بيىل ەلوردا مەكتەپتەرىن 11230 تۇلەك ءبىتىرىپ شىقتى. «سوڭعى قوڭىراۋ» سالتاناتى تەك تۇلەكتەر ءۇشىن عانا ۇيىمداستىرىلدى. تۇلەكتەرگە ارنالعان مەملەكەتتىك قورىتىندى ەمتيحاندار 28 مامىر-11 ماۋسىم ارالىعىندا 5 ءپان بويىنشا وتەدى. ورتا ءبىلىمى تۋرالى اتتەستاتتار 14 ماۋسىمدا تاپسىرىلادى. استانا قالاسىنىڭ اكىمى جەڭىس قاسىمبەك وقۋشىلاردى, اتا-انالار مەن ۇستازداردى وقۋ جىلىنىڭ اياقتالۋىمەن قۇتتىقتاپ, ەلوردادا ءجۇرىپ جاتقان مەكتەپتەر قۇرىلىسى تۋرالى مالىمەت بەردى, دەپ حابارلايدى astana-akshamy.kz.
قالا اكىمى جىل سايىن 1-سىنىپقا 20 مىڭنان استام وقۋشى كەلەتىنىن ەسكەرسەك, جاڭا مەكتەپتەر سانى بىرنەشە ەسەگە ارتاتىنىن ايتتى.
-قازىر ءبىز 100 مىڭعا جۋىق وقۋشى ورنىنا ارنالعان 32 مەكتەپتىڭ قۇرىلىسىن جۇرگىزىپ جاتىرمىز. ونىڭ ىشىندە جىل سوڭىنا دەيىن مەكتەپتەردىڭ رەكوردتى سانىنىڭ قۇرىلىسىن اياقتاۋدى جوسپارلاپ وتىرمىز. بۇل – 64 مىڭعا جۋىق وقۋشىعا ارنالعان 23 مەكتەپ (ەكى اۋىسىمدى). ال «جايلى مەكتەپ» ۇلتتىق جوباسى اياسىندا – 15 مەكتەپ (ەسىل – 6, نۇرا – 4, الماتى – 3, سارىارقا – 2), تاعى 5 مەملەكەتتىك مەكتەپ (نۇرا – 2, بايقوڭىر – 2, الماتى – 1), 3 جەكەمەنشىك (ەسىل – 2, الماتى – 1) سالىنادى, دەدى اكىم.
جاڭا وقۋ جىلىنىڭ باسىندا 32 مىڭعا جۋىق وقۋشى ورنىنا (ەكى اۋىسىمدا) ارنالعان 12 مەكتەپتىڭ قۇرىلىسىن اياقتاۋدى جوسپارلاپ وتىرمىز. ولار – «جايلى مەكتەپ» ۇلتتىق جوباسى اياسىنداعى 8 مەكتەپ, اتاپ ايتقاندا, ەسىل اۋدانى – ءبىر اۋىسىمدى 7800 وقۋشىعا ارنالعان 3 مەكتەپ – ورىنبور كوشەسى جانە №37 «Soho» تك, ماڭگىلىك ەل داڭعىلى جانە ە497 كوشەسى, قابانباي باتىر جانە سىعاناق كوشەلەرى, «پوكولەنيە» تك; نۇرا اۋدانى – 4000 وقۋشىعا ارنالعان ءبىر اۋىسىمدى 2 مەكتەپ – تولە بي كوشەسى مەن 57-ۋچاسكە قيىلىسى («زەلەنىي كۆارتال» تك), ە127, ە368, ە418, ە535 كوشەسى (قورعالجىن تاسجولى اۋدانى); سارىارقا اۋدانى – 4000 وقۋشى ورنىنا ارنالعان ءبىر اۋىسىمدى 2 مەكتەپ – س189 كوشەسى مەن «زەمليانيچنايا» ساياجاي الابى, كوكتال ەلدى مەكەنى; الماتى اۋدانى – 600 وقۋشىعا ارنالعان ءبىر اۋىسىمدى 1 مەكتەپ (ا.بايتۇرسىنۇلى كوشەسى, №9). بايقوڭىر جانە نۇرا اۋداندارىندا تاعى 3 مەملەكەتتىك مەكتەپ: بايقوڭىر اۋدانىندا №12 مەكتەپ جانە №27 مەكتەپ-ليتسەي اۋماعىندا قوسىمشا جاڭا عيمارات, سول سياقتى نۇرا اۋدانىنىڭ №17 مەكتەپ-گيمنازيا اۋماعىنداعى جاڭا قوسىمشا عيمارات. سونداي-اق ەسىل اۋدانىندا ۇلى دالا داڭعىلىندا («ارناۋ» تك) تاعى ءبىر جەكە مەكتەپ اشىلادى.
وسىلايشا, 23 جاڭا مەكتەپ ارقىلى 6 مەكتەپتە ءۇش اۋىسىمدى وقۋ ماسەلەسىن, تاعى 9 مەكتەپتە شامادان تىس رەجيمى ماسەلەسىن شەشۋدى جوسپارلانىپ وتىر.
