قازاقستان كەيىنگى جىلدارى شەتەلدىك تۋريستەر ءۇشىن ترەند باعىتقا اينالدى. مۇنى ەلىمىزدىڭ ءتۋريزمى تۋرالى الەمنىڭ ءىرى باسىلىمدارىندا جارىق كورىپ جاتقان اقپاراتتاردان دا بايقاۋعا بولادى. جۋىردا امەريكالىق ايگىلى Travel+Leisure جۋرنالىنىڭ وڭتۇستىك-شىعىس ازياداعى بولىمشەسى قازاقستان ءتۋريزمى تۋرالى شەتەلدىك ساياحاتشىلارعا ارنالعان نۇسقاۋلىق جاريالادى, دەپ حابارلايدى astana-akshamy.kz.
جۋرناليست ياشيتا ۆاشيشت قازاقستاننىڭ بىرەگەي كورىكتى جەرلەرىن ارالاي وتىرىپ, شەتەلدىك تۋريستەرگە قاجەت بولاتىن نۇسقاۋلىق جيناقتادى. «نە ىستەۋ كەرەك, قايدا تۇرۋ كەرەك جانە قانداي تاعامدار بار: قازاقستان بويىنشا ەڭ ۇزدىك مارشرۋت» دەپ اتالاتىن رەپورتاجدا كوپتەگەن قىزىقتى مالىمەت جاريالانعان. ءتىپتى, اتالعان ماقالانىڭ مازمۇنى ەل تۇرعىندارىنىڭ دا قىزىعۋشىلىعىن تۋدىردى.
اۆتور قازاقستانعا كەلۋ ءۇشىن ساياحاتشىلارعا ساۋىردەن مامىرعا دەيىن نەمەسە قىركۇيەكتەن قازانعا دەيىنگى كەزەڭدى تاڭداۋدى ۇسىنادى. ياشيتا ءۆاشيشتتىڭ پىكىرى بويىنشا, اتالعان كەزەڭدەردە ءسىز تاۋ پەيزاجدارىنىڭ پانوراماسىنان جانە تاڭعاجايىپ دالا كەڭىستىگىنەن ءلاززات الا الاسىز.
Travel+Leisure ءجۋرناليسى استانا, شىمكەنت قالاسى, تۇركىستان وبلىسى, الماتى قالاسى مەن ونىڭ اينالاسىنداعى كورىكتى جەرلەرگە بارىپ, قازاقستان بويىنشا جەتى كۇندىك ساياحات جاسادى.
سونىمەن قاتار جۋرنال وكىلى قازاقستانعا كەلگەننەن كەيىن ۆيزا قولجەتىمدىلىگى, اعىلشىن تىلىنە اۋدارماسى بار قازاق تىلىندەگى ءسوز تىركەستەرى, قوناق ۇيلەر مەن ۇلتتىق تاعامداردى تاڭداۋدا پايدالى اقپاراتتى جينادى.
Travel + Leisure – نيۋ-يوركتە ورنالاسقان ساياحات تۋرالى جۋرنال. باسىلىم جىلىنا 12 رەت شىعادى, دەرەكتەر بويىنشا جۋرنالدىڭ وقىرمان سانى – 4,8 ميلليون. ساياحات تۋرالى باسىلىمدا تۋريستىك ساپارلارعا ماماندانعان جانە كوبىنە ساياحاتشى ەمەس جازۋشىلار, اقىندار, سۋرەتشىلەر, ديزاينەرلەر مەن جۋرناليستەردىڭ ماقالالارى جاريالانادى.
سونىمەن قاتار جۋرنال مودەلدەردىڭ ساياحاتتاعى جانە بەدەلدى جاعدايدا دەمالىپ جاتقان فوتوسۋرەتتەرىن جاريالاعان مۇقابالارىمەن تانىمال.
Travel+Leisure بۇكىل الەم بويىنشا 16 ميلليون ساياحاتشىلار قاۋىمداستىعىن بىرىكتىرەدى جانە شتاتتا 100-دەن استام ساياحات تۋرالى جازاتىن جۋرناليستەرى مەن فوتوگرافتارى بار.
