5 مىڭنان استام ادام اباتتاندىرۋ ەرەجەلەرىن بۇزعان
![](https://astana-akshamy.kz/wp-content/uploads/2024/06/gllyssysvarnlgrdoshshhzh-780x470.jpg)
استانادا اباتتاندىرۋ ەرەجەلەرىن بۇزعان 5 مىڭنان استام ادام جاۋاپكەرشىلىككە تارتىلدى, دەپ حابارلايدى astana-akshamy.kz
«تازا قازاقستان. استانا — تازالىق پەن ءتارتىپتىڭ ۇلگىسى» ەكولوگيالىق اكتسياسى اياسىندا استانا قالاسى پوليتسيا دەپارتامەنتى قورشاعان ورتانى اباتتاندىرۋ, جالپى پايدالانۋ ورىندارىن لاستاۋ ەرەجەلەرىن بۇزۋدىڭ الدىن الۋ بويىنشا ءىس-شارالار جۇرگىزۋدە. سونىمەن قاتار كوشە-جول جەلىسىنە, قۇرىلىس نىساندارىنا زەرتتەۋ جۇرگىزۋ بويىنشا ءموبيلدى توپتار قۇرىلدى.
اكتسيا باستالعاننان بەرى قوقىستى زاڭسىز شىعارۋ, جالپى پايدالانۋ ورىندارىنىڭ لاستانۋى جانە اباتتاندىرۋ قاعيدالارىن وزگە دە بۇزۋ فاكتىلەرى بويىنشا 5 مىڭنان استام قۇقىق بۇزۋشى اكىمشىلىك جاۋاپكەرشىلىككە تارتىلدى.
«كۇن سايىن رۇقسات ەتىلمەگەن قوقىس ۇيىندىلەرىنىڭ پايدا بولۋىنا بەيىم ورىنداردا رەيدتىك ءىس-شارالار جۇرگىزىلەدى, بەلگىلەنبەگەن ورىنداردا قوقىستاردى ءتۇسىرۋدى جانە اعىندى سۋلاردى توگۋدى جۇزەگە اسىراتىن تۇلعالاردى انىقتاۋ بويىنشا ماقساتتى جۇمىس جۇرگىزىلەدى. اكتسيا باستالعاننان بەرى جۇك كولىگىنىڭ 50-دەن استام جۇرگىزۋشىسى جاۋاپكەرشىلىككە تارتىلدى. سونىمەن اسسەنيزاتورلىق كولىك جۇرگىزۋشىسى اعىندى كارىز جۇيەسىنە قوقىستى رۇقساتسىز اعىزۋعا رۇقسات بەرگەن. وعان قاتىستى اكىمشىلىك جازالاۋ شارالارى قابىلداندى», — دەلىنگەن حابارلامادا.
سۋرەت: kaz.inform.kz