كاستامونۋ ۋنيۆەرسيتەتىنىڭ ءبىلىم الۋشىلارى بوكەتوۆ زەرتتەۋ ۋنيۆەرسيتەتىندە قازاق ءتىلىن ۇيرەنۋدە.
بوكەتوۆ زەرتتەۋ ۋنيۆەرسيتەتىندە «ۇلاعات» قازاق ءتىلىن وقىتۋ جوباسى ءوز جۇمىسىن باستادى. تۇركيا رەسپۋبليكاسىنىڭ كاستامونۋ ۋنيۆەرسيتەتىنەن پروفەسسور, دوكتور, فيلولوگ-عالىم, قازىرگى تۇرىك ديالەكتەرى مەن ادەبيەتى كافەدراسىنىڭ مەڭگەرۋشىسى ورحان سويلەمەز باستاعان ءبىر توپ ماگيسترانت, PhD دوكتورانت, باكالاۆريات شاكىرتتەرى قاراعاندىعا قازاق ءتىلىن جەتىلدىرۋگە كەلدى. «ۇلاعات» قازاق ءتىلىن وقىتۋ باعدارلاماسى باۋىرلاس ەكى ەل مەن ەكى جوعارى وقۋ ورنى اراسىنداعى بايلانىستى نىعايتۋ, ورتاق ءبىلىم بەرۋ باعدارلاماسىن جۇزەگە اسىرۋ ارقىلى قازاقتىڭ ءتىلىن, مادەنيەتىن, ادەت-عۇرپىن, سالت-ءداستۇرىن شەتەلدىكتەرگە ناسيحاتتاۋ ماقساتىندا ۇيىمداستىرىلىپ وتىر.
اتاجۇرتقا كەلگەن تۇرىك باۋىرلاردى ۋنيۆەرسيتەتىمىز قازاقى قوناقجايلىعىن تانىتىپ, قۇشاق جايا قارسى الدى. شاشۋ شاشىلىپ, ۇلتتىق ءدام ۇسىنىلدى. بوكەتوۆ ۋنيۆەرسيتەتىنىڭ باسقارما توراعاسى – رەكتور نۇرلان دۋلاتبەكوۆ ءوز سوزىندە تۇرىك باۋىرلارعا قازاق ءتىلىن ۇيرەتۋ جوباسىن جۇزەگە اسىرۋعا فيلولوگ-عالىم ورحان سويلەمەز مىرزا مەن كاسىپكەر, ۇلت جاناشىرى ەرلان ءاشىم قولداۋ تانىتقانىن, «ۇلاعات» جوباسى شەڭبەرىندە قوناقتارىمىز «TURAN EL QAZAQ SPORT» ۇلتتىق سپورت جانە ساياتشىلىق ورتالىعىنا بارىپ, قازاقتىڭ ۇلتتىق ويىندارىن تاماشالايتىنىن اتاپ ءوتتى. «بوكەتوۆ ۋنيۆەرسيتەتىنىڭ ءتىل ماماندارى كاستامونۋ ۋنيۆەرسيتەتىنىڭ ءبىلىم الۋشىلارىنا قازاق ءتىلىن ۇيرەتەدى. الداعى ۋاقىتتا اتالعان جوبا جاندانىپ, جالعاسىن تاۋىپ جاتسا, ءبىزدىڭ دە وقىتۋشىلار, PhD دوكتورانت پەن ماگيسترانتتار تۇرىك ءتىلىن ۇيرەنىپ, بىرلەسكەن عىلىمي ەڭبەكتەر جازۋعا مۇمكىندىك الادى» دەدى رەكتور.
«ۇلاعات» باعدارلاماسى — ءبىلىم الۋشىلاردىڭ قازاق تىلىنە قىزىعۋشىلىقتارىن ارتتىرۋدى, ءتىل ۇيرەنۋشىنىڭ تۇرمىستىق, الەۋمەتتىك تاقىرىپتاردا سويلەۋ بىلىكتىلىگىن جەتىلدىرىپ, ءتىل ۇيرەنۋشىنىڭ ءتىل ساۋاتتىلىعى مەن ءسوز بايلىعىن, باسقالارمەن قارىم-قاتىناسقا ەركىن ءتۇسۋىن جانە ويلاۋ قابىلەتتەرى مەن دۇنيەتانىمدىق داعدىلارىن كەڭەيتۋدى, ساباق ۇدەرىسىندە العان بىلىمدەرىن تەرەڭدەتىپ, تەوريانى پراكتيكادا قولدانۋ داعدىسىن قالىپتاستىرۋدى كوزدەيتىن بىرەگەي جوبا.
«كاستامونۋ ۋنيۆەرسيتەتى مەن ە. ا. بوكەتوۆ اتىنداعى قاراعاندى ۋنيۆەرسيتەتى اراسىندا عىلىمي بايلانىس نىعايىپ كەلەدى. جاقىندا كاستامونۋ ۋنيۆەرسيتەتىنىڭ رەكتورى احمەت حامدي توپال قاراعاندىعا ىسساپارمەن كەلىپ بوكەتوۆ ۋنيۆەرسيتەتىنىڭ باسشىلىعىمەن جۇزدەسىپ, اكادەميالىق ۇتقىرلىق, تاجىريبە الماسۋ جونىندەگى كەلىسىمشارتقا قول قويدى. كاستامونۋ ۋنيۆەرسيتەتىنىڭ ون بەس شاكىرتىنە بوكەتوۆ ۋنيۆەرسيتەتى فيلولوگيا فاكۋلتەتىنىڭ ءتىل ماماندارى قازاق ءتىلىن ۇيرەتەدى. ولار ءبىر اپتا ارالىعىندا قازاق ءتىلىن, قازاق مادەنيەتىن تانىپ بىلەدى» دەيدى تۇرىك عالىمى ورحان سويلەمەز.
قازاق ءتىلىن ۇيرەنۋگە نيەت بىلدىرگەن ون بەس ءبىلىم الۋشى ۇلتتىق كيىم مەن اشەكەي بۇيىمداردىڭ كورمەسىن تاماشالاپ, قولونەردەن شەبەرلىك ساباعىنا قاتىستى. ءدارىسحانادا قازاق تىلىندە العاشقى تانىسۋ ساباعى ءوتتى. تۇرىك باۋىرلار بوكەتوۆ زەرتتەۋ ۋنيۆەرسيتەتىنىڭ قارقارالىداعى وقۋ-دالالىق بازاسىندا قازاق ءتىلى مەن تۇرىك ءتىلى اراسىنداعى ۇقساستىق پەن ايىرماشىلىقتى ءتۇسىنىپ, تۇرمىستىق جاعدايدا قولدانىلاتىن لەكسيكانى مەڭگەرىپ, قازاقشا بەيرەسمي قارىم-قاتىناس ورناتا الاتىن دارەجەگە جەتەدى دەگەن ءۇمىت زور. قازاق ءتىلىن مەڭگەرگەن بارلىق قاتىسۋشىلار بوكەتوۆ ۋنيۆەرسيتەتىنىڭ سەرتيفيكاتىن الادى.
شاپاعات ءابدىر
