حالىقارالىق بالالاردى قورعاۋ كۇنى قارساڭىندا استاناداعى №6 قالالىق ەمحانا ەرەكشە بالالارعا ارنالعان «انا جۇرەگى» اتتى مەرەكەلىك ءىس-شارا ۇيىمداستىردى. جيىنعا Amanat پارتياسىنىڭ قالالىق فيليالى وكىلدەرى كەلىپ, اكتسيانىڭ وتۋىنە قولداۋ ءبىلدىردى. جيىن ماقساتى – مەرەكە قارساڭىندا وسى ساناتقا جاتاتىن قالا تۇرعىندارىنىڭ پسيحولوگيالىق كوڭىل-كۇيىن جاقسارتۋ. اكتسيا بارىسىندا ەرەكشە بالالار باعىپ وتىرعان انالارعا تەگىن مەديتسينالىق تەكسەرۋدەن ءوتۋ مۇمكىندىگى دە بەرىلدى.
ءىس-شاراعا اتالعان ەمحاناعا تىركەلمەگەن بولسا دا جالپى قالاداعى 60-تان استام ەرەكشە بالالار مەن ولاردىڭ اتا-انالارى كەلىپ قاتىستى. تالانتتى ونەرپاز جاستاردىڭ كونتسەرتتىك باعدارلاماسىمەن قاتار بالالاردى وڭالتۋ بويىنشا ساباقتار, ەرەكشە بالالاردىڭ انالارىن گينەكولوگ, نەۆراپاتولوگ, كارديولوگ, تەراپەۆت, ەندوكرينولوگ, وفتالمولوگ, وتولارينگولوگ, ماممولوگ, حيرۋرگ, ءتىس جانە ۋزي, ەكگ بويىنشا تەكسەرۋ جۇمىستارى وتكىزىلدى.
– جالپى ءبىزدىڭ ەمحانادا 33 مىڭنان استام بالا تىركەۋدە تۇر. سولاردىڭ ىشىندە 600-دەن استامى – وسىنداي دەرتى نەمەسە اۋىتقۋشىلىقتارى, پسيحولوگيالىق اۋرۋلارى بار ەرەكشە بالالار. ولاردىڭ ءبارىن تىركەيمىز, كەرەك كەزىندە سكرينينگتەن وتەدى, اي سايىن كەيبىرى سالالىق دارىگەرلەرگە قارالىپ تۇرادى, اۋرۋ جاعدايىنا قاراي كەيبىر بالالار 6 اي سايىن شاقىرىلىپ وتىرادى, بىرقاتارى ودان دا ءجيى قارالادى. ولاردى وزىمىزدە وڭالتاتىن ارنايى كابينەتتەردەن بولەك, ۇلتتىق وڭالتۋ ورتالىعىنا دا جولدامامەن جىبەرىپ وتىرامىز, سول ءۇشىن ارنايى كۆوتا ءتۇسىپ تۇرادى, – دەيدى پەدياتريا بولىمشەسىنىڭ مەڭگەرۋشىسى ايگۇل ابىشەۆا.
– مۇنداي بالالاردىڭ, اسىرەسە مۇگەدەكتەر ارباسىنداعى بالالاردىڭ انالارى تاڭەرتەڭنەن كەشكە دەيىن بالا قاراپ, ۇيدە وتىرادى, ەشقايدا شىعا المايدى. ءتىپتى كوبى ءوز دەنساۋلىعىنا دا قاراۋعا ۋاقىت تاپپايدى. بالالارى وسكەن سايىن ۋاقىتىن سوعان كوبىرەك ارنايدى. بۇگىنگى ءىس-شارانى سونداي اتا-انالار ءۇشىن دايىندادىق, ولاردىڭ بالالارىنا ارناپ كونتسەرت قويا وتىرىپ, انالارىن تەكسەرۋدەن وتكىزدىك, – دەيدى ەمحانا ديرەكتورى دينارا بايسەركينا.
