استاناداعى م.اۋەزوۆ اتىنداعى №86 مەكتەپ-گيمنازيا جانىندا بالالاردىڭ جازعى دەمالىسىن ءتيىمدى ۇيىمداستىرۋ ماقساتىندا جازعى «سارىجايلاۋ» ەتنولاگەرى جۇمىس ىستەپ جاتىر. لاگەر جۇمىسى 1 ماۋسىمدا باستالدى.
ەتنولاگەردى ۇيىمداستىرۋداعى ماقسات – ۇلتتىق سانا-سەزىمى قالىپتاسقان, ۇلتتىق جانە جالپىادامزاتتىق قۇندىلىقتاردى ءوزارا ۇشتاستىرا الاتىن ۇلتجاندى تۇلعا تاربيەلەۋ. قازىرگى ەكىنشى كەزەڭدە وقۋشىلار دەمالۋمەن قاتار ۇلتتىق داستۇرلەرىمىزدى تانىپ, ءبىلىپ, مەڭگەرۋدە.
– ءتىلىمىزدى, ءدىنىمىزدى, ونەرىمىزدى وقۋشىلار بالا كۇنىنەن باستاپ بويىنا ءسىڭىرۋ كەرەك. سوندا ءبىز ناعىز قازاقتى, ۇلتجاندى ازاماتتى, ۇلتتى كوركەيتەتىن قىز بەن ۇلدى تاربيەلەيمىز دەپ ويلايمىن. شەبەر مۇعالىمدەرىمىز, اجەلەر قاۋىمى وسكەلەڭ ۇرپاققا كيىز باسۋدى, ءجۇن ءتۇتۋدى, قامشى ءورۋدى, باسقا دا قولونەردى, تەرىمەن جۇمىس ىستەۋدى, ۇلتتىق تاعامداردى دايىنداۋدى ۇيرەتەدى, – دەدى م.اۋەزوۆ اتىنداعى №86 مەكتەپ-گيمنازيا ديرەكتورى گۇلميرا ورالقىزى.
«سارىجايلاۋ» ەتنولاگەرىندە ءبىرىنشى ماۋسىمدا 300-گە جۋىق وقۋشى دەمالدى. ال قازىر ءجۇرىپ جاتقان ەكىنشى ماۋسىمدا 200-گە تارتا وقۋشى قامتىلدى. ەتنولاگەرگە 1-8-سىنىپتىڭ وقۋشىلارى بارىپ ءجۇر. مەكتەپ اۋلاسىنا 2 كيىز ءۇي تىگىلگەن.
كۇن ءتارتىبى تاڭعى بيمەن باستالىپ, لاگەردە دەمالۋشىلار «قارا جورعا» ءبيىن بيلەيدى. ودان كەيىن «سالت-داستۇرلەردى ۇيرەنۋ», «قولونەر», «ۇلتتىق تاعامدار», «قىش ونەرى» سياقتى شەبەرلىك ساباقتارى وتەدى. بۇعان قوسا, «ۇلتتىق ءداستۇرىن ۇلىقتاعان ۇرپاق» تاقىرىبىندا «اجەلەر مەكتەبىنىڭ» ساباقتارى, توعىزقۇمالاق, بەس اسىق سەكىلدى ۇلتتىق ويىندار, روبوتوتەحنيكا جانە STEM ساباقتارى, دومبىرا مەن ءان ساباقتارى ۇيىمداستىرىلادى.
