قازاق ءۇشىن قارا شاڭىراق ۇعىمى نەنى بىلدىرەدى؟ اكەنىڭ وتباسىنداعى, جالپى ەر-ازاماتتاردىڭ قوعامداعى ورنى قانداي؟ بالالار اۋىلدى, تۋعان ءۇيىن تاستاپ, نەگە قالاعا كەتەدى؟ جاقىندا ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترىندا پرەمەراسى وتكەن «پاتشا كوڭىلىم, نە دەيسىڭ؟!» كومەدياسى, نەگىزىنەن, وسى ساۋالدارعا جاۋاپ ىزدەيدى. تۋىندى اۆتورى – حالىقارالىق «الاش» ادەبي سىيلىعىنىڭ يەگەرى قۋانىش جيەنباي, قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى نۇرلان جۇمانيازوۆ.
قازاق بالالارىنىڭ ەسىمىن ۇيقاستىرىپ قويادى. اعايىندى باقبەرگەن, اقبەرگەن, شىمبەرگەن, كۇنبەرگەن جانە 4 ۇلدىڭ ورتاسىندا جالعىز گۇل بولىپ وسكەن گۇلجاميلا – قالا تۇرعىندارى. ولاردىڭ قارا شاڭىراققا ات ءىزىن سالماي كەتكەنىنە كوپ ۋاقىت بولدى. وسى جاعداي اۋىلدا قالعان اتا-اناسى ءابدىراسىل مەن شامشاگۇلدىڭ جانىنا قاتتى باتادى. اسىرەسە اكەنى ويلاندىرادى. ونىڭ ۇستىنە اۋىلداستارى بالالارىنىڭ كەلمەيتىنىن بەتىنە باسادى. اكە سوعان نامىستانىپ ءارى پەرزەنتتەرىنە ساعىنىشى ۇدەپ, ءبىر قۋلىق ويلاستىرادى. قارتتارعا قارايلاسىپ وتىرعان كورشىلەرى قويلىبايعا «بالالارىما تەلەفون شالىپ, مەنى ءولدى دەپ حابارلا» دەپ ايتادى. قويلىباي باسىندا ازار دا بەزەر بولادى. بىراق قاريا ونى كوندىرەدى.
جامانات حابار جەتكەن بالالار كەلىندەرىمەن بىرگە جىلاپ-سىقتاپ اتا-انانىڭ شاڭىراعىنا كەلەدى. ولاردى قويلىباي قارسى الادى. سويتسە, انالارىنىڭ ۇيدەگى ءتورت تۇلىككە قاراۋدان قولى بوسامايدى. قويىلىمدا ەنە مەن كەلىندەردىڭ ماسەلەسى دە قوزعالادى. ءتورت كەلىن دە ءارتۇرلى سىلتاۋ ايتىپ, ەنەنى قولىنا العىسى كەلمەيدى. قازاق «قىز – باۋىرمال», «قىز – جاناشىر» دەپ جاتادى, گۇلجاميلا «انامدى ءوزىم الىپ كەتەمىن» دەيدى. ال اكەنىڭ ءتىرى ەكەنى انىقتالىپ, شىندىق اشىلعاندا, ءابدىراسىلدىڭ وتىرىككە بارعانى مىنا مونولوگپەن بەرىلەدى:
«سەندەردىڭ وكپەلەيتىندەرىڭدى بىلگەم. بىراق مەنىكى قايبىر دانىشپاندىق دەيسىڭ؟! ويلاپ تاپقان امالىم وسى. ايىنا, جىلىنا ءبىر رەت توبە كورسەتسەڭدەر قايدا قالدىڭدار؟! اتتىڭ تەرى سىڭگەن ەر-توقىمعا جىلان جولامايدى. قۇرت-قۇمىرسقا, جىن-شايتان و باستان. سول سياقتى اكە-شەشەنىڭ تۇرعان شاڭىراعىندا ەشنارسەگە ۇقسامايتىن عاجاپ ءبىر ءتاتتى ءيىس بار. «ءولىپ», سەندەردى شاقىرىپ العانداعى سەبەبىم, ماقساتىم ءبىر-ەكى كۇن اۋناپ-قۋناپ, سول ءيىستى سەزىنسە دەدىم. ال بىراق ول ءيىستى سەندەردىڭ ۇمىتقاندارىڭ قاشان… بوتەن ويىم جوق, مۇمكىن اكەلىك ساعىنىش دەگەن وسى شىعار. پاتشا كوڭىلدىڭ نە ويلايتىنىن كىم ءبىلسىن, قاراقتارىم».
ءسويتىپ, كۇلدىرىپ وتىرىپ جىلاتاتىن قويىلىمدا درامالىق كورىنىستەر مولىنان كەزدەسەدى. سپەكتاكلگە ادەتتەگىدەي ەكى اكتەرلىك قۇرام تارتىلعان. قوس قۇرامدا اكە مەن انا بەينەسىن قازاقستاننىڭ ەڭبەك سىڭىرگەن قايراتكەرلەرى اقىش ومار, بورانباي مولداباەۆ, لەيلو بەكنازار جانە مايرا ومار سومدايدى. قويلىباي ءرولىن قازاقستاننىڭ ەڭبەك سىڭىرگەن قايراتكەرى اسىلبەك قاپاەۆ پەن كومەديالىق كەيىپكەرلەر وڭ جامباسىنا كەلەتىن داستان ءالىموۆ وينايدى. ال بالالار مەن كەلىندەردىڭ بەينەسى قازاقستاننىڭ ەڭبەك سىڭىرگەن قايراتكەرلەرى جانقالدىبەك تولەنباەۆ, ەرلان مالاەۆ, التىناي نوگەربەك, سىرىم قاشقاباەۆ سىندى تانىمال اكتەرلەرمەن قاتار تەاتردىڭ بەلگىلى ارتىستەرى مەن جاستارعا جۇكتەلگەن. ولاردىڭ اراسىندا ءبولىپ-جاراتىنى جوق, ءبارى بەكىتىلگەن رولدەرىن جاقسى ويناپ شىقتى. ساحنانىڭ ادەمى بەزەندىرىلۋىن دە اتاپ ءوتۋ كەرەك. بۇل – قويۋشى-سۋرەتشى تيمۋر قوەسوۆتىڭ ەڭبەگى. كومپوزيتور قايرات توقىمبەتوۆتىڭ مۋزىكاسى دا كورەرمەندى اسەرلەندىرەدى.
ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترى جاڭا جىلدا العاشقى قويىلىمىن 10 قاڭتار كۇنى ۇسىنادى. ال «پاتشا كوڭىلىم, نە دەيسىڭ؟!» كومەدياسىن 13-14 قاڭتار كۇندەرى تاماشالاۋعا بولادى.
