استانادا مەكتەپتەرگە ازىق-تۇلىك جەتكىزۋشىلەرگە ءىرى كولەمدە ايىپپۇل سالىندى, دەپ حابارلايدى astana-akshamy.kz
كاسىپكەرلەر سانيتار دارىگەرلەردىڭ ۋاجىمەن كەلىسپەيدى. ايتۋلارىنشا, ولارعا شۇجىقتىڭ قاسىنداعى قيار ءۇشىن, مانيكيۋرى بار اسپازدار ءۇشىن ايىپپۇل سالىنعان. بۇل رەتتە ايىپپۇل سوماسى 1,3 ميلليون تەڭگەگە دەيىن جەتىپ وتىر. بۇعان اشۋلانعان كاسىپكەرلەر ادىلدىك تالاپ ەتتى.
«اسپازدىڭ قولعاپ كيگەنىنە قاراماستان نەگە ءبىزدىڭ كاسىپكەرلەرگە ايىپپۇل سالىنىپ جاتىر؟ تاماقتاردىڭ مەرزىمى وتپەگەن. ءبىز استانا قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتى زاڭدى تۇردە ارەكەت ەتپەدى دەپ ەسەپتەيمىز», – دەيدى قازاقستان رەسپۋبليكاسى بولشەك ساۋدا جانە قوعامدىق تاماقتاندىرۋ قاۋىمداستىعىنىڭ وكىلى مارينا لاپتەۆا.
استانالىق مەكتەپتەرگە ازىق-تۇلىك جەتكىزىپ وتىرعان كاسىپكەرلەر رەسپۋبليكالىق كاسىپكەرلىكتى قورعاۋ پالاتاسىنىڭ كەڭسەسىنە جينالدى.
ولار اسپازدار جاساعان زاڭبۇزۋشىلىقتار ءۇشىن اسپازدىڭ وزىنە ايىپپۇل سالۋ كەرەكتىگىن العا تارتادى. سانيتارلىق-ەپيدەميولوگيالىق نورمالاردى ساقتاماعانى ءۇشىن ءبىلىم بەرۋ مەكەمەلەرىنىڭ اكىمشىلىگى جاۋاپكەرشىلىككە تارتىلۋى كەرەك دەيدى كاسىپكەرلەر.
ەلوردالىق سانيتارلىق-ەپيدەميولوگيالىق باقىلاۋ دەپارتامەنتى وكىلدەرى بۇعان قاتىستى جاۋاپ بەردى. ولاردىڭ پىكىرىنشە, زاڭدا كەرىسىنشە جازىلعان.
«27-باپتا كاسىپكەرلىك سۋبەكتىسى ءوز قىزمەتكەرى تاراپىنان جىبەرىلگەن بۇزۋشىلىقتار ءۇشىن سانيتارلىق نورمالاردىڭ تالاپتارىن ءتيىستى تۇردە ورىنداۋعا مىندەتتى دەپ ناقتى كورسەتىلگەن», – دەدى استانا قالاسى سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى سارحات بەيسەنوۆا.
