بۇگىندە بەلسەندى ۇزاق ءومىر ءسۇرۋ ورتالىعىنىڭ دەنە شىنىقتىرۋ ينسترۋكتورلارى «ايكۇنە» جاتتىعۋىنىڭ نەگىزىن قالاعان اۆتور اباي بايماعامبەتوۆتىڭ وزىنەن ءدارىس الۋدا. «ايكۇنە» مەتوديكاسىنا وقىتۋ 20 كۇنگە سوزىلادى, دەپ حابارلايدى astana-akshamy.kz.
استانا قالاسى اكىمدىگىنىڭ بەلسەندى ۇزاق ءومىر ءسۇرۋ ورتالىعىنىڭ 9 دەنە شىنىقتىرۋ ينسترۋكتورى اۆتوردىڭ ارنايى كۋرسىن وقىپ, ساۋىقتىرۋعا اينالعان جاتتىعۋ تاسىلدەرىن ۇيرەنۋدە.
قازاق جاتتىعۋىنىڭ اۆتورى, سىنىقشى, اتا-باباسىنىڭ ءىزىن جالعاستىرعان ەمشى اباي بايماعامبەتوۆ ءبۇوسو-نىڭ ديرەكتورى مۇحتار ەركەتاەۆقا قايىرىمدىلىق سەرتيفيكاتىن تابىس ەتىپ, ەگدە جاستاعى ادامداردىڭ بيولوگيالىق جاسىن تومەندەتۋ جولىندا بىرلەسىپ جۇمىس اتقاراتىنىنا سەنىم ءبىلدىردى.
بۇنداي وقىتۋ كۋرسى قايىرىمدىلىق باستامالار نەگىزىندە ۇيىمداستىرىلىپ, 5 جىلعا دەيىن جالعاساتىن بولادى.
ورتالىق باسشىسى مۇحتار دۇيسەنۇلى وسىنداي قايىرىمدىلىق شاراسىن ۇيىمداستىرۋعا مۇرىندىق بولعان اباي اقاتۇلىنا العىسىن ايتىپ, ۇلت ساۋلىعى ءۇشىن اتقارىپ جاتقان ەڭبەگىنە جەمىس تىلەدى.
كەزدەسۋگە كەلگەن زەينەتكەرلەر قازاق گيمناستيكاسىنىڭ اۆتورىنا شەكسىز العىستارىن ءبىلدىردى.
كۋرس اياقتالعاننان كەيىن بارلىق قاتىسۋشىلارعا سەرتيفيكاتتار تابىس ەتىلەدى.
اباي بايماعامبەتوۆتىڭ كاسىبي ينسترۋكتورلاردى دايارلايتىن اۆتورلىق كۋرسى استانا قالاسىندا 4 شىلدەگە دەيىن جالعاساتىن بولادى.
