15 جىل ىشىندە ادام ولىمىمەن اياقتالعان جول-كولىك اپاتتار سانى ەكى ەسە ازايدى, دەپ حابارلايدى astana-akshamy.kz
زامان تالابىنا ساي ماگيسترالداردىڭ قۇرىلىسى ەلدەگى جول قاۋىپسىزدىگىنە وڭ اسەرىن تيگىزىپ وتىر. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا ءىىم اكىمشىلىك پوليتسيا كوميتەتىنىڭ توراعاسى قايسار سۇلتانباەۆ مالىمدەدى.
«15 جىل بۇرىن جولداردا 4 مىڭنان استام ازامات كوز جۇمسا, قازىر بۇل كورسەتكىش 2 ەسەگە ازايىپ وتىر. ماگيسترالدىق جولداردىڭ جەكەلەگەن ۋچاسكەلەرىندە ادام شىعىنى 6 ەسەدەن استام قىسقاردى. مىسالى, «استانا-ششۋچينسك» تاس جولىن قايتا جاڭارتىپ, جولاقتار سانىن 6-عا دەيىن ۇلعايتىپ, سونداي-اق ءبولۋ جولاعىن جايلاستىرۋدان كەيىن جول-كولىك اپاتتارى كەزىندە ءولىم-ءجىتىم سانى جىلىنا 75-تەن 12-گە دەيىن تومەندەدى», – دەدى قايسار سۇلتانباەۆ.
اپاتتىلىقتىڭ تومەندەۋى «استانا – پاۆلودار – سەمەي», «استانا – قاراعاندى» باعىتتارى بويىنشا جاڭا اۆتوماگيسترالداردا دا بايقالادى.
ءىىم وكىلىنىڭ ايتۋىنشا, ەلدەگى جولداردىڭ نەگىزگى بولىگى ەسكىرگەن ستاندارتتار بويىنشا سالىنعان. بۇل – ەنى 7 مەتردەن اسپايتىن ەكى جولاقتى جولدار. ءتورت نەمەسە ودان دا كوپ جولاقتارى بار ءبىرىنشى ساناتتاعى جولدار تەك 2%-دى قۇرايدى.
سپيكەر اتاپ وتكەندەي, وسىعان بايلانىستى 6 مىڭ شاقىرىمنان استام جولدا جولاقتار سانىن كەڭەيتۋ جانە ءبولۋ جولاعىن سالۋدى قايتا جاڭارتۋدى قامتاماسىز ەتۋ قاجەت.
