قىزىلوردا وبلىسىنىڭ ءبىلىم باسقارماسىنىڭ كەلىسىمى بويىنشا قىزىلوردا قالاسىنىڭ توتەنشە جاعدايلار باسقارماسىنىڭ قىزمەتكەرلەرى ءبىلىم بولىمىنە قاراستى №101 مەكتەپتىڭ وقۋ عيماراتىندا اسقار زابيكۋلين اتىنداعى كادەت سىنىبىن اشتى, دەپ حابارلايدى astana-akshamy.kz
كادەت سىنىبىنىڭ وقۋشىلارىنا قۇتقارۋشىلاردىڭ ۇلگىسى بويىنشا ارنايى نىساندى كيىم جانە اسكەري پارادقا كيەتىن نىساندى كيىم ازىرلەنىپ, تىگىلدى. سىنىپ كابينەتى ارنايى ستەندتەرمەن, ءورت ءسوندىرۋ-قۇتقارۋ قۇرال-جابدىقتارىمەن قامتاماسىز ەتىلدى.
اسقار زابيكۋلين اتىنداعى كادەت سىنىبىن قۇرۋداعى ماقساتى – تابيعي جانە تەحنوگەندىك سيپاتتاعى ءتۇرلى توتەنشە جاعدايلار كەزىندە جەدەل ءارى دۇرىس شەشىم قابىلداۋ ءبىلىمىن, داعدىلارىن دامىتۋ, ءورت قاۋىپسىزدىگى سالاسىنداعى الدىن الۋ, زارداپ شەككەندەرگە العاشقى مەديتسينالىق كومەك كورسەتۋدى ۇيرەتۋ, جاس ۇرپاقتى پاتريوتتىق تاربيەلەۋ.
ەستەرىڭىزگە سالا كەتسەك, 2022 جىلدىڭ 16 قاراشاسىندا استانا قالاسىندا 15 قاباتتى ۇيدەن ءورت شىعىپ, سالدارىنان 3 ادام, ونىڭ ىشىندە ءبىر بالا اۋرۋحاناعا تۇسكەن بولاتىن. سول وقيعادا بىرنەشە ادامدى قۇتقارعان ءورت ءسوندىرۋشى اسقار زابيكۋليننىڭ ءوزىنىڭ دە دەنەسىن 80% كۇيىك شالىپ, جانساقتاۋ بولىمىنە جاتقىزىلعان ەدى. وكىنىشكە قاراي, 20 قاراشادا ول اۋرۋحانادا قايتىس بولدى. دارىگەرلەر ونىڭ ءومىرى ءۇشىن بىرنەشە كۇن كۇرەسكەن بولاتىن.
وسى وقيعادان كەيىن, مەملەكەت باسشىسى ەرلىك كورسەتكەن جانە بىرنەشە ادامنىڭ ءومىرىن قۇتقارعان ەلوردالىق ءورت سوندىرۋشىلەردى قازاقستان رەسپۋبليكاسىنىڭ مەملەكەتتىك ناگرادالارىمەن ماراپاتتاۋ تۋرالى جارلىققا قول قويدى.
اسقار زابيكۋلين I دارەجەلى «ايبىن» وردەنىمەن ماراپاتتالدى. 20 جەلتوقساندا وعان ومىردەن وتكەننەن كەيىن «التىن ادام» سىيلىعى تابىس ەتىلدى.
28 جەلتوقساندا استانا قالالىق ءماسليحاتى شەشىمىمەن ەرلىكپەن قازا تاپقان ءورت ءسوندىرۋشى اسقار زابيكۋليننىڭ ەسىمى جاڭا كوشەگە بەرىلدى.
سونداي-اق, بۇعان دەيىن استانادا ەرلىكپەن قازا تاپقان ءورت ءسوندىرۋشى اسقار زابيكۋلين تۋرالى «قاھارمان» سەريالى ءتۇسىرىلدى.
