ايا ايتباي – ساداق اتۋدان ورتا ازيادان شىققان تۇڭعىش حالىقارالىق دارەجەدەگى تورەشى. قىتايدىڭ حانچجوۋ قالاسىندا وتكەن ازيا ويىندارىندا 20 جاسىندا تورەلىك ەتتى. ءبىز جاس ماماندى اڭگىمەگە تارتتىق.
– 2020 جىلى تورەشى بولۋعا بەت بۇردىم. باستاپقى كەزدە كلۋبتىق دەڭگەيدەگى تۋرنيرلەردىڭ حاتشى القاسىندا قىزمەت ەتتىم. تاجىريبە جيناپ, تورەشىلىك ونەردىڭ قىر-سىرىن مەڭگەرگەننەن كەيىن, قازاقستان چەمپيوناتى مەن كۋبوگىندا باس حاتشى مىندەتىن اتقاردىم. جالپى تورەشى بولۋىما ساداق اتۋ فەدەراتسياسىنىڭ باس حاتشىسى اينۇر سەرىكقىزى ىقپال ەتتى. فرانتسيادا تورەشى رەتىندە اككرەديتاتسيادان ءوتتىم. العاشقى تورەشى بولعان حالىقارالىق ءتۋرنيرىم بىرىككەن اراب امىرلىگىندەگى ازيا كۋبوگى بولدى, – دەيدى ايا.
ايانى 15 جاسىندا اتاسى ساداق اتۋ سپورتىنا اكەلەدى. سودان بەرى نىسانا كوزدەپ, قاتارلاستارىنان دارالانۋعا ءمان بەرەدى.
– ساداق اتۋ وڭاي پروتسەسس ەمەس. نىساناعا جەتۋ ءۇشىن زەيىننىڭ تولىق شوعىرلانۋى, دۇرىس تىنىس الۋ جانە ناقتى قوزعالىس ارەكەتى ماڭىزدى. بۇل – جىلدار بويى قالىپتاساتىن داعدى. قازاقستان چەمپيوناتى مەن كۋبوگىندا بىرنەشە رەت جەڭىمپاز جانە جۇلدەگەر اتاندىم. سپورتشى جانە تورەشى رەتىندە قابىلەت-قارىمىمدى شىڭداپ كەلەمىن, – دەدى ول.
ساداقشى رەتىندە جاقسى اتۋ ماڭىزدى بولسا, تورەشىلەر دۇرىس شەشىم شىعارىپ, ساراپتاي ءبىلۋ كەرەك. وسىنداي قابىلەت-قاسيەت ايانىڭ بويىندا بار.
– الداعى جوسپارىڭىزبەن بولىسسەڭىز؟
– ساداق اتۋ سپورتى بويىنشا تورەشىلەر القاسىندا ەڭ جاسى مەن ەكەنمىن. بۇل ماعان ۇلكەن جاۋاپكەرشىلىك جۇكتەيدى. اقپان ايىندا يراك استاناسى باعدادتا بولاتىن بايراقتى باسەكەدە تورەشى بولامىن. 2026 جىلى Cەنەگالدىڭ داكار قالاسىندا وتەتىن جاسوسپىرىمدەر وليمپياداسىنا قاتىسۋعا ۇمىتتەنەمىن.
