اقمولادا جارىق كورىپ, استانادا 30 جىلدان استام ۋاقىت بويىنا باسىلىپ كەلە جاتقان, بارشا رەسپۋبليكاعا تارالاتىن باسىلىم – «استانا اقشامى» گازەتىنىڭ بيىلعى ءتول مەرەكە قارساڭىندا سۇيىنشىلەتەر جاڭالىعى كوپ. سونىڭ ىشىندە ەڭ ۇلكەن ماراپات – «استانا اقشامى» گازەتىنىڭ شەف-رەداكتورى, بەلگىلى جۋرناليست تولەن تىلەۋبايدىڭ مەملەكەت باسشىسىنىڭ وكىمىمەن قر پرەزيدەنتىنىڭ باق سالاسىنداعى سىيلىعىن يەلەنۋى.
34 جىل ىشىندە ەلوردانىڭ ءتول باسىلىمى ءوسۋ-وركەندەۋ كەزەڭىنەن ءوتىپ, قالانىڭ تىنىس-تىرشىلىگىن, العان اسۋلارى مەن جەتكەن جەتىستىكتەرىن قالىڭ بۇقاراعا جۇيەلى جەتكىزۋشى عانا ەمەس, ەل رۋحانياتىنداعى, حالىق تاعدىرىنداعى وزەكتى ماسەلەلەرگە ءۇن قوساتىن, مازمۇنى بايىعان, ويى كەمەلدەنگەن باسىلىمعا اينالدى. وقىرماننىڭ ۇدايى ۇدەسىنەن شىعۋعا ۇمتىلاتىن باسىلىمنىڭ قول جەتكىزگەن جەتىستىگى دە ءبىر توبە. سونىڭ ءبىر دالەلى – 2002 جىلى «استانا اقشامى» گازەتى قازاقستان جۋرناليستيكا اكادەمياسىنىڭ «التىن جۇلدىز» سىيلىعىنىڭ لاۋرەاتى اتاندى. باسىلىم 2018 جىلى قر پرەزيدەنتىنىڭ العىس حاتى مەن «نۇر سۇڭقار» سىيلىعىن الدى.
بىرنەشە ءجۋرناليسى حالىقارالىق جانە رەسپۋبليكالىق كونكۋرستاردىڭ لاۋرەاتى بولدى. وسى جىلدار ىشىندە اپتاسىنا 3 رەت جارىق كورەتىن گازەتتىڭ تانىمالدىعى ارتىپ, تارالىمى كوبەيدى. ۇجىمدا ءار جىلداردا ەڭبەك ەتكەن قالامى جۇيرىك جۋرناليستەردىڭ وزىندىك قولتاڭباسى قالدى. باسىلىمدى كەزىندە باسقارعان, بۇگىندە سەناتور نۇرتورە ءجۇسىپ تە 1998 جىلى پرەزيدەنت سىيلىعىن يەلەنگەن بولسا, قازىر گازەت رەداكتسياسىن تاجىريبەلى جۋرناليست, 1999 جىلى قازاقستان پرەزيدەنتى سىيلىعىنىڭ يەگەرى اتانعان ەركىن قىدىر باسقارىپ وتىر. مىنە, ەندى سول ىزبەن 2024 جىلى گازەتتىڭ قالامى قارىمدى ءجۋرناليسى, شەف-رەداكتور, «اقپارات سالاسىنىڭ ۇزدىگى» توسبەلگىسىنىڭ يەگەرى, «Amanat مەديا سىيلىعى-2023» رەسپۋبليكالىق بايقاۋىنىڭ لاۋرەاتى تولەن تىلەۋباي وسى ماراپاتتىڭ يەسى اتاندى. ول «جاس قازاق ءۇنى», «التىن وردا», «جاس قازاق» گازەتتەرىندە, «قازاقستان تەمىر جولى» ۇلتتىق كومپانياسىنىڭ ءباسپاسوز قىزمەتىندە, پرەمەر-مينيستر كەڭسەسىنىڭ ۇكىمەتتىك باسىلىمدار رەداكتسياسىندا قىزمەت اتقارعان.
ەلىمىزدىڭ اقپارات كەڭىستىگىندە وزىندىك سالماعى, ورنى بار باس قالانىڭ باس گازەتى – قازاقستان پرەزيدەنتى كۇندەلىكتى وقىپ وتىراتىن رەسپۋبليكالىق باسىلىمدار قاتارىندا. باق قىزمەتكەرلەرىن ماراپاتتاۋ راسىمىندە پرەزيدەنت قاسىم-جومارت توقاەۆ جۋرناليستەردىڭ قوعامداعى رولىنە ەرەكشە توقتالدى.
«جۋرناليست – مارتەبەلى ماماندىق. ول – اقيقات ءسوزدىڭ, وتكىر وي مەن شىنايى پىكىردىڭ جانە ءادىل ءىستىڭ جاقتاۋشىسى. سوندىقتان ءبىز مەديا سالاسىنىڭ ماماندارىنا ءاردايىم زور قۇرمەتپەن قارايمىز» دەدى مەملەكەت باسشىسى.
تۇپتەپ كەلگەندە, مەملەكەت تە, جۋرناليست تە ۇلت ءۇشىن قىزمەت ەتەدى, ەل تاعدىرىن شەشۋگە اتسالىسادى. ۇلت ءباسپاسوزى مەن ۇلت مۇددەسى قاي كەزدە دە وزەكتەس بولعان. قازىر دە سولاي. ەلوردانىڭ ءتول باسىلىمى دا وسى مۇددە جولىندا تاباندى قىزمەتىن جالعاستىرا بەرمەك.
