ەلوردادا پارلامەنت دەپۋتاتتارىنىڭ كوشپەلى جۇمىس ءىس-شارالارى جالعاستى. ءماجىلىس دەپۋتاتى داۋلەت تۇرلىحانوۆ بايقوڭىر اۋدانى ارداگەرلەرىمەن كەزدەسۋ وتكىزدى.
بايقوڭىر اۋداندىق «بەلسەندى ۇزاق ءومىر ءسۇرۋ ورتالىعى» مەكەمەسىندە وتكەن كەزدەسۋ باسىندا داۋلەت تۇرلىحانوۆ ءوزى سايلانعان استانا قالاسىنىڭ №2 سايلاۋ وكرۋگى بويىنشا اتقارىلعان ءىس-شارالار تۋرالى, پارلامەنتتەگى جۇمىس بارىسى جايىندا ايتىپ بەردى. اۋدان اۋماعىندا جۇرگىزىلىپ جاتقان مەكتەپ قۇرىلىسى, سۋمەن قامتاماسىز ەتۋ, كاسىپورىن جۇمىسشىلارىنىڭ الەۋمەتتىك ماسەلەلەرى جونىندەگى وي-پىكىرىن ورتاعا سالدى. سونداي-اق جينالىسقا قاتىسقان استانا قالاسى ءماسليحاتىنىڭ دەپۋتاتى دينارا ۋرازالينا, جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ەركەبۇلان ماليك, «بەلسەندى ءومىر ءسۇرۋ ورتالىعى» كمم باسشىسىنىڭ ورىنباسارى مارات اۋباكىروۆ ەلوردادا ارداگەرلەر قاۋىمىنا جاسالىپ جاتقان يگى ءىس-شارالار تۋرالى ايتتى.
– استانا وتە قارقىندى دامىپ كەلە جاتقان قالا بولعاندىقتان, ونىڭ الەۋمەتتىك ينفراقۇرىلىمىن جەتىلدىرۋ, جاڭارتۋ وزەكتى بولىپ وتىر. ماسەلەن, كەيبىر مەكتەپتەردە ءۇش اۋىسىممەن وقۋ جالعاسىپ جاتىر, بىراق ول مەكتەپتەردىڭ جانىنان قوسىمشا عيماراتتار تۇرعىزىلىپ جاتىر. بيىلعى وقۋ جىلى اياقتالعانعا دەيىن بىرنەشە مەكتەپ پايدالانۋعا بەرىلەيىن دەپ وتىر. مەن دەپۋتات رەتىندە وسى وقۋ مەكەمەلەرىندەگى قۇرىلىس جۇمىسىن ۇدايى نازاردا ۇستاپ كەلەمىن. سونداي-اق «استانا سۋ ارناسى», «استانا كوگالداندىرۋ قۇرىلىسى» كاسىپورىندارى جۇمىسشىلارىمەن كەزدەسىپ, ولاردىڭ الەۋمەتتىك جاعدايىن جاقسارتۋ بويىنشا مالىمەتتەردى ءبىلدىم. قالانى سۋمەن قامتاماسىز ەتەتىن نىسانداردىڭ جۇمىسىمەن دە تانىستىم. وسىنداي جۇمىستار ارقىلى ورىن العان پروبلەمالاردى قالا باسشىلىعىنا جەتكىزەمىن, قاجەت بولعان جاعدايدا, زاڭنامالىق تۇرعىدان وزگەرىستەر مەن تولىقتىرۋلار ەنگىزۋگە مۇددەلىك تانىتامىن, – دەيدى داۋلەت بولاتۇلى.
كەزدەسۋگە كەلگەن ارداگەرلەر قاۋىمى دەپۋتاتقا وزدەرىن تولعاندىرعان ساۋالدارىن دا قويدى. داۋلەت تۇرلىحانوۆ ءاربىر سۇراققا ەگجەي-تەگجەيلى جاۋاپ بەردى. ارداگەرلەر تاراپىنان, اسىرەسە, جاستاردىڭ جامان ادەتتەرگە بوي ۇسىنىپ بارا جاتقانى تۋرالى ساۋال كوپ قويىلدى. بۇل رەتتە دەپۋتات ماجىلىستەگى جۇمىسىندا ەسىرتكى, زياندى سۋسىن-ىشىمدىكتەر, ەلەكتروندى تەمەكىنىڭ جاستارعا تيگىزىپ وتىرعان زاردابى تۋرالى بىرنەشە رەت دەپۋتاتتىق ساۋال جاساعانىن, وسى باعىتتا زاڭدىلىقتى قاتايتۋ جونىندە جۇمىس جۇرگىزىلىپ جاتقانىن ءمالىم ەتتى.
كەزدەسۋ بارىسىندا دەپۋتات زەينەتكەرلەردىڭ قولونەرىن تاماشالاپ, سپورتپەن شۇعىلدانىپ جۇرگەن ارداگەرلەرمەن ەمىن-ەركىن اڭگىمەلەستى. «بەلسەندى ءومىر ءسۇرۋ ورتالىعى» مەكەمەسىنىڭ ۇجىمىنا جانە جۇمىسىنا ريزاشىلىعىن ءبىلدىردى.
