اسكەري بورىشىن وتەۋشىلەر نەسيە تولەۋدەن بوساتىلۋى مۇمكىن

قازاقستاندا اسكەري مىندەتىن اتقارىپ جۇرگەندەر قىزمەتىنىڭ مەرزىمى مەن تاعى قوسىمشا 60 كۇنگە قارىزدارى مەن نەسيەلەرىن وتەۋدەن بوساتىلۋى مۇمكىن.

ءتيىستى قاۋلى جوباسى «اشىق نقا» پورتالىندا جاريالانعان, ونى قازاقستاننىڭ قورعانىس مينيسترلىگى ازىرلەدى.

قاۋلى جوباسىنىڭ قۇجاتىنداعى اقپاراتقا سايكەس, «قازاقستان رەسپۋبليكاسىنىڭ ازاماتتارىن اسكەري قىزمەتكە شاقىرۋدى ۇيىمداستىرۋ مەن جۇرگىزۋ قاعيدالارىن بەكىتۋ تۋرالى» ۇكىمەتتىڭ 2012 جىلعى 15 مامىرداعى №620 قاۋلىسىنا تولىقتىرۋ ەنگىزۋ جوسپارلانىپ جاتىر.

جوباعا قوسا بەرىلگەن تۇسىندىرمە قۇجاتىنا سۇيەنسەك, اتالعان قاۋلىنى قولدانىستاعى زاڭدا قاراستىرىلماعان تارماقپەن تولىقتىرۋ ۇسىنىلعان. ياعني بۇل مەرزىمدى اسكەري قىزمەتشىلەردىڭ نەسيەلەرى مەن قارىزدارىنا قاتىستى.

«قازاقستان رەسپۋبليكاسىنىڭ زاڭناماسىنا سايكەس مەرزىمدى اسكەري قىزمەتتەگى اسكەري قىزمەتشىلەردىڭ مەرزىمدى اسكەري قىزمەت وتكەرۋ مەرزىمى جانە ونى اياقتاعاننان سوڭ 60 كۇن قوسا الىناتىن كەزەڭدە بانكتىك قارىز شارتى جانە (نەمەسە) ميكروكرەديت بەرۋ تۋرالى شارت بويىنشا قارىزى جانە (نەمەسە) ميكروكرەديتى بويىنشا سىياقى ەسەپتەلمەي, نەگىزگى بورىش پەن سىياقى بويىنشا تولەمى كەيىنگە قالدىرىلادى», – دەپ جازىلعان قاۋلى جوباسىنىڭ تۇسىندىرمە قۇجاتىندا.