«استانا – الماتى» ەڭ ءىرى جول سالۋ جوباسى قاشان اياقتالاتىنى بەلگىلى بولدى, دەپ حابارلايدى astana-akshamy.kz «قازاۆتوجول» ۇك» اق ءباسپاسوز قىزمەتىنە سىلتەمە جاساپ.
«قازاۆتوجول» اق-نىڭ Telegram-داعى رەسمي ارناسىندا جاريالانعان اقپاراتقا سايكەس, 2024 جىلدىڭ سوڭىنا دەيىن استانا مەن الماتى اراسىنداعى جول قۇرىلىسى اياقتالماق. «مەملەكەت باسشىسىنىڭ «ورتالىق-وڭتۇستىك» ءدالىزىن رەكونسترۋكتسيالاۋ جونىندەگى تاپسىرماسىن ورىنداۋ ماقساتىندا ءتورت نەگىزگى ۋچاسكەنى: «قاراعاندى – بالقاش» (363 شاقىرىم), «بالقاش – بۋرىلبايتال» (288 شاقىرىم), «بۋرىلبايتال – كۇرتى» (228 شاقىرىم) جانە شامالعان ستانتسياسىنداعى اينالما جول قۇرىلىسىن قوسا العاندا جالپى ۇزىندىعى 885 شاقىرىم جولدى جاڭارتۋ جۇمىستارى جۇرگىزىلىپ جاتىر.
2019 جىلدان باستاپ بۇل ۋچاسكەلەردە كولىك قوزعالىسىنىڭ قاۋىپسىزدىگىن ساقتاۋ ماقساتىندا توسقاۋىل قورشاۋىن پايدالانا وتىرىپ ونى ءبولىپ, ءتورت جولاقتى جول قوزعالىسىن قامتاماسىز ەتۋ ءۇشىن I-ب تەحنيكالىق ساناتىنا دەيىن مودەرنيزاتسيالاۋ جۇمىستارى جۇرگىزىلىپ جاتىر. قازىرگى تاڭدا اۆتوجولدىڭ 833 شاقىرىمىنا جاڭا اسفالت توسەلدى», – دەلىنگەن كومپانيا حابارلاماسىندا. سونداي-اق «قازاۆتوجول» ءباسپاسوز قىزمەتىنىڭ مالىمەتىنە سۇيەنسەك, اۆتوجولدىڭ استانادان قاراعاندىعا دەيىنگى 182 شاقىرىم بولىگىندە I-ب تەحنيكالىق ساناتتاعى ءتورت جولاقتى تاس جولى ورناتىلىپ, جول قوزعالىسىنىڭ قاۋىپسىزدىگى قامتاماسىز ەتىلگەن. «ورتالىق-وڭتۇستىك» جول ءدالىزى بويىندا 42 دەمالىس ورنى مەن 23 قىزمەت كورسەتۋ ستانتسياسىن سالۋ جوسپارلانعان.
«ورتالىق-وڭتۇستىك» جول بولىگىندە زاماناۋي سانيتاريالىق-گيگيەنالىق قوندىرعىلار, ساۋدا ورىندارى مەن ەلەكترموبيلدەردى قۋاتتاندىرۋ بەكەتتەرى ورناتىلدى. سونىمەن قاتار جول قوزعالىسىنا قاتىسۋشىلارعا قارعا قارسى توسقاۋىلدار, كولىكتە جولدىڭ كورىنۋىن شەكتەيتىن فاكتورلارعا قارسى ەكراندار مەن تور شلاگباۋمدار ورناتىلدى. ول قاۋىپسىزدىكتى قامتاماسىز ەتىپ, جول-كولىك وقيعالارىنىڭ الدىن الۋعا ارنالعان», – دەلىنگەن حابارلامادا. كومپانيا ءباسپاسوز قىزمەتىنىڭ دەرەگىنشە, 2024 جىلدىڭ سوڭىنا جوسپارلانعان «استانا-الماتى» تاس جولىن سالۋ جۇمىستارى اياقتالعاننان كەيىن, تولىق جول بويىندا جاڭا توسەم ورناتىلادى.
