قازاقستاندا العاش رەت 8 تىلدە تارالاتىن «مادەنيەت» ونلاين-پورتالىن ىسكە قوسىلادى. جاڭا پورتال ارقىلى مادەني قۇندىلىقتارىمىز قازاقستاندىق قانا ەمەس, شەت ەل اۋديتورياسىنا ناسيحاتتالادى, دەپ حابارلايدى astana-akshamy.kz.
بۇل تۋرالى بۇگىن قر مادەنيەت جانە اقپارات ءمينيسترى ايدا بالاەۆا مينيسترلىكتىڭ كەڭەيتىلگەن القا وتىرىسىندا مالىمدەدى.
-ەلىمىزدىڭ مادەني سالاسىندا شەشىلمەگەن دۇنيە كوپ, بىراق بۇل بىزدە تولىققاندى قالىپتاسقان, ءوزىنىڭ باي مۇراسى, ەلگە كورسەتەر ءتالىم-تاربيەسى, ماقتانىشپەن ايتار اڭگىمەسى بار ءتول مادەنيەت جوق دەگەن ءسوز ەمەس. بىز بارىمىزدى ۇقساتىپ, جوعىمىزدى جاڭعىرتىپ, ەڭ الدىمەن, ءوز حالقىمىزعا, سوسىن سىرتقى جۇرتقا ۇسىنۋىمىز كەرەك. وزدەرىڭىز بىلەسىزدەر, قازىر اقپاراتتىق زامان. مادەني قۇندىلىعىمىزدى تەك مۇراجاي, تەاتر, كونتسەرتتەرگە شاقىرۋىمەن, كورمەلەر مەن تۋرلار ۇيىمداستىرۋمەن شەكتەمەۋىمىز قاجەت, – دەدى سپيكەر.
پورتالدىڭ نەگىزگى مىندەتى – ءاربىر قىزىعۋشى ۇيدەن شىقپاي, ءتول مادەنيەتىمىزدىڭ بارلىق ساي-سالاسىن ارالاۋعا – مۋزەي, كىتاپحانا, تەاتر, ۇلتتىق كينو, كورمەلەر, رۋحاني قورىقتار, ۇلتتىق مۋزىكانىڭ التىن قورى مەن زاماناۋي اۋەزدىڭ جاڭا ۇلگىلەرىمەن تانىسۋعا جاعداي جاساۋ.
بۇنداي جوبالار الەمدىك تاجىريبەدە ءوز تيىمدىلىگىن باياعىدا-اق كورسەتكەن. ماسەلەن, كۇنىنە 50 مىڭ ادام كىرەتىن «لۋۆر» مۋزەيى ونلاين كەڭىستىكتە 10 ملن. «ۆيرتۋالدى تۋريستەردى» قابىلدايدى.
