حالىقارالىق بالالاردى قورعاۋ كۇنىندە استاناداعى بەيبىتشىلىك جانە كەلىسىم سارايىندا «AIALA» ارت-ەكوفەستيۆالىنىڭ سالتاناتتى اشىلۋ ءراسىمى ءوتتى, دەپ حابارلايدى astana-akshamy.kz
ءىس-شارانىڭ ۇيىمداستىرۋشىلارى – مادەنيەت جانە اقپارات مينيسترلىگى مەن «ازاماتتىق باستامالاردى قولداۋ ورتالىعى» كەاق.
بالالار مەن جاستاردىڭ اراسىندا ەكولوگيا تاقىرىبىنداعى شىعارماشىلىق باستامالاردى قولداۋدى ماقسات ەتكەن ءداستۇرلى فەستيۆالدە 8, 9, 10 سىنىپ وقۋشىلارى اراسىنداعى رەسپۋبليكالىق بايقاۋ جەڭىمپازدارى ماراپاتتالدى. ۇيىمداستىرۋشىلار بايقاۋعا بارلىق وڭىردەن 250-دەن استام ءوتىنىش تۇسكەنىن ايتادى.
6 باعىت بويىنشا اقتىق سايىسقا شاقىرىلعان 36 ۇمىتكەردىڭ ىشىنەن ۇزدىك شىققان 6 جەڭىمپازعا «حالىق» قايىرىمدىلىق قورىنىڭ اتىنان 1 ملن تەڭگەدەن سىياقى بەرىلدى.
«AIALA» ارت-ەكوفەستيۆالى 3 كۇن بويى وتەدى. ءىس-شارا اياسىندا بالالارعا كەسكىندەمە, ماكۋلاتۋرانىڭ كومەگىمەن ونەر نىساندارىن قۇرۋ, قارجىلىق ساۋاتتىلىق جانە كيىز باسۋ سىندى باعىتتاردا شەبەرلىك ساعاتتارى وتكىزىلەدى.
ەكولوگيالىق فەستيۆالدى مادەنيەت جانە اقپارات مينيسترلىگىنىڭ جانە ازاماتتىق باستامالاردى قولداۋ ورتالىعىنىڭ ۇيىمداستىرعانىن ايتا كەتۋ كەرەك.
