استانا قالاسىنىڭ اكىمى جەڭىس قاسىمبەك Instagram پاراقشاسىندا الداعى جىلىتۋ ماۋسىمىنا دايىندىق تۋرالى ايتتى, دەپ حابارلايدى astana-akshamy.kz
«قالادا ءومىر ءسۇرۋ ساپاسى ينجەنەرلىك جەلىلەردىڭ ۇزدىكسىز جۇمىسىنا بايلانىستى. قىستا قالاداعى نىساندارعا جىلۋ بارۋى ءۇشىن 1 مىڭ شاقىرىمنان استام جىلۋمەن جابدىقتاۋ جەلىسى بار.
قازىردىڭ وزىندە ەنەرگيا كوزدەرىن جاڭا جىلىتۋ ماۋسىمىنا دايىنداۋ جۇمىسى باستالدى. ورتاشا ەسەپتەگەندە قالادا جىلىتۋ ماۋسىمى شامامەن 7 ايعا سوزىلادى. جىلىتۋ ماۋسىمى اۋا رايىنىڭ قۇبىلۋىنا قاراماستان, جەلىدە جۇكتەمەسىز شتاتتىق رەجيمدە ءوتتى.
جىل سايىن الەۋمەتتىك جانە تۇرعىن ۇيلەردەن باستاپ جۇزدەگەن نىساندى جىلۋ جەلىسىنە جالعايمىز. وتكەن جىلىتۋ ماۋسىمىندا قالامىز العاش رەت جىلۋ پروفيتسيتىمەن شىعا الدى. ماسەلەن, الدىڭعى جىلىتۋ ماۋسىمىندا جىلۋ تاپشىلىعى بولدى, وسىعان بايلانىستى بىرقاتار جاڭا نىسان جىلۋمەن جابدىقتاۋ جەلىسىنە قوسىلا العان جوق.
وتكەن كۇزدە تىرشىلىكتى قامتاماسىز ەتۋ جۇيەلەرىنىڭ بىرقاتار جاڭا نىسانى سالىنىپ, پايدالانۋعا بەرىلدى: «وڭتۇستىك-شىعىس» گاز جىلۋ ستانتسياسى, «تۇران» گاز جىلۋ ستانتسياسىنىڭ ءبىرىنشى كەزەڭى. سونىمەن قاتار, جەو-3-ءتىڭ ءبىرىنشى كەزەڭىنىڭ قۇرىلىسى اياقتالدى, ول قۇرىلىسى ۇزاققا سوزىلعان نىساننىڭ ءبىرى بولدى. اتالعان نىساننىڭ بارلىعى قالاعا 1100 گكال/ساعاتتان استام قۋات بەردى.
بيىل «تۇران» گجس ەكىنشى كەزەڭىنىڭ قۇرىلىسىن جالعاستىرامىز. بۇل قالاعا قوسىمشا 250 گكال/ساع جىلۋ كولەمىن بەرەدى. وسىلايشا «گازماشاپپاراتۋرا», «جاعالاۋ», «باتىعاي» اۋداندارىن جىلۋمەن قامتاماسىز ەتەدى جانە قولدانىستاعى جىلۋمەن جابدىقتاۋ جۇيەسىنىڭ جىلۋ قۋاتىن ارتتىرادى.
سونىمەن قاتار, جەو-1-دەگى 8 قازاندىق پەن 2 تۋربيناعا كەزەكتى جوندەۋ, 2 قازاندىق پەن 1 تۋربيناعا كۇردەلى جوندەۋ جۇرگىزىپ جاتىرمىز. سول سياقتى حيميالىق, تۋربينالىق جانە ەلەكتر تسەحتارىنداعى جابدىقتاردى كەزەكتى جوندەۋدەن وتكىزەمىز.
ال جەو-2-دە 11 قازاندىق پەن 5 تۋربيناعا كەزەكتى جوندەۋ, 3 قازاندىق پەن 2 تۋربيناعا كۇردەلى جوندەۋ جۇرگىزەمىز, سونداي-اق قوسالقى جابدىققا كەزەكتى كەڭەيتىلگەن جوندەۋ جۇرگىزەمىز.
جەو-3-تە قۇرىلىستىڭ ەكىنشى كەزەگى اياسىندا كومىر بولىگىنىڭ قۇرىلىسى ءجۇرىپ جاتىر. وتكەن جىلى بۇل ستانتسيا (1-كەزەڭ) قالاعا 440 گكال/ساع جىلۋ ەنەرگياسىن بەردى.
بيىل «استانا-تەپلوترانزيت» اق جىلۋمەن جابدىقتاۋ جەلىلەرى بويىنشا 0,9 كم-گە كەزەكتى جوندەۋ جانە 7,6 كم جىلۋمەن جابدىقتاۋ جەلىلەرىن رەكونسترۋكتسيالاۋ جوسپارلانىپ وتىر.
قالانى ارالاۋ بارىسىندا «جۇلدىز» قوسالقى ستانتسياسىنا باردىم. وندا قوسىمشا 55 مىڭنان استام ادام تۇرۋى مۇمكىن مىڭجىلدىق اللەياسى اۋدانىن ەلەكترمەن قامتاماسىز ەتەتىن قوسالقى ستانتسيانى قايتا قۇرۋ جۇمىسى جۇرگىزىلىپ جاتىر.
«استانا-اەك» اق 63,3 كم ەلەكترمەن جابدىقتاۋ جەلىلەرىن, 69 تاراتۋ جانە ترانسفورماتورلىق قوسالقى ستانتسيالاردى جوندەۋ جانە اۋىستىرۋ, 175,2 كم جەلىلەرگە تەحنيكالىق قىزمەت كورسەتۋ بويىنشا جۇمىس ورىندالاتىن بولادى. الداعى جىلىتۋ ماۋسىمىنا دايىندىق ماسەلەسى ەرەكشە باقىلاۋدا», – دەپ جازدى جەڭىس قاسىمبەك.
