ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ كامەرالىق زالىندا كومپوزيتور, قر ەڭبەك سىڭىرگەن قايراتكەرى, قر مەملەكەتتىك سىيلىعىنىڭ لاۋرەاتى تولەگەن مۇحامەدجانوۆ قازاقستان كومپوزيتورلار وداعىنىڭ 85 جىلدىعىنا ارنالعان «مەنىڭ جان سەرپىنىم!» اۆتورلىق كەشى ءوتتى.
تولەگەن مۇحامەدجانوۆ – بەلگىلى كومپوزيتور, قازاقستاننىڭ ەڭبەك سىڭىرگەن قايراتكەرى, قر مەملەكەتتىك سىيلىعىنىڭ لاۋرەاتى. سيمفونيالار, وپەرالار, مۋزىكالىق كومەديالار, ىشەكتى كۆارتەتتەر, سيمفونيالىق شىعارمالار, اباي ولەڭدەرىنە ارنالعان ۆوكالدىق توپتامالار, رومانستار, اندەر, كينو مەن تەاترعا ارنالعان مۋزىكالاردىڭ اۆتورى. ول الماتى جانە ماسكەۋ كونسەرۆاتوريالارىندا, الما-ماتەردە وقىتۋشىلىق قىزمەتىن اتقاردى, ونىڭ باسشىلىعىمەن قازاقستاننىڭ ءىرى مادەني مەكەمەلەرى جۇمىس ىستەدى, ونىڭ باسشىلىعىمەن ەلىمىزدىڭ كوپتەگەن شىعارماشىلىق ۇجىمدارى پايدا بولدى. تولەگەن مۇحامەدجانۇلىنىڭ رەسپۋبليكانىڭ مادەنيەتى مەن ونەرىن دامىتۋعا قوسقان ۇلەسى وراسان زور.
فيلارمونيانىڭ كامەرالىق زالىندا وتكەن كومپوزيتوردىڭ كونتسەرتتىك باعدارلاماسىندا فيلارمونيا ورىنداۋشىلارى, ۆيرتۋوز-اسپاپشىلار مەن كامەرالىق انسامبلدەر كامەرالىق-اسپاپتىق جانە ۆوكالدىق شىعارمالاردى ورىندادى.
ع.جۇبانوۆانى ەسكە الۋعا ارنالعان № 1 ىشەكتى كۆارتەتتى كومپوزيتور ەلدەگى بىرەگەي كامەرالىق ۇجىم – ع.جۇبانوۆا اتىنداعى مەملەكەتتىك ىشەكتى كۆارتەت ءۇشىن ارنايى جازعان جانە كورنەكتى كومپوزيتور عازيزا جۇبانوۆانى ەسكە الۋعا ارنالعان. كۆارتەتتىڭ كوركەمدىك جەتەكشىسى – قر ەڭبەك سىڭىرگەن قايراتكەرى ەرنار مىڭتاەۆ.
فورتەپيانوعا ارنالعان «ميمولەتنوستي» فورتەپيانو تريوسىن FORTE TRIO قر مەملەكەتتىك تريوسى ورىندادى. كوركەمدىك جەتەكشىسى – قر ەڭبەك سىڭىرگەن قايراتكەرى تيمۋر ۋرمانچەەۆ.
جەكە فلەيتاعا ارنالعان سوناتينانى قازاقستاننىڭ ەڭبەك سىڭىرگەن قايراتكەرى بەكبولات بايساعاتوۆ تاماشا ورىنداپ, كورەرمەندەردى ءسۇيسىنتتى.
«7 ستيحوتۆورەني لي-بو» ۆوكالدىق توپتاماسىمەن حالىق الدىنا شىققان قازاقستان مەن تاتارستاننىڭ حالىق ءارتىسى, مەملەكەتتىك سىيلىقتىڭ لاۋرەاتى, «قۇرمەت» وردەنىنىڭ يەگەرى, سيرەك سوپرانو يەسى نۇرجامال ۇسەنباەۆا عاجايىپ اسەر قالدىردى. ەلوردالىق كورەرمەندەر اباي ولەڭدەرىنە ارنالعان ۆوكالدىق توپتامانى «دارىن» مەملەكەتتىك جاستار سىيلىعىنىڭ يەگەرى التىنبەك ءابىلدانىڭ ورىنداۋىندا تاماشالاسا, «ميمولەتنوستي» كومپوزيتسياسىن حالىقارالىق بايقاۋلاردىڭ لاۋرەاتى زارينا اكاەۆا فورتەپيانودا ورىندادى.
ۆوكالدىق توپتامالار كونتسەرتمەيستەرى رەتىندە مادەنيەت سالاسىنىڭ ۇزدىگى, كلاسسيكالىق ۆوكال ءبولىمىنىڭ كوركەمدىك جەتەكشىسى روزا شوتقاليەۆا ونەر كورسەتتى.
