ديماش قۇدايبەرگەننىڭ 30 جىلدىق مەرەيتويىنا وراي تۇركيانىڭ ىستانبۇل قالاسىنداعى ايگىلى «بەشيكتاش» ستاديونىندا الەمگە اڭىز ءانشىنىڭ جەكە شىعارماشىلىق كەشى ءوتتى.
بوسفور جاعالاۋىنداعى ستاديونعا 42 مىڭ كورەرمەن سيادى. بيلەتتەر 9 اقپاننان باستاپ ساتىلعان. تۇركيا باسىلىمدارىنىڭ جازۋىنشا, ديماشتىڭ جەكە كەشىن تاماشالاۋعا الەمنىڭ 41 ەلىنەن جانكۇيەرلەر كەلگەن. كەشتە ەرەكشە فورماتتاعى اندەر شىرقالدى. سونداي-اق تۇركيالىق بەلگىلى ونەر يەلەرىمەن دۋەت ورىندالدى.
ديماش قۇدايبەرگەن ۆيتەبسكتە وتكەن «سلاۆيان بازارى – 2015» حالىقارالىق ءان بايقاۋىنان كەيىن كوپشىلىككە تانىلا باستادى. بۇل بايقاۋدا ءانشى گران-ءپريدى جەڭىپ الدى. ال كوپشىلىكتىڭ سۇيىسپەنشىلىگىنە قىتايدىڭ «مەن ءانشىمىن» جوباسىنا قاتىسقان ساتتەن باستاپ بولەنىپ كەلەدى. بۇل بايقاۋدا ديماش قازاقستاندىقتاردى عانا ەمەس, شەتەلدىكتەردى دە تاڭداي قاقتىردى, ونەرىنە ءتانتى ەتتى. وسىدان كەيىن كوپ ۇزاماي, ديماشتىڭ شەتەلدەگى ەڭ العاشقى جەكە كونتسەرتى قىتايدا ءوتتى. قازىرگە دەيىن اقش, جاپونيا, رەسەي سياقتى كوپتەگەن ەلدىڭ ساحنالارىندا ونەر كورسەتكەن ديماش بيىل جىل باسىندا ديماش بۇۇ-نىڭ كوشى-قون ءىسى جونىندەگى ىزگى نيەت ەلشىسى اتانعان بولاتىن. ول ءتىپتى 2021 جىلى اقش پرەزيدەنتى دجو بايدەننىڭ يناۋگۋراتسياسى اپتالىعىنىڭ اشىلۋىنا ارنالعان ءىس-شارادا ونەر كورسەتتى. 2023 جىلى ديماش «اعايىندى كاريچ قورى» سىيلىعىن الدى.
ديماش قۇدايبەرگەن 2019 جىلى قازاقستاننىڭ ەڭبەك سىڭىرگەن قايراتكەرى اتاندى. 2023 جىلى ديماشقا «قازاقستاننىڭ حالىق ءارتىسى» قۇرمەتتى اتاعى بەرىلدى. قازاق جىگىتى 2019 جىلى «ازيانىڭ ەڭ ادەمى تۇلعالارى» رەيتينگىندە 8-ورىندا تۇر.
ىڭكار بايعابىل,
ل.گۋميلەۆ اتىنداعى ەۋرازيا ۇلتتىق
ۋنيۆەرسيتەتىنىڭ
ستۋدەنتى
