اكەلەر كۇنىنە وراي ەلوردانىڭ «جانۇيا» وتباسى ينستيتۋتىن قولداۋ ورتالىعىندا «اكە – شاڭىراقتىڭ تىرەگى» اتتى مەرەكەلىك ءىس-شارا ءوتتى. وتباسى قۇندىلىعىن ناسيحاتتاپ, اكەلەردىڭ قوعامداعى ءرولىن ايقىنداۋعا باعىتتالعان جيىنعا اتالمىش ورتالىق كومەگىنە جۇگىنەتىن اكەلەر قاتىستى.
ءىس-شارادا اكەلەر ينستيتۋتىن دامىتۋ, ولاردىڭ وتباسىنداعى ءرولىن ارتتىرۋ, ءداستۇرلى وتباسى نەگىزدەرىن نىعايتۋ, بالالاردى بىرلەسىپ تاربيەلەۋدىڭ, پاراساتتى دا سانالى اكە بولۋدىڭ جولىن ناسيحاتتاۋ باعىتىندا بىرقاتار سپيكەر ءسوز الدى. سولاردىڭ قاتارىندا «سەنىمەن بولاشاق» رەسپۋبليكالىق قوعامدىق بىرلەستىگى استانا قالالىق فيليالىنىڭ اتقارۋشى ديرەكتورى شەرحان اراپباي, «جانۇيا» وتباسى ينستيتۋتىن قولداۋ ورتالىعىنىڭ اقپارات تەحنولوگيالارى ءبولىمىنىڭ باسشىسى بەرىك نۇرداۋلەتوۆ جانە استانا قالاسى «اكەلەر كەڭەسىنىڭ» توراعاسى جانە س.سەيفۋللين اتىنداعى №80 مەكتەپ-گيمنازياسى «اكەلەر كەڭەسىنىڭ» توراعاسى جالعاس قۇسپەكوۆ بولدى.
– اكە بولۋ مىندەتى – ادامعا اتا-انا رەتىندە جۇكتەلەتىن ۇلتتىق مادەنيەتتىڭ جۇيەسى. ءبىر اكەنىڭ تاربيەسىن ءجۇز مەكتەپ بەرە المايدى دەيمىز. ياعني ەر-ازاماتتىڭ ءوز بالالارىنا قاتىستى تاربيە جۇمىسىنا بەلسەنە ارالاسۋى ارقىلى ءوز ءرولىن جاقسى تۇسىنەتىن اكەلەردىڭ تۇلعاسى قالىپتاسادى. ولار ۇل-قىزدارىنىڭ ەرجەتىپ ەسەيگەنىنە ءمان بەرمەيتىن, كۇندەلىكتى تاربيەسىنە ارالاسپايتىن, ءوز جاۋاپكەرشىلىگىنە بەي-جاي قارايتىنداردىڭ سانىن ازايتىپ, ءتىپتى اكەلىك مىندەتىنەن باس تارتقىسى كەلەتىندەرگە ۇلگى بولىپ, ونىڭ جولىن كورسەتەدى. بۇگىندە ەر-ازاماتتار اكەلىك مىندەتتى الدىمەن اناسىنا, سوسىن بالاباقشاداعى تاربيەشىگە, ءتۇرلى قوعامدىق ۇيىمعا ودان قالدى مەكتەپ مۇعالىمى, تاعى سول سياقتى تەك وزىنەن باسقاسىنا ءىلىپ قويدى. مۇندا باستىسى ولار ءوزىن تۇزەمەسە, بالاسىن دا تۇزەي المايتىنىن ءتۇسىنۋ كەرەك, – دەدى ج.قۇسپەكوۆ.
استانا قالاسى اكىمدىگىنىڭ «جانۇيا» وتباسى ينستيتۋتىن قولداۋ ورتالىعى» كمم كوپبالالى, تولىق ەمەس, جاعدايى تومەن وتباسىلارعا, مۇگەدەك بالا تاربيەلەپ وتىرعان وتباسىلارعا جانە مۇمكىندىگى شەكتەۋلى جاندارعا كەشەندى كەڭەس بەرۋ قىزمەتىن كورسەتەدى. ورتالىق كومەگىنە جۇگىنگەندەردىڭ ءبىرى – ەلوردانىڭ سارىارقا اۋدانىنىڭ تۇرعىنى ايتباي جاقسىباەۆ.
«مەن ءۇش بالانىڭ اكەسىمىن. جالعىزباستى اكە بولعان سوڭ, «جانۇيا» وتباسى ينستيتۋتى قولداۋ ورتالىعى كورسەتكەن كومەكتىڭ يگىلىگىن كورىپ وتىرمىز. بىزگە ازىق-تۇلىك سەبەتى بەرىلىپ, ۇنەمى وسىنداي جيىنداردان قالىس قالدىرمايدى. بۇل جيىندا جاۋاپتى اكە بولۋدىڭ ماڭىزى تۋرالى تولىمدى پىكىرلەر ايتىلدى» دەدى ول.
