گەرمانيادا باستالعان ەۋروپا چەمپيوناتىندا ءبىرىنشى تۋردىڭ ويىندارى ءوتىپ جاتىر.
ەۋروپانىڭ 24 ۇلتتىق قۇراماسى سىنعا ءتۇسىپ جاتقان بايراقتى باسەكەدە الدىن الا ۇزدىك دەپ تانىلعان كوماندالار جەڭىسكە جەتتى. ماسەلەن, چەمپيوناتتىڭ شىمىلدىق اشار ويىنىندا گەرمانيا قۇراماسى شوتلانديا كومانداسىن 5:1 ەسەبىمەن جەڭسە, شۆەيتساريا ۆەنگريا قۇراماسىن 3:1 ەسەبىمەن تىزە بۇكتىردى. ەڭ تارتىستى ويىننىڭ ءبىرى يسپانيا مەن حورۆاتيا اراسىندا بولادى دەگەن بولجام اقتالمادى. يسپاندىقتار قارسىلاسىنىڭ قاقپاسىنا جاۋاپسىز 3 دوپ سوعىپ, حورۆاتتاردى جەرگە قاراتتى. وسىنداي كۇتپەگەن جاعداي رۋمىنيا-ۋكراينا كەزدەسۋىندە ورىن الدى. بۇل ويىندا رۋمىندار 3 گول سوعىپ, ۋكرايندىقتاردىڭ ساعىن سىندىردى. كۇتپەگەن جەردەن سلوۆاكيا قۇراماسى بەلگيانى 1:0 ەسەبىمەن ۇتىپ كەتتى. سونداي-اق ءبىرىنشى تۋردا پورتۋگاليا چەحيانى, تۇركيا گرۋزيانى, فرانتسيا اۆستريانى, گوللانديا پولشانى, يتاليا البانيانى ۇتتى.
كەشە ەكىنشى تۋردىڭ ويىندارى باستالدى. ەندىگى ويىندار تىپتەن قىزىق بولاتىنى ءسوزسىز. ويتكەنى ۇپايسىز قالعان كوماندالار بارىن سالاتىنى انىق.
باسەكەگە تۇسكەن 24 كوماندا 6 توپقا بولىنگەن, ءار توپتان ءبىرىنشى جانە ەكىنشى ورىن العان 12 كوماندا شيرەك فينالعا شىعادى. ولارعا ۇزدىك ۇپايمەن ءۇشىنشى ورىن العان ءتورت كوماندا قوسىلادى. دەمەك, گەرمانيا الاڭدارىنداعى ءاربىر ويىن تارتىستى بولماق.
