استانادا مامىر ايىنىڭ ەكىنشى جەكسەنبىسىندە اتالىپ وتەتىن انالار كۇنىنە وراي كوپتەگەن مەرەكەلىك ءىس-شارا ءوتتى. ەلوردانىڭ ءار اۋدانىندا رۋحاني-تانىمدىق كەزدەسۋلەر مەن قويىلىمدار ۇيىمداستىرىلدى.
ەلوردالىق دوستىق ۇيىندە ارت-تەراپيا فورماتىنداعى «انا – گۇل, انا – ءومىر شىراعى» اتتى رۋحاني-تانىمدىق ءىس-شارا ءوتتى.
انالار كۇنىنە ارنالعان مەرەكەلىك باسقوسۋعا ەلوردالىق قازاقستان حالقى اسسامبلەياسى انالار كەڭەسىنىڭ مۇشەلەرى, الماتى اۋدانى بەلسەندى ۇزاق ءومىر ءسۇرۋ ورتالىعىنىڭ شەبەرلەرى مەن «باقىتتى شاڭىراق» قوعامدىق قورىنا قاراستى ەرەكشە بالالارى بار 20-دان استام وتباسى قاتىستى. ولار شەبەرلەردىڭ كومەگىمەن سۋرەت قۇراستىرىپ ۇيرەندى. سونىمەن بىرگە كونتسەرتتىك جانە ويىن-ساۋىق باعدارلاما ۇسىنىلىپ, بالالار مەن ولاردىڭ انالارىنا سىيلىق تابىستالادى.
قالالىق قازاقستان حالقى اسسامبلەياسى حاتشىلىعىنىڭ قىزمەتكەرى گۇلنار تايگوكوۆا ءسوز سويلەپ, ەلىمىزدە العاش رەت ءوتىپ وتىرعان حالىقارالىق مەرەكەنىڭ تاريحىمەن تانىستىردى.
– ءبىزدىڭ ورتالىقتا قاريالار نەشە ءتۇرلى ىسمەرلىكپەن اينالىسادى: تىگىن تىگەدى, كيىم پىشەدى. مىنە, بۇگىندە بەلسەندى قارتتارىمىز بالالارعا دا قولعابىس كورسەتىپ جاتىر. ولار شەبەرلىك ساعاتىنا قاتىسۋشىلارعا سۋرەت قۇراستىرۋعا كومەكتەسىپ, سول ارقىلى كىشكەنتايلاردىڭ موتوريكا قابىلەتىن شىڭداۋدا, – دەدى الماتى اۋدانى بەلسەندى ۇزاق ءومىر ءسۇرۋ ورتالىعىنىڭ ءىس-شارالار ۇيىمداستىرۋشىسى باقىتجان تولەۋباەۆا.
***
اتاتۇرىك ساياباعىندا «اناممەن تابيعات اياسىندا» اتتى انالارعا ارنالعان ءىس-شارا ءوتتى. اشىق اسپان استىندا سۋرەت سالۋ بويىنشا شەبەرلىك ساباعى, يوگا ساباعى, كوڭىلدى ستارت فورماتىنداعى سپورت جارىسى ۇيىمداستىرىلدى. ءىس-شارانى بايقوڭىر اۋدانىنىڭ اكىمدىگى ۇيىمداستىرسا, «Strong mothers NS» قوعامدىق قورى قولداۋ كورسەتتى.
– ءىس-شارانىڭ ماقساتى – انالار مەن ولاردىڭ بالالارىن عانا ەمەس, بۇكىل وتباسىن بىرىكتىرۋ. شۋاقتى كۇندە ارداقتى انالارىمىز ءوز ۋاقىتىن بالالارعا ارنايدى. وسىنداي جاقسى ءىس-شارالاردى وتكىزۋ وتباسىن دا, جالپى قوعامدى دا نىعايتادى. بۇل ءوز كەزەگىندە قازاقستاندىقتاردىڭ ودان ءارى ۇيىمشىل جانە ءبىرتۇتاس بولۋىنا ىقپال ەتەدى, – دەپ اتاپ ءوتتى قور باسشىسى رايگۇل سەرىكباەۆا.
ءىس-شارا سوڭىندا قاتىسۋشىلار ءۇشىن پيكنيك جانە فوتوسەسسيا ۇيىمداستىرىلدى.
***
ەسىل اۋدانى بەلسەندى ۇزاق ءومىر ءسۇرۋ ورتالىعىندا قالا كاسىپكەرلەرىنىڭ دەمەۋشىلىگىمەن انالار كۇنى مەرەكەسى اتالىپ ءوتتى. جيىندا مەرەكەنىڭ ءمان-ماڭىزى اڭگىمە وزەگىنە اينالدى. ورتالىق قىزمەتكەرلەرى «باتىر انا», «التىن القا» جانە «كۇمىس القا» يەگەرلەرىنە قۇرمەت كورسەتىپ, ولاردىڭ ۇرپاق تاربيەسى مەن ۇلت بولاشاعىنا قوسقان ۇلەسىن اتاپ ءوتتى, «انالار الەمى» كورمەسى اشىلدى, جينالعاندارعا «قولونەر-توقىما» شەبەرلىك ساباعى وتكىزىلدى.
ورتالىق كوركەمونەرپازدارى دايارلاعان كونتسەرتتە شىرقالعان بارلىق ءان انا تاقىرىبىنا ارنالدى. قالا زەينەتكەرلەرىنەن قۇرالعان «اسىل مۇرا» دومبىراشىلار وركەسترى, «ۆەتەرانى» حورى مەن «ساعىنىش سازى» ءانسامبلى, باسقا دا ونەرپازدار ونەرىن ورتاعا سالدى.
***
استانا قالاسى نۇرا اۋدانى بەلسەندى ۇزاق ءومىر ءسۇرۋ ورتالىعىندا «انا – ءومىردىڭ تىرەگى» اتتى مەرەكەلىك ءىس-شارا ءوتتى.
«التىن القا» جانە «كۇمىس القا» يەگەرلەرى شاقىرىلىلعان مەرەكەلىك ءىس-شارانى نۇرا اۋدانى بەلسەندى ۇزاق ءومىر ءسۇرۋ ورتالىعىنىڭ ءبولىم باسشىسى مۇرات تەمىربولاتوۆ اشىپ, انالاردى مەرەكەمەن قۇتتىقتادى. «التىن القا» مەن «كۇمىس القا» يەگەرلەرىنە ورتالىقتىڭ اتىنان سىيلىق بەرىپ, گۇل شوعىن تابىستادى. انالاردى قۇتتىقتاۋ ءۇشىن استانا قالاسى ى.التىنسارين اتىنداعى Binom مەكتەپ-ليتسەيىنىڭ 7-سىنىپ وقۋشىلارى كەلىپ, انالارعا ارناعان ولەڭدەرىن وقىپ, كۇي تارتتى.
«ءبىزدىڭ ورتالىقتىڭ بەلسەندى مۇشەلەرىن, التىن قۇرساقتى انالارىمىزدى قۇرمەتتەۋدىڭ ءساتى ءتۇستى. كەنجە جىلقىايداروۆا, جۇماقىز داۋرەنبەكوۆا, جانارگۇل قاليبەك «التىن القا» يەگەرى بولسا, التىن تولەسىنوۆا – «كۇمىس القاسى» بار انا. ولاردى قۇرمەتتەۋ ارقىلى وتباسى قۇندىلىعىن دارىپتەيمىز, وتباسى ينستيتۋتىنىڭ ىرگەسىن مىقتايمىز» دەيدى نۇرا اۋدانى بەلسەندى ۇزاق ءومىر ءسۇرۋ ورتالىعىنىڭ ۇيىمداستىرۋشىسى ءلاززات وتەعۇلوۆا.
ۇيىمداستىرۋشىلار مەرەكەلىك كوڭىل كۇي سىيلاعان ءىس-شاراعا دەمەۋشىلىك كورسەتكەن «شار قۇرىلىس» جشس كومپانياسى مەن «Oyu» گۇلدەر دۇكەنىنە العىس ءبىلدىردى.
***
«مادريد» تۇرعىن ءۇي كەشەنىنىڭ كىشكەنتاي تۇرعىندارى انالارىنا ارناپ ەرەكشە فلەشموب پەن شىعارماشىلىق نومىرلەر ۇيىمداستىردى. ءوز كەزەگىندە انالار بالالارعا سۇيىكتى تاعامدارىنان داستارقان جايدى.
«انا بولۋ – ۇلكەن باقىت! ءبىر قولىمەن بەسىكتى تەربەتسە, ءبىر قولىمەن الەمدى تەربەتكەن – انالار. انالاردى, اجەلەردى بارلىق ەلدە تويلانىپ جاتقان انالار مەرەكەسىمەن قۇتتىقتايمىن!» دەدى كوپبالالى انا, اجە بايان تايجانوۆا.
ءىس-شارانىڭ ماقساتى – قوعامداعى وتباسى قۇندىلىعىن نىعايتۋ, انا بولۋدىڭ ماڭىزىن ۇعىندىرۋ, انالاردى قۇرمەتتەۋ جانە ولاردىڭ قوعامداعى ءرولىن اتاپ ءوتۋ.
