استانادا اوسشك شتاب-پاتەرىنىڭ «العاشقى تاسىن قالاۋ» ءراسىمى جانە ۇيىمعا توراعا ەلدەرىنىڭ كونسۋلتاتيۆتىك كەزدەسۋى ءوتتى, دەپ حابارلايدى astana-akshamy.kz
ەلوردادا ازياداعى ءوزارا ءىس-قيمىل جانە سەنىم شارالارى كەڭەسىنىڭ دەربەس شتاب-پاتەرىنىڭ العاشقى تاسى قالاندى جانە حاتشىلىقتىڭ بولاشاق قىزمەتكەرلەرىنە جولداۋى سالىنعان «ۋاقىت كاپسۋلاسىن» سالۋ ءراسىمى جاسالدى.
ءىس-شارا قر پارلامەنت ءماجىلىسى حالىقارالىق ىستەر, قورعانىس جانە قاۋىپسىزدىك كوميتەتىنىڭ ءتورايىمى ايگۇل قۇسپاننىڭ, قر سىرتقى ىستەر ءمينيسترىنىڭ ورىنباسارى الىبەك باقاەۆتىڭ, اوسشك باس حاتشىسى قايرات سارىبايدىڭ, تاجىكستان سىرتقى ىستەر ءمينيسترىنىڭ ءبىرىنشى ورىنباسارى ناسرەدين يسماتۋللونىڭ, ازەربايجان سىرتقى ىستەر مينيسترلىگىنىڭ وڭىرلىك قاۋىپسىزدىك دەپارتامەنتىنىڭ ديرەكتورى ازەر مۇساەۆتىڭ جانە اوسشك مۇشە مەملەكەتتەرىنىڭ ديپلوماتيالىق ميسسيا باسشىلارىنىڭ قاتىسۋىمەن ءوتتى.
سونىمەن قاتار بۇل كۇنى قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى ءا.باقاەۆتىڭ توراعالىعىمەن ازيا كەڭەسىنىڭ قازىرگى, بۇرىنعى جانە كەلەسى توراعالىعى وكىلدەرىنىڭ كونسۋلتاتيۆتىك كەزدەسۋى ءوتتى. وتىرىسقا 2018-2020 جىلدارى ازيا كەڭەسىنە توراعالىق ەتكەن تاجىكستاننىڭ جانە 2024-2026 جىلدارى ۇيىمنىڭ بولاشاق توراعاسى رەتىندە ازەربايجاننىڭ وكىلدەرى قاتىستى.
اتاپ ايتقاندا, تاجىكستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى ن.يسماتۋللو جانە ازەربايجان رەسپۋبليكاسى سىرتقى ىستەر مينيسترلىگى وڭىرلىك قاۋىپسىزدىك دەپارتامەنتىنىڭ ديرەكتورى ا.مۋساەۆ, سونداي-اق اوسشك باس حاتشىسى ق.سارىباي كونسۋلتاتسيالارعا بەلسەندى قاتىستى.
ءا.باقاەۆ بۇل فورماتتاعى كونسۋلتاتسيالار اۋىساتىن توراعالىقتاردىڭ قىزمەتىندە ساباقتاستىق پەن جۇيەلىلىكتى قامتاماسىز ەتۋگە, سونداي-اق ۇيىمنىڭ ۇزاق مەرزىمدى ءارى ستراتەگيالىق ماقساتتارىن جۇزەگە اسىرۋداعى ساباقتاستىقتى نىعايتۋعا مۇمكىندىك بەرەتىنىن اتاپ ءوتتى.
كەزدەسۋ بارىسىندا ءا.باقاەۆ قاتىسۋشىلاردى ازيا كەڭەسىندەگى قازاقستان توراعالىعىنىڭ باسىمدىقتارىن ىسكە اسىرۋداعى جەتىستىكتەرى مەن اعىمداعى جاعدايى تۋرالى, سونداي-اق اوسشك-ءنى حالىقارالىق ۇيىمعا ترانسفورماتسيالاۋ جونىندەگى ءىس-شارالاردىڭ ورىندالۋ بارىسى تۋرالى حاباردار ەتتى.
تاراپتار ۇيىمنىڭ ستراتەگيالىق ماقساتتارىن جۇزەگە اسىرۋ تەتىكتەرىن تالقىلاپ, اوسشك-ءنى ودان ءارى ترانسفورماتسيالاۋدى تەجەيتىن ماسەلەلەردى شەشۋ جولدارى بويىنشا پىكىر الماستى.
كەزدەسۋدىڭ قورىتىندىسى بويىنشا تاراپتار توراعالىقتىڭ ازەربايجان رەسپۋبليكاسىنا وتۋىنە دەيىن وسىنداي فورماتتا كونسۋلتاتسيالاردى جالعاستىرۋعا كەلىستى.
