استانا اكىمى 4-قاباتتا ءىلىنىپ تۇرعان بالانى قۇتقارعان اقان اكىمجانوۆپەن كەزدەستى
استانا قالاسىنىڭ اكىمى جەڭىس قاسىمبەك Instagram پاراقشاسىندا ءبۇلدىرشىندى قۇتقارىپ قالعان اقان اكىمجانوۆپەن جانە اتا-اناسىمەن كەزدەسكەنى تۋرالى جازدى, دەپ حابارلايدى astana-akshamy.kz
«اقان اكىمجانوۆپەن جانە ونىڭ اتا-اناسىمەن كەزدەستىم. اقان ءوزىنىڭ جىلدامدىعىمەن جانە باتىلدىعىمەن ىقتيمال قايعىلى جاعدايدىڭ الدىن الدى. 7-سىنىپ وقۋشىسى 4-قاباتتا ءىلىنىپ تۇرعان كىشكەنتاي ءبۇلدىرشىندى قۇتقارىپ قالدى.
اقاننىڭ اتا-اناسىنا ەرجۇرەك ۇل ءوسىرىپ, لايىقتى تاربيە بەرگەنى ءۇشىن العىسىمدى بىلدىرەمىن! اقان سول سياقتى وقۋدا دا, سپورتتا دا جەتىستىكتەرگە جەتىپ ءجۇر! مۇعالىمدەرى مەن سىنىپتاستارى ول تۋرالى ادال دوس, سانالى جانە جاۋاپكەرشىلىگى مول وقۋشى دەگەن پىكىردە!
اقانعا پلانشەت پەن ءبىر ميلليون تەڭگە سىيعا بەرىلدى. سونداي-اق بولاشاقتا كوللەدجگە نەمەسە ۋنيۆەرسيتەتكە ءتۇسۋ كەزىندە دە كومەك كورسەتەمىز», – دەپ جازدى جەڭىس قاسىمبەك.
