- 2024 جىلعى 1 ماۋسىمداعى جاعداي بويىنشا «العاشقى جۇمىس ورنى» جوباسىن ىسكە اسىرۋ شەڭبەرىندە 4,2 مىڭ ادام جۇمىسقا ورنالاستىرىلدى. 2024 جىلى وسى باعىت بويىنشا بارلىعى 8,7 مىڭ ادامدى جۇمىسقا ورنالاستىرۋ جوسپارلانۋدا, دەپ حابارلايدى astana-akshamy.kz/ قر ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
بۇل جوباعا جۇمىس تاجىريبەسى جوق 35 جاستان اسپاعان جۇمىسسىز ازاماتتار قاتىسا الادى. ول ءۇشىن مانساپ ورتالىعىنا ءوتىنىش بەرۋ كەرەك.
وقۋ ورىندارىنىڭ تۇلەكتەرى ءۇشىن «العاشقى جۇمىس ورنى» جوباسى بويىنشا جۇمىس ورىندارى ولار العان كاسىپ (ماماندىق) نەمەسە بايلانىستى كاسىپ (ماماندىق) بويىنشا قۇرىلادى.
«العاشقى جۇمىس ورنى» جوباسىن قارجىلاندىرۋدى ەڭبەك موبيلدىلىگى ورتالىعى جۇمىس بەرۋشى ۇسىنعان اي سايىنعى مالىمەتتەر نەگىزىندە جۇزەگە اسىرادى.
جالاقىنى سۋبسيديالاۋ مەرزىمى 18 ايدان اسپايدى, سۋبسيديا مولشەرى 30 اەك-ءتى قۇرايدى.
«العاشقى جۇمىس ورنى» جوباسىنا قاتىسۋ مەرزىمى اياقتالعاننان كەيىن جۇمىس بەرۋشى جۇمىسسىزداردى كەمىندە 12 اي مەرزىممەن تۇراقتى جۇمىس ورنىنا ورنالاستىرۋعا مىندەتتى.
جوباعا قاتىسۋشىلاردىڭ ءبىرى ءمادينا بايجانوۆا, ول وسى جىلدىڭ باسىندا «اقسۋ قالاسىنىڭ №2 بوبەكجايى» كمقك-دا 18 اي مەرزىمگە تاربيەشى بولىپ جۇمىسقا ورنالاستى.
«ءاربىر تۇلەك وقۋ ورنىن بىتىرگەننەن كەيىن ءوز ماماندىعى بويىنشا جۇمىس ىستەگىسى كەلەتىنى انىق, مەن دە سولاردىڭ قاتارىندا بودىم. كوللەدجدى «مەكتەپكە دەيىنگى ۇيىمداردىڭ تاربيەشىسى» ماماندىعى بويىنشا ءتامامداپ, جۇمىس ىزدەپ پاۆلودار وبلىسى اقسۋ قالاسىنىڭ مانساپ ورتالىعىنا جۇگىندىم.
ۇلتتىق بىلىكتىلىك تەستىلەۋ سەرتيفيكاتى مەن جۇمىس تاجىريبەسىنىڭ بولماۋىنا بايلانىستى تۇراقتى جۇمىس ورنىنا جۇمىسقا ورنالاسۋ قيىنعا سوقتى. جۇمىسسىز رەتىندە تىركەلگەننەن كەيىن مانساپ ورتالىعىنىڭ ماماندارى ماعان قولايلى بوس جۇمىس ورىندارىن ۇسىنا باستادى. بەرىلگەن باعىت بويىنشا اڭگىمەلەسۋ ءوتتى جانە بۇگىنگى كۇنى مۇندا تاربيەشى بولىپ جۇمىس ىستەيمىن», – دەدى جاس مامان.
پاۆلودار وبلىسىندا 2024 جىلى «العاشقى جۇمىس ورنى» جوباسى بويىنشا 299 ادامدى جۇمىسقا ورنالاستىرۋ جوسپارلانۋدا.
