استانا IBO-2024 ءبىلىم دوداسىنا دايىندالۋدا. جاقىندا ەلورداعا وقۋشىلار اراسىنداعى ەڭ بەدەلدى وليمپياداعا الەمنىڭ جاس بيولوگتارى كەلەدى, دەپ حابارلايدى astana-akshamy.kz.
بيىل 1-14 ماۋسىمى ارالىعىندا استانا قالاسىندا IBO-2024 بيولوگيادان حالىقارالىق 35-ءشى وليمپيادا وتەدى. وعان الەمنىڭ 81 ەلىنەن 300-دەن استام وقۋشى جانە 500-دەن استام عىلىمي جەتەكشى قاتىسادى دەپ كۇتىلۋدە.
وليمپيادا نازارباەۆ ۋنيۆەرسيتەتىندە وتەدى, وقۋشىلار تەوريالىق جانە ءتورت پراكتيكالىق كەزەڭدەر بويىنشا باق سىناسادى. ونىڭ ىشىندە بيوحيميا, مولەكۋليارلىق بيولوگيا, بيوينفورماتيكا, جالپى اناتوميا جانە فيزيولوگيا بار.
«جاس عالىمدار مەن حالىقارالىق وليمپيادالاردىڭ قازاقستاندىق جەڭىمپازدارىنان قۇرىلعان IBO-2024 عىلىمي كوميتەتى ەكى كەزەڭنىڭ تاپسىرمالارىن ازىرلەپ, سترەسس-تەستىلەۋ وتكىزدى. وليمپياداعا قاتىسۋشىلار مەن كوماندالاردىڭ جەتەكشىلەرى ءۇشىن ءتۇرلى شارالار, ونىڭ ىشىندە استانا قالاسى مەن بۋرابايدىڭ كورىكتى جەرلەرىنە ەكسكۋرسيا ۇيىمداستىرۋ جوسپارلانعان. سونداي-اق ولار ءۇشىن كاسىبي تۇرعىدا تاجىريبە الماسۋ الاڭدارى, سەمينارلار, ترەنينگتەر ۇيىمداستىرىلادى», – دەپ اتاپ ءوتتى «دارىن» رعپو-نىڭ ديرەكتورى عاجدەمبەك تۇرسىنوۆ.
بيولوگيادان حالىقارالىق وليمپيادا (IBO) – بۇل ورتا مەكتەپ وقۋشىلارىنا ارنالعان بەدەلدى ءبىلىم دوداسى. ءاربىر قاتىسۋشى مەملەكەتتىڭ كومانداسىندا ءتورت وقۋشىدان بولادى. العاش رەت IBO 1990 جىلى چەحيادا التى مەملەكەتتىڭ قاتىسۋىمەن ءوتتى. ماقسات – بيولوگيالىق زەرتتەۋلەرگە قىزىعۋشىلىقتى ىنتالاندىرۋ, 15- 21 جاس ارالىعىنداعى دارىندى جاستاردىڭ ءوزارا يدەيا الماسۋىنا جول اشۋ. قازاقستاندىق وقۋشىلار بۇل عىلىمي دوداعا 1996 جىلدان باستاپ قاتىسا باستادى. بۇگىنگە دەيىن 2 التىن, 20 كۇمىس, 54 قولا مەدال جانە 14 قۇرمەت گراموتاسى قانجىعالانىپ, بۇل سالادا قازاقستاندىقتاردىڭ جوعارعى جەتىستىككە جەتكەنىن ايعاقتادى.
