روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمى ءبىرجان سالدىڭ 190 جىلدىعىنا ارنالعان «ارقانىڭ ءان-كۇي مۇراسى» اتتى ءداستۇرلى ونەر كەشىن وتكىزدى.
اتالمىش كونتسەرت حالىق كومپوزيتورى, ءبىرجان سالدىڭ شىعارماشىلىعى مەن ونەرىن وسكەلەڭ ۇرپاققا ناسيحاتتاۋعا باعىتتالعان. ارقا ءوڭىرىنىڭ ءان-كۇي مەكتەبى ونىڭ ەسىمىمەن تىعىز بايلانىستى.
رۋحاني كەشكە قازاقستاننىڭ ەڭبەك سىڭىرگەن قايراتكەرلەرى جانعالي ءجۇزباي, ەرلان رىسقالي, مەدەت سالىقوۆ, كلارا تولەنباەۆا, قۇماربەك قالقاتاي, راۋشان ورازباي, ايزات قارابەك, مادەنيەت قايراتكەرى تولعانباي سەمباەۆ, مادەنيەت سالاسىنىڭ ۇزدىكتەرى پەريزات تۇراروۆا, قايرات ايتباەۆ, الەم حالىق بيلەرىن بيلەيتىن «Birlik» ءانسامبلىنىڭ كوركەمدىك جەتەكشىسى انەل ماراباەۆا, ەلىمىزدىڭ ابىرويىن حالىقارالىق ارەنالاردا اسقاقتاتىپ جۇرگەن باۋىرجان مۇحامەتباي, اقەركە تاجىباەۆا, ۆەنەرا تابىس, اسقار مۇقيات, ءبىرجان ايتاحمەتوۆ, داريا بەكپەنبەتوۆا جانە «بىرلىك» بي ءانسامبلى ونەر كورسەتتى.
