ەلوردانىڭ سارىارقا اۋدانىنداعى قاراساي باتىر كوشەسىندە ورنالاسقان ەسكى №36 مەكتەپ ورنىنا جاڭا وقۋ وشاعى سالىندى. مۇنى استانا قالاسىنىڭ اكىمى جەڭىس قاسىمبەك Instagram پاراقشاسىندا جازدى, دەپ حابارلايدى astana-akshamy.kz .
«استانادا ون ەكىنشى جاڭا مەكتەپ اشىلدى! وسىعان دەيىن بالالار 90 جىل بۇرىن سالىنعان مەكتەپتە وقىپ ءجۇردى! قازىر وقۋشىلار جايلى وقۋ ورنىندا ءبىلىم الىپ ءجۇر. جاڭا مەكتەپ ەكى اۋىسىمدا 2400 وقۋشىعا ارنالعان. وقۋ ورنى زاماناۋي وقۋ كابينەتتەرىمەن جابدىقتالعان. سونداي-اق, سپورت جانە اكت زالدارى, مەديتسينالىق كابينەت, كىتاپحانا, بالالار الاڭدارى جانە ت.ب. بار.
وسىلايشا, قازىرگى وقۋ جىلىندا 12 مەكتەپ اشىلدى. وقۋ جىلىنىڭ سوڭىنا دەيىن تاعى 3 مەكتەپ اشامىز, – دەپ جازدى جەڭىس قاسىمبەك.
سونىمەن قاتار ول مەملەكەت باسشىسىنىڭ تاپسىرماسى بويىنشا قالادا «جايلى مەكتەپ» ۇلتتىق جوباسىن ىسكە اسىرىلاتىنىن جازدى. جوبا اياسىندا 2024-2025 جىلدار ارالىعىندا 90 مىڭعا جۋىق وقۋشى ورنىنا (2 اۋىسىمدى) ارنالعان جاڭا فورماتتاعى 24 مەكتەپ سالىنادى. ولاردىڭ 15-ءى قارقىندى دامىپ كەلە جاتقان ەسىل مەن نۇرا اۋداندارىندا ورنالاساتىن بولادى. 2027-2028 جىلدارعا دەيىن باس-اياعى 200 مىڭعا جۋىق وقۋشى ورنىنا (2 اۋىسىمدى) ارنالعان 80 مەكتەپ سالۋ جوسپارلانۋدا.
