استانادا زاڭعار جازۋشى مۇحتار اۋەزوۆتىڭ ەسكەرتكىشى جوق. بىلتىر كلاسسيكتىڭ 125 جىلدىعى تۇسىندا «استانا اقشامى» گازەتى قالامگەردى باس قالادا تۇعىرعا قوندىرۋ تۋرالى باستاما كوتەردى. الدىمەن شولۋشى ايگۇل ۋايستىڭ «باس قالاعا اۋەزوۆ قاشان كەلەدى؟» (№28 (4306), 10 ناۋرىز, 2022 جىل) ماقالاسى شىقتى. ودان كەيىن حات تۇرىندە جازىلىپ, «دات» ايدارىمەن جارىق كورگەن «ەلورداعا اۋەزوۆ ەسكەرتكىشى كەرەك» (№115 (4393), 29 قىركۇيەك, 2022 جىل) ماتەريالىنىڭ سوڭىنا اكىم تارازي, قويشىعارا سالعاراۇلى, تۇرسىن جۇرتباي, ءۋاليحان قاليجان باستاعان كورنەكتى قالامگەرلەر مەن عالىمدار, استانا قالاسى قوعامدىق كەڭەسىنىڭ مۇشەلەرى, باس-اياعى 12 ادام قول قويدى. بىراق بيىل ۇكىمەت نازارىنا السا دەگەن نيەتپەن باسىلىمىمىزدىڭ باس رەداكتورى ەركىن قىدىردىڭ «ۇلى تۇلعا ەل تورىندە تۇرسا…» (№132 (4565), 7 قاراشا, 2023 جىل) ماتەريالى جارىق كورگەن سوڭ سەڭ قوزعالدى.
جىل سوڭىندا بىزگە اقجولتاي اقپارات كەلىپ جەتتى. استانا قالاسىنىڭ مادەنيەت باسقارماسى مۇحتار اۋەزوۆ ەسكەرتكىشىنىڭ ۇزدىك جوباسىنا بايقاۋ جاريالادى. ەسكەرتكىش تاقىرىپقا ساي, ماعىنالى جانە كوركەمدىك دەڭگەيى جوعارى بولۋى ءتيىس. كونكۋرسقا كوركەم-ءوندىرىس شەبەرحانالارى, زاڭدى جانە جەكە تۇلعالار قاتىسا الادى. بايقاۋ ەرەجەسىن اتالمىش باسقارماعا حابارلاسىپ, بىلۋگە بولادى. ەسكەرتكىشتىڭ جوباسى مەن قۇجاتتارىن قابىلداۋدىڭ سوڭعى كۇنى – 2024 جىلدىڭ 25 قاڭتارى. بۇل – «استانا اقشامى» گازەتى كوتەرگەن ماسەلە شەشىمىن تاپتى دەگەن ءسوز. مۇحتار اۋەزوۆتىڭ الاش قايراتكەرلەرىمەن پىكىرلەس, مۇددەلەس بولعانى بەلگىلى. سولارمەن قاتار قۋعىن-سۇرگىن دە كوردى. سول كەزدە احمەت بايتۇرسىنۇلىنىڭ اۋەزوۆكە «سەندەر كەشىرىم سۇراڭدار, امان قالىڭدار» دەگەنى جونىندە دەرەك كەزدەسەدى. جازۋشى ونىڭ اقىلىن تىڭداپ, امان قالدى. ەسەسىنە ۇلت ادەبيەتى مەن رۋحانياتىنا ولشەۋسىز ۇلەس قوستى. باسقا ەڭبەكتەرىن ايتپاعاندا, قازاققا عانا ەمەس, الەمگە ۇلى ابايدى تانىتىپ كەتتى. ەندەشە ەسكەرتكىشى ەلوردا تورىندە قاسقايىپ تۇراتىن رەتى بار. ءتيىستى شەشىم شىقتى. ەندى «استانا اقشامى» گازەتى ءوزى كوتەرگەن ماسەلەنىڭ تەزىرەك ورىندالعانىن سۇيىنشىلەيتىن كۇن كەلسىن دەپ تىلەيمىز.
