استانا قالاسى ەسىل اۋداندىق پوليتسيا ءبولىمىنىڭ تەرگەۋشىسى,
پوليتسيا اعا لەيتەنانتى نۇرلان احمەت:
«مەن ىشكى ىستەر ورگاندارىنداعى قىزمەتىمدى اكەمنىڭ جولىمەن, الدىمەن كۋرسانت بولىپ باستادىم. ورتا مەكتەپتى بىتىرگەننەن كەيىن قازاقستان رەسپۋبليكاسى ىشكى ىستەر مينيسترلىگىنىڭ ۆەدومستۆولىق جوعارى وقۋ ورنىنا ءتۇسىپ, وندا 4 جىل ءبىلىم الدىم.
مەنىڭشە, ءبىزدىڭ قىزمەتىمىزدەگى ەڭ باستى نارسە – قيىن جاعدايلاردا كومەك سۇراعان قالا تۇرعىندارىنىڭ شىنايى العىسى. ول ءۇشىن پوليتسيا قىزمەتكەرىنىڭ وي-ءورىسى وتكىر, تاپقىرلىعى جوعارى, قىزمەت بارىسىندا كەزدەسەتىن بارلىق قيىندىقتارعا ءتوزىمدى بولۋى كەرەك.
اكەم ماعان پوليتسيا قىزمەتكەرى بولۋ جاي جۇمىس ەمەس, ءومىر سالتى ەكەنىن ۇنەمى ايتىپ وتىراتىن. ماماندىعىمىزداعى ەڭ باستىسى – ادالدىق, شىنايى بەرىلگەندىك, ادامدارعا كومەكتەسۋگە دەگەن قۇلشىنىس ەكەنىن ۇيرەتتى.
اكەمنىڭ دانالىعى مەن وسيەتتەرى ومىرىمدەگى باستى باعدار بولدى. مەن اكەمنىڭ پوليتسيا قىزمەتكەرى بولعانىن ارقاشان ماقتان تۇتاتىنمىن. ول – مەن ءۇشىن ادىلدىك پەن ادالدىقتىڭ تاماشا ۇلگىسى.
اكەم احمەتوۆ بەرىك قۇشقارۇلى سانالى عۇمىرىن قۇقىق ءتارتىبىن ساقتاۋعا ارنادى» دەيدى ول.
اكەسى ىشكى ىستەر ورگاندارىندا 25 جىلدان استام ەڭبەك ەتىپ, كوپتەگەن مەدالدارمەن, ماقتاۋ قاعازدارىمەن ماراپاتتالعان. قىزىلوردا وبلىسى ىشكى ىستەر دەپارتامەنتىنىڭ انىقتاۋشىدان قىلمىستىق ىزدەستىرۋ ءبولىمىنىڭ باستىعىنا دەيىن ءتۇرلى قىزمەتتەردى اتقارعان. وتانى مەن قوعام يگىلىگى ءۇشىن ادال قىزمەت ەتىپ, پوليتسيا پودپولكوۆنيگى شەنىمەن زەينەتكەرلىككە شىقتى. اكەم باستاعان ۇلكەن قىزمەتتى جالعاستىرىپ, اۋلەتتىڭ وكىلى بولعانىمدى ماقتان ەتەمىن.
