مەملەكەت باسشىسىنىڭ تاپسىرماسىنا ساي باس قالادا كورىكتەندىرۋ جۇمىستارى جالعاسۋدا. اسىرەسە, وسى جازدا جولدار جاپپاي جوندەلىپ, ساياباقتارعا اعاشتار وتىرعىزىلۋدا. مۇنىڭ ءبارى قالا تۇرعىندارىنىڭ قولايلىلىعى ءۇشىن جاسالىپ جاتىر.
«استانا باس جوسپارى» ديرەكتورىنىڭ ورىنباسارى ەلنار بازىكەننىڭ ايتۋىنشا, قازىرگى كۇنى ەلوردادا اباتتاندىرۋ جانە كوگالداندىرۋ جۇمىستارى قارقىندى جۇرگىزىلۋدە.
– بيىل 170 قوعامدىق جانە اۋلا كەڭىستىگىن اباتتاندىرۋ جانە ميلليوننان استام جاسىل كەڭىستىكتى وتىرعىزۋ جوسپارلانعان. بۇگىندە بۇل جۇمىستاردىڭ بارلىعىن قالا تۇرعىندارى باقىلاپ وتىر. مۇنىڭ ءبارى قالا تۇرعىندارىنا جايلى ورتا قالىپتاستىرۋ ءۇشىن جاسالادى. اباتتاندىرۋ تۇرعىنداردىڭ ءال-اۋقاتىنا, پسيحولوگياعا, قالا ەكونوميكاسىنا مۋلتيپليكاتيۆتى اسەر ەتەدى, – دەدى ۋربانيست.
ەل پرەزيدەنتى قاسىم-جومارت توقاەۆ استانانىڭ جاسىل, اباتتاندىرىلعان بولۋى كەرەكتىگىن بىرنەشە رەت ايتقان بولاتىن. وسىعان وراي باس قالانىڭ سىرتقى كەلبەتىنە ەرەكشە نازار اۋدارىلادى. ماسەلەن, بيىل ۇلىتاۋ اللەياسى اباتتاندىرىلدى. وندا 400-دەن استام ءىرى اعاشتار وتىرعىزىلدى. بۇعان دەيىن ماڭگىلىك ەل داڭعىلى بويىندا كولىكتەر كوپ بولاتىن. ەندى بۇل ماڭ جاياۋ جۇرگىنشىلەر ءۇشىن ىڭعايلى بولا باستادى. بوس جەرلەرگە اعاش وتىرعىزىلىپ, اباتتاندىرۋ جۇمىستارى ءالى جالعاسۋدا. بۇل جەردە زاماناۋي شامدار, ورىندىقتار, قوقىس جاشىكتەرى ورناتىلادى.
قازىر بارلىق جەردە جاياۋ جۇرگىنشىلەر وتكەلدەرى, پاندۋستار, ۆەلوجولدار جاسالۋدا. قالانىڭ ءار اۋدانىندا گۇلزارلار, قوعامدىق كەڭىستىكتەر, ساياباقتار پايدا بولدى. بۇگىندە ەسكى ۆوكزال جاقتاعى ءبىرجان سال جانە گەتە كوشەلەرىنىڭ ماڭىنداعى الاڭ اباتتاندىرىلۋدا.
بيىل الماتى اۋدانىنداعى اقبۇلاق جاعالاۋى اباتتاندىرىلدى, بۇل جۇمىس وتكەن جىلى باستالعان بولاتىن. قازىرگى كەزدە ابىلاي حان داڭعىلىنان تاۋەلسىزدىككە دەيىنگى اۋماق كوگالداندىرىلدى.
– ءبىزدىڭ ماقساتىمىز – ەسىل وزەنىنىڭ بويىنداعى بارلىق ساياباقتاردى بىرىڭعاي ۆەلوسيپەد جانە جاياۋ ءجۇرۋ مارشرۋتتارىمەن بىرىكتىرۋ. وسى ورايدا كوپىرلەر استىندا جاياۋ جۇرگىنشىلەر بايلانىسى جاسالادى. ەندى تۇرعىندار باعدارشام ارقىلى كوپىرلەردى اينالىپ وتپەيدى. ولار كوپىرلەردىڭ استىنان وتە الادى. بۇل وتە ىڭعايلى. وتكەن جىلى باستالعان جۇمىس بيىل جالعاسۋدا. مىسالى, تاۋەلسىزدىك داڭعىلىنىڭ بويىندا وتە ۇلكەن كوپىر, كەڭ جول بار. ەندى كوپىردىڭ استىندا جاياۋ جۇرگىنشىلەر بايلانىسى بولادى, – دەدى ەلنار بازىكەن.
بيىل پرەزيدەنتتىك ساياباق بويىنداعى جاعالاۋدى اباتتاندىرۋ جۇمىستارى باستالدى. بۇل جەردە جاڭا جابىن, كوگالداندىرۋ, ۆەلوجول, جۇگىرۋ جولدارى جاسالادى.
قابانباي باتىر داڭعىلىندا دا جۇمىستار جۇرگىزىلۋدە. «استانا ارەنا» سپورت كەشەنىنىڭ, «سارىارقا» ۆەلوترەگى مەن «الاۋ» مۇز سارايىنا ىرگەلەس اۋماقتاردا اباتتاندىرۋ جۇمىستارى جۇرگىزىلۋدە. وندا ۇلكەن اعاشتار وتىرعىزىلىپ, جابىندارى وزگەرتىلدى, داڭعىل بويىمەن جاياۋ جۇرگىنشىلەر جولدارى مەن ۆەلوجولدار جاسالدى.
شانحاي ىنتىماقتاستىق ۇيىمىنىڭ ءسامميتى قارساڭىندا «قازاق ەلى» الاڭى اباتتاندىرىلدى. ول ءسامميتتىڭ باستى ەلەمەنتى بولادى. وندا 560 ءىرى اعاشتار وتىرعىزىلدى, ايماق جارىقتاندىرىلدى. اللەيانىڭ دامۋىن جالعاستىرۋ ءۇشىن بيىل جۇرگەنوۆ كوشەسىندە كەنەن ازىرباەۆ كوشەسىنەن ناجىمەدەنوۆ كوشەسىنە دەيىنگى جەردە بۋلۆارلىق الاڭ پايدا بولادى.
«مىڭجىلدىق» اللەياسى دا اباتتاندىرىلىپ جاتىر. بەيبىتشىلىك جانە كەلىسىم سارايىنىڭ اينالاسىنداعى ساياباقتا جاڭا «قۇس» سۋبۇرقاعى قايتا جاڭعىرتىلادى. جاڭا جابىن توسەلىپ, اۋماق تولىق كوگالداندىرىلادى. بيىلعى جۇمىستاردىڭ باستى ەرەكشەلىگى – جاڭادان وتىرعىزىلعان بارلىق اعاشتار وزدىگىنەن سۋارۋ جۇيەسىمەن سۋارىلادى. بۇل رەتتە «استانا باس جوسپارى» ديرەكتورىنىڭ ورىنباسارى وسى شارۋاعا تاجىريبەلى مامانداردىڭ تارتىلعانىن, ءاربىر وتىرعىزىلعان اعاش باقىلاۋدا بولاتىنىن اتاپ ءوتتى.
– ەلورداداعى كوپىرلەردە دە جوندەۋ جۇمىستارى جۇرگىزىلۋدە, ولاردىڭ قورشاۋلارى مەن شامدارى بىرىزدەندىرىلىپ بەزەندىرىلگەن. وتكەن جىلى قالادا بارلىعى 165 اۋلا جاڭارتىلسا, بيىل 170 قوعامدىق كەڭىستىكتى اباتتاندىرۋ جوسپارلانىپ وتىر. بىلتىر قالانىڭ ەسكى بولىگىندەگى اۋلالار مەن قوعامدىق كەڭىستىكتەر جوندەلسە, بيىل ەسىل وزەنىنىڭ سول جاعالاۋىنداعى كورنەكتى ورىنداردى اباتتاندىرۋ كوزدەلۋدە, – دەدى ەلنار بازىكين.
بۇگىندە اقبۇلاق جاعالاۋى مەن پرەزيدەنتتىك ساياباق جابدىقتالىپ جاتىر. كەلەسى جىلى ساياباقتىڭ ترياتلون اۋدانىنداعى ورتالىق جاعالاۋ جانە سپورتتىق جاعالاۋ اباتتاندىرىلادى. جوبالار ءازىر, بۇل ىسكە لاندشافت ساۋلەتشىلەرى, ماماندار, ديزاينەرلەر تارتىلۋدا.
جاز باستالعالى بەرى استانادا جول جوندەۋ جۇمىستارى جالعاسۋدا. قالالىق كولىك جانە جول-كولىك ينفراقۇرىلىمىن دامىتۋ باسقارماسىنىڭ باس مامانى سەرىكبولسىن جالعاسوۆتىڭ ايتۋىنشا, بيىل باس شاھاردا 50-دەن استام كوشەگە اعىمداعى جوندەۋ جۇمىستارىن جۇرگىزۋ جوسپارلانعان. اسىرەسە, ماڭگىلىك ەل, تۇران, قابانباي باتىر داڭعىلدارى مەن كوكتال 1, لەسوزاۆود تۇرعىن الاپتارىنداعى كوشەلەرگە باسا نازار اۋدارىلادى. بيىل تۇرعىن الاپتاردا 17 كوشەنى ورتاشا جوندەۋ جوسپارلانىپ وتىر. بارلىق جۇمىستار كەستەگە سايكەس جۇرگىزىلۋدە.
– وتكەن جىلى جۇمىستىڭ نەگىزگى بولىگى تىرشىلىكتى قامتاماسىز ەتۋ وبەكتىلەرىن – اۋىزسۋ ستانتسياسىن, گاز جىلۋ ستانتسيالارىن سالۋعا جانە پايدالانۋعا بەرۋگە باعىتتالدى. ال بيىل جول ينفراقۇرىلىمىنا باسا نازار اۋدارىلۋدا. جولداردى سالۋ جانە جوندەۋ كولەمى ۇلعايتىلدى. ءبىزدىڭ وڭىردە جول جوندەۋ ماۋسىمى تىم قىسقا, جاز كوزدى اشىپ-جۇمعانشا وتە جىلدام شىعادى, سوندىقتان جوسپارلانعان جۇمىستى ۋاقىتىلى اياقتاپ ۇلگەرۋىمىز كەرەك, – دەدى باس مامان.
بارلىق جوندەۋ جانە اباتتاندىرۋ جۇمىستارى جوسپارعا ساي كەلىسىلگەن كەستە بويىنشا ءجۇرىپ جاتىر.
