بۇرىنعى كەڭەسشىنىڭ ۇستىنەن «ازاپتاۋ» بابى بويىنشا ءىس قوزعالدى, دەپ حابارلايدى astana-akshamy.kz
زاڭدى نەكەدەگى ايەلىن ون جىل بويى ۇرىپ-سوقتى دەگەن كۇدىككە ىلىنگەن قازاقستاندىق ديپلومات ساكەن ماماش سىرتقى ىستەر مينيسترلىگى جۇيەسىندە 19 جىل 6 اي قىزمەت اتقارعان.
«بۇكىل تۋىسى ونىڭ موينىندا وتىردى. ول وتباسىنىڭ, بالالارىنىڭ اۋزىنان جىرىپ, تۋىستارىنا ميلليونداپ اقشا اۋداراتىن. مەن وعان تۋىستارعا اقشا بەرمە دەپ تىيىم سالا المايتىنمىن. مەن تىرناعىمدى جوندەتۋ ءۇشىن اقشا تابا المايتىنمىن», – دەدى كارينا ماماش «Nukte» ارناسىنا بەرگەن cۇحباتىندا.
مامىر ايىنىڭ باسىندا ەل نازارىن اۋدارعان ەكس-مينيستر قۋاندىق بيشىمباەۆتىڭ سوتى ءوتىپ جاتقاندا, تاعى ءبىر مەمقىزمەتكەردىڭ ايەلى كۇيەۋىنەن ۇزاق جىلدار بويى قورلىق كورىپ كەلگەنىن مالىمدەگەن ەدى. كارينا ماماشتىڭ ۆيدەوۇندەۋىنەن كەيىن سىرتقى ىستەر مينيسترلىگى قازاقستاننىڭ ءباا-دەگى ەلشىسىنىڭ كەڭەسشىسى بولعان ساكەن ماماشتى ەلگە قايتارىپ, قىزمەتىنەن بوساتتى. ال جابىرلەنۋشىنىڭ ءوزى بالالارىمەن بىرگە استاناعا ورالدى.
ىشكى ىستەر مينيسترلىگى ايەلدىڭ ارىزىنان كەيىن ساكەن ماماشتىڭ ۇستىنەن «ازاپتاۋ» بابى بويىنشا قىلمىستىق ءىس قوزعالعانىن مالىمدەدى.
وسىعان بايلانىستى Azattyq Ruhy قازاقستاننىڭ ەلشىلەرى مەن ونىڭ كەڭەسشى-كومەكشىلەرىنىڭ اي سايىنعى تابىسىن ءبىلۋدى ءجون كورگەن ەدى. الايدا سىرتقى ىستەر مينيسترلىگى ديپلوماتيالىق قىزمەت پەرسونالىنىڭ جالاقىسى «قۇپيا اقپارات» ەكەنىن مەڭزەدى.
«قر سىرتقى ىستەر مينيسترلىگىنىڭ 2024 جىلعى 29 اقپانداعى № 11-1-4/82 «قازاقستان رەسپۋبليكاسى سىرتقى ىستەر مينيسترلىگىنىڭ تاراتىلۋى شەكتەلگەن قىزمەتتىك اقپارات تىزبەسىن بەكىتۋ تۋرالى» بۇيرىعىنا سايكەس قازاقستان رەسپۋبليكاسىنىڭ شەت ەلدەردەگى ديپلوماتيالىق قىزمەتى پەرسونالىنىڭ ەڭبەك جاعدايلارى قىزمەتتىك بابىندا پايدالانۋ ءۇشىن اقپارات تىزبەسىنە ەنگىزىلىپ, اشىق جاريالاۋعا جاتپايدى», – دەلىنگەن جاۋاپتا.
