسىنىڭ زەنيتتىك, زىمىران, راديوتەحنيكا جانە اۆياتسيا بولىمدەرى, سونداي-اق اۋە ايلاقتىق-تەحنيكالىق بولىمشەلەرى, بايلانىس جانە راديوتەحنيكالىق قامتاماسىز ەتۋ باتالونى كىردى.
اۋە شابۋىلىنا قارسى قورعانىس اسكەرلەرىنىڭ قالىپتاسۋىنىڭ باسى-قاسىندا ءار جىلدارى حالىق قاھارمانى ارميا گەنەرالى مۇحتار التىنباەۆ, اۆياتسيا گەنەرال-مايورى اناتولي ۆاسيموۆ, گەنەرال-مايور ۆلاديمير بوندارەنكو, گەنەرال-لەيتەنانت وقاس ساپاروۆ, گەنەرال-مايور نۇرجان مۇقانوۆ جانە باسقا دا اسكەريلەر تۇردى. 1998 جىلى اۋە قورعانىسى اسكەرلەرى اۋە قورعانىسى كۇشتەرىنىڭ قۇرامىنا كىردى.
قازىرگى ۋاقىتتا بۇل اسكەر تەگى اۋە شابۋىلىنا قارسى قورعانىس اسكەرلەرىنىڭ كوماندالىق پۋنكتى, قۇرامىنا زەنيتتىك-زىمىراندىق جانە راديوتەحنيكالىق بولىمشەلەرى كىرەتىن اۋە شابۋىلىنا قارسى قورعانىس بريگادالارىنان تۇرادى.
اۋە شابۋىلىنا قارسى قورعانىس اسكەرلەرى ەلىمىزدىڭ اكىمشىلىك-ساياسي, ونەركاسىپتىك-ەكونوميكالىق ورتالىقتارىن اۋەدەن قورعاۋدان بولەك, اۋە كەڭىستىگىن پايدالانۋ ءتارتىبىنىڭ ساقتالۋىن باقىلاپ, اۋە قارسىلاسىنا قارسى كۇرەس جۇرگىزەدى. سونىمەن قاتار قۇرلىق اسكەرلەرىنىڭ توپتارىن, ماڭىزدى اسكەري جانە باسقا دا وبەكتىلەردى قارسىلاستىڭ اۆياتسيالىق جانە ۇشقىشسىز ۇشۋ قۇرالدارىنىڭ سوققىلارىنان قورعاۋدى جۇزەگە اسىرادى.
بەيبىت ۋاقىتتا اۋە شابۋىلىنا قارسى قورعانىس اسكەرلەرى اۋە كەڭىستىگىن پايدالانۋ ءتارتىبىنىڭ ساقتالۋىن ۇزدىكسىز باقىلاۋدى جۇزەگە اسىرا وتىرىپ, تاۋلىك بويى جاۋىنگەرلىك كەزەكشىلىك اتقارادى.
بۇگىنگى كۇنى اۋە شابۋىلىنا قارسى قورعانىس اسكەرلەرى قارسىلاستىڭ زاماناۋي اۋەدەن شابۋىلداۋ قۇرالدارىن بارلىق ۇشۋ بيىكتىكتەرى مەن جىلدامدىقتارى دياپازونىندا دەر كەزىندە انىقتاپ, ولارعا سوققى بەرە الاتىن زەنيتتىك-زىمىراندىق كەشەندەرمەن جانە بارلاۋ قۇرالدارىمەن تولىقتاي جاراقتانعان.
اسكەرلەردى جوعارى تەحنولوگيالىق قارۋ-جاراقپەن جانە تەحنيكامەن جاراقتاندىرۋ جوسپارلى تۇردە جالعاسۋدا. اۋە شابۋىلىنا قارسى قورعانىس اسكەرلەرىنە جاڭعىرتىلعان س-300 زەنيتتىك-زىمىران كەشەندەرى, قازىرگى زامانعى GM-403 «نۇر» جانە قازاقستاننىڭ بارلىق اۋە كەڭىستىگىن باقىلاۋعا مۇمكىندىك بەرەتىن «روسا» راديولوكاتسيالىق ستانتسيالارى, سونداي-اق ورتاشا قاشىقتىقتاعى «بۋك-م2ە» جانە قىسقا قاشىقتىقتاعى «تور-م» جاڭا زەنيتتىك-زىمىران كەشەندەرى جەتكىزىلدى.
بۇگىندە اۋە شابۋىلىنا قورعانىس اسكەرلەرى ءۇشىن جوعارى كاسىبي وفيتسەرلىك كادرلاردى دايىنداۋدى الماتى قالاسىندا ورنالاسقان راديوەلەكترونيكا جانە بايلانىس اسكەري-ينجەنەرلىك ينستيتۋتى جۇزەگە اسىرادى. اسكەري جوعارى وقۋ ورنىندا جاتتىعۋ كەشەندەرى, تەحنيكاسى جانە قارۋ-جاراعى بار جەكە پوليگون, سونداي-اق بارلىق قاجەتتى وقۋ-ماتەريالدىق بازا قالىپتاسقان.
اۋە شابۋىلىنا قارسى قورعانىس اسكەرلەرىنىڭ ماماندارى وزدەرىنىڭ جوعارى شەبەرلىكتەرىن تمد اۋە قورعانىسىنىڭ بىرىككەن جۇيەسىندەگى «جاۋىنگەرلىك دوستاستىق» جانە «اشىق اسپان» حالىقارالىق وقۋ-جاتتىعۋلارى بارىسىندا بىرنەشە رەت دالەلدەدى.
