2024 جىل تاۋەلسىز مەملەكەتتەر دوستاستىعى ەلدەرىندە ۆولونتەرلىك قوزعالىس جىلى بولىپ جاريالاندى. بۇل باستامانى قازاقستان پرەزيدەنتى ۇسىنعان ەدى. قاسىم-جومارت توقاەۆتىڭ ىزگى نيەتىنە تمد باسشىلارى تۇگەلدەي قولداۋ ءبىلدىردى. وسىلايشا, بيىل ەرىكتىلەردىڭ قايىرىمدىلىق, مەيىرىمدىلىك, ءوزارا كومەكتەسۋ ءىس-شارالارى حالىقارالىق دەڭگەيگە ۇلاساتىن بولادى.
ادال نيەتى جانە وتانسۇيگىشتىك قاسيەتىمەن وزگەگە قول ۇشىن سوزۋ, توتەنشە جاعداي كەزىندە الدىڭعى قاتاردان تابىلۋ, حالىققا گۋمانيتارلىق كومەك ۇيلەستىرۋ, قاراۋسىز قالعان جانۋارلارعا پانا تابۋعا جاردەمدەسۋ سەكىلدى ءىستىڭ باسى-قاسىندا جۇرەتىندەر – ۆولونتەرلەر. ەسەپپەن ەمەس, قوعامعا الەۋەتى جەتكەنشە كومەكتەسكەندەردىڭ ەڭبەگى ەسكەرىلىپ, نازاردان تىس قالعان ەمەس. سەبەبى 2024 جىل تمد ەلدەرىندە ۆولونتەرلىك قوزعالىس جىلى دەپ جاريالاندى.
اتالمىش باستامانى مەملەكەت باسشىسى قاسىم-جومارت توقاەۆ بىلتىر بىشكەكتەگى دوستاستىق مەملەكەتتەر باسشىلارىنىڭ كەڭەس وتىرىسىندا قۇپتادى. پرەزيدەنت ءوز سوزىندە ەرىكتىلەردىڭ ىزگى امالدارى قوعامدا تىلەۋلەستىك, مەيىرىمدىلىك جانە جاناشىرلىق قاسيەتتەرىنىڭ تەرەڭ تامىر جايۋىنا ەلەۋلى ۇلەس قوساتىنىن, سونداي-اق مۇنداي ادامگەرشىلىك تالپىنىستارعا جان-جاقتى قولداۋ كورسەتۋ ماڭىزدى ەكەنىن اتاپ ءوتتى. ودان بولەك, دوستاستىق ەلدەرى ەرىكتىلەرىنىڭ جىل سايىنعى فورۋمىن وتكىزۋدى جانە وعان تمد-نىڭ تۇراقتى الاڭى مارتەبەسىن بەرۋدى ۇسىندى. كەيىن تمد ەلدەرىنىڭ ۇكىمەت باسشىلارى ماسكەۋدە باس قوسىپ, ءىس-شارالار جوسپارىن بەلگىلەدى.
«بۇگىندە دوستاستىق ەلدەرىنىڭ ەرىكتىلەرى وزدەرىنىڭ تىنىمسىز ەڭبەگىنىڭ ارقاسىندا تولەرانتتى قوعامنىڭ دامۋىنا, قايىرىمدىلىق پەن مەيىرىمدىلىك مادەنيەتىن قولداۋعا ەلەۋلى ۇلەس قوسۋدى جالعاستىرىپ كەلەدى. دوستاستىق ەلدەرى ەرىكتىلەرىنىڭ جىل سايىنعى فورۋمىن وتكىزۋ جانە وعان تمد-نىڭ تۇراقتى الاڭى مارتەبەسىن بەرۋ تۋرالى قازاقستاندىق باستامانى ىسكە اسىرۋ بويىنشا ناقتى جۇمىستاردى باستاۋعا شاقىرامىن» دەدى ۇكىمەت باسشىسى ءاليحان سمايىلوۆ.
جەتەكشى ۆولونتەرلىك ۇيىمداردىڭ ۇسىنىستارىن ەسكەرە وتىرىپ دايىندالعان ءىس-شارالار جوسپارى 9 بولىمنەن تۇرادى. وندا 100-دەن استام حالىقارالىق اكتسيا, كەزدەسۋ, كونفەرەنتسيا, زەرتتەۋ جانە باسقا دا ءىس-شارالار قامتىلدى. جوسپار ىنتىماقتاستىقتىڭ نورماتيۆتىك-قۇقىقتىق بازاسىن جەتىلدىرۋ, ۆولونتەرلىك قوزعالىس ينفراقۇرىلىمىن دامىتۋ, ۆولونتەرلىك قىزمەتكە ىنتالاندىرۋدى قولداۋ جانە ۆولونتەرلىك ۇيىمداردىڭ الەۋەتىن ارتتىرۋعا باعىتتالدى. ءىس-شارالار جوسپارىن قۇرۋدا تمد-عا قاتىسۋشى مەملەكەتتەردىڭ, تمد-نىڭ مۇددەلى سالالىق ىنتىماقتاستىق ورگاندارىنىڭ, سونداي-اق تمد-عا قاتىسۋشى مەملەكەتتەردىڭ پارلامەنتارالىق اسسامبلەياسى كەڭەسى حاتشىلىعىنىڭ, تمد-عا قاتىسۋشى مەملەكەتتەردىڭ گۋمانيتارلىق ىنتىماقتاستىق جونىندەگى مەملەكەتارالىق قورىنىڭ ۇسىنىسى ەسكەرىلدى.
ۆولونتەرلىك قوزعالىستى جانداندىرۋعا باعىتتالعان جۇمىستاردىڭ ناتيجەسىندە بىرىككەن ۇلتتار ۇيىمى قازاقستاننىڭ باستاماسىمەن 2026 جىلدى حالىقارالىق ۆولونتەرلەر جىلى دەپ جاريالادى. باس اسسامبلەيا ءتيىستى رەزوليۋتسيانى قابىلداپ, وسىلايشا ەرىكتىلەر قوزعالىسىنىڭ ۇلتتىق, ايماقتىق, ءتىپتى جاھاندىق دەڭگەيدە دامۋىنا تىڭ سەرپىن بەرىلمەك.
سوڭعى 3 جىلدا ەرىكتى ۇيىمداردىڭ سانى 3 ەسەگە, ياعني 224-تەن 680-گە دەيىن ءوستى. ال بەلسەندى ۆولونتەرلەر سانى 5 ەسە ءوسىپ, 50 مىڭنان 240 مىڭعا دەيىن جەتتى. ەلىمىزدە 700-گە جۋىق ۆولونتەرلىك ۇيىم, 1000-نان استام باستاماشىل توپ جانە 1000-نان استام «كۇمىس ۆولونتەر» بار
وعان دەيىن قازاقستان 2020 جىلدى ۆولونتەر جىلى رەتىندە اتاپ ءوتتى. 2021-2023 جىلدارعا ارنالعان ۆولونتەرلىك قىزمەتتى دامىتۋدىڭ جول كارتاسى قابىلداندى. قولعا الىنعان شارالاردىڭ ناتيجەسىندە ەلىمىزدەگى ۆولونتەرلىك قوزعالىس قارقىندى دامىپ كەلەدى. بۇعان ۆولونتەرلىك ۇيىمداردىڭ ءوسۋ ديناميكاسى دالەل. سوڭعى 3 جىلدا ەرىكتى ۇيىمداردىڭ سانى 3 ەسەگە, ياعني 224-تەن 680-گە دەيىن ءوستى. ال بەلسەندى ۆولونتەرلەر سانى 5 ەسە ءوسىپ, 50 مىڭنان 240 مىڭعا دەيىن جەتتى. ەلىمىزدە 700-گە جۋىق ۆولونتەرلىك ۇيىم, 1000-نان استام باستاماشىل توپ جانە 1000-نان استام «كۇمىس ۆولونتەر» بار. Qazvolunteer.kz ونلاين پلاتفورماسى ىسكە قوسىلىپ, وعان 59 مىڭنان استام بەلسەندى ۆولونتەر جانە 3,5 مىڭنان اسا ۇيىم, مىڭنان استام جوبا تىركەلدى. بيىل العاش رەت استانادا حالىقارالىق ۆولونتەرلەر فورۋمى ءوتىپ, 34 مەملەكەتتىڭ جەتەكشى ۆولونتەرلىك ۇيىمدارىنىڭ باسىن بىرىكتىردى.
«ەلىمىزدە 20 وڭىرلىك ۆولونتەرلەر فرونت-ءوفيسى جۇمىس ىستەيدى. وسى جوبا اياسىندا بۇگىندە ۆولونتەرلىك توپتار, ۇيىمدار توپتاستىرىلىپ, ولارعا ۇيىمداستىرۋشىلىق, اقپاراتتىق, رەسۋرستىق قولداۋ, كونسۋلتاتسيالىق كومەك كورسەتىلەدى. ارىس قالاسىنداعى جارىلىس, اباي وبلىسىنداعى ءورت, ەكىباستۇزداعى توتەنشە جاعداي جانە تۇركياداعى جەر سىلكىنىسى سەكىلدى وقىس وقيعالار كەزىندە جىلدام ارەكەت ەتىپ, ءبىر جاعادان باس, ءبىر جەڭنەن قول شىعارىپ قوعامعا قىزمەت ەتۋدە ۆولونتەرلەر جۇمىلعان ەدى. كۇندەلىكتى ومىردە, قوعامدىق قىزمەتتە ۆولونتەرلەر تاراپىنان كورسەتىلەتىن كومەك ۇلكەن ءرول اتقاراتىنىن ەسىمىزدەن شىعارماۋىمىز كەرەك. قىزمەت جولىن ۆولونتەر بولۋدان باستاعان قانشاما جاس بار. مەكتەپ وقۋشىسىنان باستاپ قارياعا ارقاشان قول ۇشىن سوزۋعا ۇمتىلىپ تۇراتىن ۆولونتەرلەر بويىنا مەيىرىمدىلىك, ادالدىق, ەڭبەكقورلىق سەكىلدى قاسيەتتەردى جيناعان» دەدى ۇلتتىق ۆولونتەرلەر جەلىسى باسشىسىنىڭ ورىنباسارى ايبەك دوسىمبەتوۆ.
باس قالا بۇگىندە ەلدەگى ۆولونتەرلىكتىڭ دامۋىنا وڭ ىقپال ەتەتىن باستى الاڭ سانالادى. ورتالىق ازيا ەلدەرىنە ورتاق كەڭسە – حالىقارالىق ۆولونتەرلەر ورتالىعى ەلوردادا ورنالاسقان. مۇندا ءاربىر ەرىكتى ءوز باستاماسىن جۇزەگە اسىرا الادى. سونداي-اق ەلوردادا رەسپۋبليكا بويىنشا بىرقاتار ۆولونتەرلىك قوزعالىستىڭ باسىن قوسقان «استانا جاستارى» جاستار رەسۋرستىق ورتالىعىنىڭ جانىندا ۆولونتەرلەر قوزعالىسىن دامىتۋ ءبولىمى بار. ءبولىمنىڭ نەگىزگى مىندەتى – جاستاردى قالانىڭ الەۋمەتتىك ومىرىنە تارتۋ. سوندىقتان ەرىكتىلەر تۇراقتى نەگىزدە ۆولونتەرلىك قىزمەتتىڭ ءارتۇرلى باعىتىنا قاتىسادى. «استانا جاستارى» جرو بازاسىندا ۆولونتەرلىك ۇيىمدار مەن قوزعالىستاردى شوعىرلاندىرۋدى ۇيىمداستىرۋ, اقپاراتتىق جانە رەسۋرستىق كومەك كورسەتۋ, قالادا ءىس-شارالاردى ەسەپكە الۋدى جۇرگىزۋ ماقساتىندا قالالىق ۆولونتەرلەر شتابى جۇمىس ىستەيدى. بۇگىندە ەلوردادا 50-گە جۋىق ۆولونتەرلىك ۇيىم تىركەلگەن. تۇراقتى نەگىزدە 30 ۆولونتەرلىك ۇيىممەن جانە 20 باستاماشىل توپپەن, 4 ۇەۇ-مەن مەملەكەتتىك جاستار ساياساتىن ىسكە اسىرۋدا كاسىپورىندار مەن قالا مەتسەناتتارىمەن ىنتىماقتاستىق جانە بىرلەسكەن قىزمەت جۇرگىزىلەدى. شتابتا 6000-نان استام بەلسەندى ۆولونتەر بار. بىلتىر ۆولونتەرلەر 1113-تەن استام ءىس-شارانىڭ وتۋىنە باستاماشى بولدى. ۆولونتەرلىك ۇيىمدار 5000-نان استام ازىق-تۇلىك سەبەتىن, 6400 ىستىق تاماق تاراتتى. ۆولونتەرلەردىڭ «Birgemiz» فرونت-ءوفيسى 8 باعىت شەڭبەرىندە 80 جوبا جۇرگىزۋدە, ولارعا 330 ملن تەڭگە كولەمىندەگى شىعىس پاناسىز قالعان جانۋارلاردى ۇستاۋعا, ازىق-تۇلىك سەبەتىن, كەڭسە جيىنتىعىن ساتىپ الۋعا جانە ت. ب. ماقساتتا جۇمسالدى.
«جىل سايىن «استانا جاستارى» جرو قالا بويىنشا ۆولونتەرلىك قوزعالىستى جان-جاقتى باعىتتان قامتۋعا باسا نازار اۋدارادى. مىسالى, بىلتىر «قاۋىپسىز قالا» جوباسى شەڭبەرىندە تۇراقتى نەگىزدە ۆولونتەرلەر حالىقتى گازداندىرۋ تۋرالى, جىلىتۋ ماۋسىمى مەن كوكتەمگى سۋ تاسقىنى كەزىندەگى قاۋىپسىزدىك شارالارى تۋرالى, شومىلۋ ماۋسىمىنداعى مىنەز-قۇلىق ەرەجەلەرى تۋرالى اقپاراتتاندىرۋ جۇمىسىنا تارتىلدى, سول سياقتى قوعامدىق مۇلىككە ۇقىپتى قاراۋعا باعىتتالعان «StopVandal» اكتسياسىن جانە جاستارعا ارنالعان مەملەكەتتىك باعدارلامالار تۋرالى «ۇزدىك» جوباسىن كوپشىلىك اراسىندا كەڭىنەن ناسيحاتتادى. «قامقورلىق مەكەنجايى» اكتسياسى اياسىندا جالعىزباستى تۇراتىن زەينەتكەرلەرگە ءۇي شارۋاسىمەن كومەكتەسىپ, اۋلاسىن قاردان تازارتۋعا ۆولونتەرلەر اتسالىسىپ كەلەدى. سونداي-اق ءبىز قالا تۇرعىندارى مەن قوناقتارىنا ايازدى كۇندەرى باۋىرساق پەن ىستىق شاي تاراتۋدى ۇمىتپايمىز. جاقىندا ءبىز جانۋارلارعا ارنالعان باسپانالارعا باردىق, وندا ءبىزدىڭ ۆولونتەرلەر جانۋارلارمەن سەرۋەندەپ, اۋماقتى تازالادى. سونداي-اق مەكتەپ وقۋشىلارى اراسىندا ەرىكتىلىكتىڭ ماڭىزىن ايتىپ, الەۋمەتتىك بەلسەندىلىككە جۇمىلدىرۋ جانە ەكو-ۆولونتەرلىك باعىتىن كۇشەيتۋ جوسپارلانۋدا» دەدى ءوز سوزىندە «استانا جاستارى» جاستار رەسۋرستىق ورتالىعى ۆولونتەر قوزعالىسىن دامىتۋ ءبولىمىنىڭ باسشىسى ەلۆيرا ەسمۇحانوۆا.
ەرىكتىلىكپەن اينالىسىپ جۇرگەندەردىڭ باسىم بولىگى – جاستار. اسىرەسە ولاردىڭ قاتارىندا مەكتەپ وقۋشىلارىنىڭ كوپتىگى قۋانتادى. ولار ءۇشىن دە ۆولونتەرلىك قىزمەتتى جوعارى وقۋ ورنىنا ءتۇسۋ كەزىندە ەسەپكە الۋ سىندى مۇمكىندىك ءتيىمدى. ماسەلەن, سونداي جاستاردىڭ قاتارىندا ەلوردالىق ۆولونتەر دانا تاكەنوۆا بار. بىلتىر ول «جىل ۆولونتەرى» حالىقارالىق سىيلىعىندا توپ جارىپ, «سالاۋاتتى ءومىر سالتىن ناسيحاتتاۋعا بەلسەندى قاتىسقانى ءۇشىن» اتالىمىنىڭ يەگەرى اتاندى.
«ۆولونتەرلىك – قوعامنىڭ ءار سالاسىنداعى ءتۇيىندى, تۇيتكىلدى ءتيىمدى تۇردە شەشۋگە مۇمكىندىك بەرەتىن ماڭىزدى الەۋمەتتىك ينستيتۋت. ەرىكتىلەردىڭ بەلسەندىلىگى قوعامنىڭ جەتىلۋىن, ونىڭ دامۋ دەڭگەيى مەن وزدىگىنەن ۇيىمداسا الۋ قابىلەتىن كورسەتەدى. ۆولونتەرلىك قانىمىزعا سىڭگەن قاسيەت سانالادى. سوندىقتان دا قايتارىمسىز قىزمەت ەتۋ مەن يگى ىستەرگە جاقىن كەلەمىز. ال مەن ءۇشىن بۇل – ءومىرىمنىڭ ءبىر بولشەگى. وزگەلەرگە كومەكتەسىپ, ولاردىڭ العىسىن الۋ شىن باقىت سىيلادى. وسى جولدا مەن جاقىن دوس-قۇربى دا كەزدەستىرگەنىمە قۋانامىن» دەدى ۆولونتەر.
