31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي استانا قالاسىنداعى قاراوتكەل زيراتىندا ەسكە الۋ ءراسىمى ءوتتى.
اتالعان زيراتتا مەملەكەت جانە قوعام قايراتكەرى سماعۇل سادۋاقاسوۆ جەرلەنگەن. اۋەلى الاش ارىستارىنا قۇران باعىشتالىپ, ارۋاقتار رۋحىنا تاعزىم ەتىلدى.
ەسكە الۋ ءراسىمىن اشقان «قازاق گازەتتەرى» جشس ديرەكتورى, الاشتانۋشى اكادەميك ديحان قامزابەكۇلى: «پرەزيدەنت قاسىم-جومارت كەمەلۇلىنىڭ جارلىعىمەن قۇرىلعان ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا بىلتىر قىس مەزگىلىندە قورىتىندى جاريالادى. 311 مىڭ ادام اقتالدى. 2 ملن 500 مىڭداي قۇجات قۇپياسىزداندىرىلدى. بۇل – وتە اۋقىمدى جۇمىس. پرەزيدەنتىمىز: «الاشتىڭ جولى – ءبىلىم-عىلىم جولى» دەگەن ەدى. الاش قايراتكەرلەرىنىڭ كوبىنىڭ بەيىتى جوق, ولاردىڭ ءاربىرىنىڭ اتى-ءجونى, قايعى-قاسىرەتى, اۋىر جولى تۋرالى ەستەلىكتەر مەن وقيعالار تاريحتا جازىلمايىنشا, عىلىمي جۇمىستار اياقتالدى دەپ ايتا المايمىز. سماعۇل سادۋاقاسوۆ اتامىز ايتقانداي, ارتىمىزعا انىق كوڭىلمەن, الدىمىزعا اشىق كوزبەن قارايىق, ەلىمىزدە بەرەكە بولسىن» دەدى.
ءىس-شارادا بايقوڭىر اۋدانىنىڭ اكىمى تالعات راحمانبەردى جانە الاش قايراتكەرلەرىنىڭ ۇرپاقتارى سويلەگەن سوزدەرىندە وسىنداي ءىس-شارالار جاستارعا تەرەڭ وي سالاتىنىن تىلگە تيەك ەتىپ, الاش زيالىلارى تاريحىن قۇرمەتتەپ-باعالاۋ تۇرعىسىنداعى ىستەر جالعاسا بەرسىن دەگەن تىلەك ءبىلدىردى.
ەسكە الۋ راسىمىنە الاش قايراتكەرلەرىنىڭ ۇرپاقتارى, عالىمدار, «Egemen Qazaqstan» گازەتىنىڭ تىلشىلەرى, اكىمدىك وكىلدەرى, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرى قاتىستى.
