جىل سايىن 28 ماۋسىمدى جۋرناليستەر كۇنى دەپ اتاپ وتەمىز. شىن مانىندە قولىنا قالام ۇستاعان تاعدىر يەلەرىنىڭ وسى ءبىر اتاۋلى كۇنىن اتاۋسىز وتكىزبەۋدىڭ دە ءوزىنىڭ ءمان-ماڭىزى بار. ويتكەنى قارۋ ۇستاعان قولدان, قالام ۇستاعان ساۋساقتاردىڭ ارتىق بولاتىندىعى جاسىرىن ەمەس. دەيتۇرعانمەن دە جۋرناليست دەگەن وسى اتاۋدىڭ ارت جاعىندا قانشاما ەڭبەكپەن, كوزگە كورىنبەيتىن تەر جاتقانىن سول ماماندىق يەلەرى عانا بىلەدى. ال ەل الدىندا جارقىراپ جۇرگەن بۇل قاۋىمنىڭ دا تارام-تارام تاعدىر يەسى ەكەندىگىن بىلايعى جۇرتتىڭ ءبىرى بىلسە, ءبىرى بىلمەيدى. ءبىز اتاۋلى كۇنگە وراي ارداگەر جۋرناليست, قارت قالامگەرىمىز قازاقستان جۋرناليستەر وداعىنىڭ مۇشەسى, قازاق راديوسىنىڭ ۇزدىك قىزمەتكەرى, قازىنا نۇرقانوۆامەن اڭگىمەدە بولىپ, جەتپىستەن اسسا دا, اپامىزدىڭ ءالى دە ايتارى كوپ ەكەنىنە كوزىمىز جەتتى.
ءا دەگەننەن ءسوزىنىڭ القيسساسىن ءوزىنىڭ قىزىقتى بالالىق شاعىنان باستاعان قازىنا سادۋاقاسقىزى اقپارات سالاسىنا ورىس ءتىلدى جۋرناليست بولىپ كەلگەنىن, قازاق ءتىلىن تۇرمىسقا شىققاننان كەيىن عانا ۇيرەنگەنىن ايتىپ ءبىر تاڭعالدىردى.
– مەن اۋلەتتە جالعىز قىز بولدىم. سوندىقتان دا اكەم دە, انام دا قاتتى ەركەلەتىپ ءوسىردى. ونىڭ ۇستىنە ءتىلىم ەندى شىعا باستاعاندا ورىس مەكتەبىنە وقۋعا ءتۇستىم. ءارى قۇربى-قۇرداستارىمنىڭ كوبى سول تىلدە سويلەگەندىكتەن, ادامدارمەن قارىم-قاتىناسىما ورىس ءتىلدى بولۋىم كەرى اسەرىن تيگىزبەدى. ورىس ءتىلدى ورتادا وسكەندىكتەن بە, ءوز ءىس-ارەكەتتەرىمنىڭ كەيبىر وعاشتىعىن ۇياتتى دەپ سەزىنبەيتىنمىن. سول سەبەپتى دە كەيىن مەنى كوپ ادام سىرتتاي قاتە ءتۇسىنىپ, باسقاشا ادام رەتىندە جورامالداپ ءجۇردى. الايدا تاعدىردىڭ جازۋىمەن قولىما قالام الىپ جۋرناليستيكا سالاسىنا كەلەمىن, كۇيەۋىم قازاقى ءسوزدىڭ قايماعىن قالقىعان اقىن بولادى دەپ مۇلدەم ويلاماعان ەكەنمىن. ءسويتىپ ءجۇرىپ, تالەيىمە قۇداي جاراسبايدى بەرىپ, تاعدىرىمىز جاراسىپ كەتكەننەن كەيىن بارىپ عانا مەن قازاق تىلىنە نازار اۋدارىپ ۇيرەنە باستادىم. ونىڭ ۇستىنە العاشقى ەڭبەك جولىم دا «تىڭ ولكەسى» گازەتىننەن باستالعان بولاتىن, – دەپ ءسوزىن جالعاستىرعان قازىنا سادۋاقاسقىزى بولاشاق جارىمەن اراداعى بايلانىسىنىڭ قايدان باستالعانىن دا ەسىنە ءتۇسىردى.
جاراسبايمەن 50 جىل ءبىر شاڭىراق استىندا تاتۋ-ءتاتتى تۇرىپ, وتباسىلىق ءومىردىڭ قىزىعىن دا, شىجىعىن دا باستان وتكەردىك. شاڭىراعىمىز شاتتىققا تولىپ, ومىرگە جومارت, جانىبەك ەسىمدى ەكى ۇلىمىز كەلدى. مەن سول ۇلداردان تاراعان نەمەرەلەردى كورىپ وتىرعان اجەمىن. مەنى ايالاپ ارداقتاپ, ەركەلەتىپ جار قىلعان جاراسباي نۇرقانوۆ بولسا, 2011 جىلى 31 مامىر كۇنى ءوزىنىڭ ماڭگىلىك مەكەنىنە اتتانىپ كەتە بەردى. ءومىردىڭ قىسقالىعىن دا مەن سول كەزدە بارىپ ءبىر-اق ءبىلدىم, – دەپ كوز جاسىنا ەرىك بەرگەن ق.نۇرقانوۆا «جاستار جاستىق شاعىنىڭ وزىنە بەرىلگەن مۇمكىندىك پەن بايلىق ەكەنىن بىلسە ەكەن دەيمىن» دەگەن تىلەگىن ايتىپ, اۋىر كۇرسىندى.
ءيا, بۇگىنگى جۋرناليستيكا مەن كەشەگى جۋرناليستيكانىڭ اراسىندا جەر مەن كوكتەي پارىق بار. وسى ورايدا ارداگەر ءجۋرناليسىمىز قازىرگى جۋرناليستەر قانداي بولۋ كەرەك دەگەن سۇراعىمىزدى دا اينالىپ وتپەدى.
– تەك قانا ەڭبەك ادامدى جەتەلەيدى. قازىرگى جۋرناليستەردى مەن بايقايمىن, ءبارى دە تەحنيكا ءتىلىن جاقسى مەڭگەرگەن. بىراق اقپارات اعىنىنا ىلەسىپ, ءوز الدىنا وي قورىتۋ از كورىنەدى. ارينە, مىقتى جۋرناليست بالالارىم بار. دەيتۇرعانمەن دە كىتاپ وقۋ, ىزدەنۋ تۇستارى كەمشىن تارتىپ تۇرادى. ەندى ءبىر جاعىنان جۋرناليست باتىل بولۋ كەرەك. ءوز ويىن ەركىن جەتكىزىپ ايتا ءبىلۋى ماڭىزدى. سەبەبى ءجۋرناليسى جالتاقتاعان ەلدىڭ رۋحانياتى جارىمجان بولادى. ءارى ادام قارتايسا دا, قالام قارتايمايدى. سوندىقتان ءبىزدىڭ قوس قارۋىمىز قالام مەن ءتىل بولعاندىقتان, جۋرناليستەر ۇدايى ىزدەنىس ۇستىندە, قالامىن ۇشتاپ, ءتىلىن ۇستارتىپ جۇرگەنى وزىنە پايدالى, – دەپ جاستارعا اقىل-كەڭەسىن ايتقان قازىنا اپامىز ءوزىنىڭ قازىنالى كەۋدەسىنەن شىققان ىستىق ەستەلىكتەرى مەن ومىردەگى كۇيىنىش, ءسۇيىنىشىن دە اڭگىمەلەپ, ءسوز اراسىندا ەلدىڭ ايەلى التىن-كۇمىس جيناعىش بولسا, مەن كىتاپ جيناعىش ايەل بولدىم دەپ ازىلدەپ تە الدى. مىنە, وسىنداي ءومىرى ونەگەگە تولى قالامىن سەرىك ەتكەن قارت جۋرناليستەردىڭ اۋزىنان شىققان ءاربىر ءسوز جاس تىلشىلەرگە باعدارشام بولارى حاق.
شاپاعات ءابدىر
