اينۇر بايگەلەنوۆا – ەرلىك پەن تاباندىلىقتىڭ ايقىن ۇلگىسى. ول پوليتسيا قىزمەتكەرى بولۋمەن قاتار, كيكبوكسينگتەن سپورتتىق جارىستارعا قاتىسىپ بىرنەشە رەت جۇلدەگەر اتانعان.
بالا كەزىنەن تەرگەۋشى بولۋدى ارمانداعان اينۇر شىعىس قازاقستان وبلىسى تارباعاتاي اۋدانى اقجار اۋىلىندا دۇنيەگە كەلدى. بالا كەزىنەن وقۋدا دا, سپورتتا دا العىر بولعان ول, مەكتەپ بىتىرگەن سوڭ, الماتى قالاسىنداعى ءال-فارابي اتىنداعى قازاق ۇلتتىق ۋنيۆەرسيتەتىنە زاڭگەرلىك ءبىلىم الۋ ماقساتىندا وقۋعا تۇسكەن. ءومىر جولىن ۋنيۆەرسيتەت قابىرعاسىندا جالعاستىرعان قىزىمىز تەك وقۋدا عانا ەمەس, سپورتتا دا جوعارى جەتىستىكتەرگە قول جەتكىزىپ, وقۋ بارىسىندا كيكبوكسينگ ءتۇرىن تاڭداعان. جانى سۇيگەن بۇل سپورت ءتۇرىن تاڭداعان ساتتەن ءوزىن وسى باعىتقا دا شىڭدايدى. ەرىنبەي جاساعان ەڭبەكتىڭ ناتيجەسىندە ايماقتىق, قالالىق جانە حالىقارالىق جارىستاردا قاتىسىپ, جەڭىس جۇلدەلەرىنە يە بولدى.
وقۋدى ۇزدىك تامامداعان سوڭ, اينۇر بايگەلەنوۆا شقو گلۋبوكي اۋدانىنىڭ پد باسقارماسىندا تەرگەۋشى بولىپ جۇمىسقا تۇرادى. ال 2011 جىلى استانا قالاسىنىڭ پد ەسىل اۋدانىنا اۋىسىپ, تەرگەۋشى قىزمەتىن جالعاستىرعان. قىزمەت بارىسىندا ونىڭ سپورتتىق دايىندىعى فيزيكالىق جانە پسيحولوگيالىق تۇرعىدان اسا ماڭىزعا يە.
ءبىلىم جولىن توقتاتپاي 2014-2016 جىلدارى م.ەسبولاتوۆ اتىنداعى الماتى قالاسىنىڭ قر ءىىم اكادەمياسىندا ماگيستراتۋرادا, 2020-2023 جىلدار ارالىعىندا قر باس پروكۋراتۋراسىنىڭ جانىنداعى قۇقىق قورعاۋ ورگاندارى اكادەمياسىنىڭ دوكتورانتۋراسىندا ءبىلىم الدى.
ول قىزمەتىنىڭ 19 جىلىن تەرگەۋگە ارناپ, بۇگىندە پوليتسيا مايورى اتاعىن دا نۇرا اۋدانى كوشى-قون قىزمەتى ءبولىمىنىڭ ينسپەكتورى بولىپ قىزمەت ەتۋدە.
كيكبوكسينگ رينگىندە اينۇر ۇلكەن جەتىستىكتەرگە جەتتى. ول سپورتتىڭ دەنساۋلىققا جانە پسيحولوگيالىق تۇراقتىلىققا تيگىزەتىن پايداسىن ءاردايىم اتاپ وتەدى. ونىڭ سپورتتاعى جەتىستىكتەرى مەن پوليتسياداعى قىزمەتى ءوزارا ۇشتاسىپ, ءاردايىم جەڭىسكە جەتەلەيتىنىن ايتادى.
